“ജീവിച്ചിരിക്കുന്നുണ്ടെന്ന് കാണിക്കാനാണ് സിപിഐ എതിർപ്പ് പ്രകടിപ്പിക്കുന്നത്”; പിഎം ശ്രീ പദ്ധതിയിൽ സിപിഐയുടെ നിലപാടിനെ പരിഹസിച്ച് വെള്ളാപ്പള്ളി
പിഎം ശ്രീ പദ്ധതിയുമായി ബന്ധപ്പെട്ട് സിപിഐ എടുത്ത നിലപാട് പരിഹസിച്ച് എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ പ്രതികരിച്ചു. “ജീവിച്ചിരിക്കുന്നുണ്ടെന്ന് കാണിക്കാനാണ് സിപിഐ എതിർപ്പ് പ്രകടിപ്പിക്കുന്നത്. മുഖ്യമന്ത്രിയെ കണ്ട് രണ്ട് വാക്ക് പറഞ്ഞാൽ സിപിഐയുടെ എല്ലാ പ്രശ്നങ്ങളും തീരും,” എന്നാണ് വെള്ളാപ്പള്ളിയുടെ പരാമർശം.
“മുന്നണി മര്യാദ പാലിക്കുന്നു എന്ന് മുഖ്യമന്ത്രി പറഞ്ഞാൽ അതിൽ അടങ്ങാനേ ഉള്ളു. പിണറായി നേരിട്ട് പറഞ്ഞാൽ അതോടെ കാര്യങ്ങൾ അവസാനിക്കും. ‘ഞങ്ങൾക്കും അഭിപ്രായമുണ്ട്’, ‘ഞങ്ങൾ ഇങ്ങനെ പറഞ്ഞതാണ്’ എന്നൊക്കെ പറയാനുള്ളതിനായിട്ടാണ് സിപിഐ ഇത്തരം പെരുമാറ്റം കാണിക്കുന്നത്,” എന്നും അദ്ദേഹം കൂട്ടിച്ചേർത്തു.
“കേന്ദ്രസർക്കാരിൽ നിന്ന് ലഭിക്കേണ്ട കോടിക്കണക്കിന് രൂപ കേരളത്തിന് അവകാശപ്പെട്ടതാണ്. അത് വാങ്ങിച്ചെടുക്കാൻ നയരൂപീകരണം ആവശ്യമാണ്. കാലത്തിന്റെ ആവശ്യത്തിന് അനുസരിച്ച് മുന്നോട്ട് പോകണം. ആദർശം പറഞ്ഞ് നശിപ്പിക്കാതെ അവസരം പ്രയോജനപ്പെടുത്തണം,” എന്നും വെള്ളാപ്പള്ളി നടേശൻ പറഞ്ഞു.
സിപിഎം-ബിജെപി അന്തർധാരയെന്ന വ്യാഖ്യാനത്തെയും വെള്ളാപ്പള്ളി പരിഹസിച്ചു: “അത് പ്രായോഗിക ബുദ്ധിയാണ്, അന്തർധാരയല്ല. ബിനോയ് വിശ്വം പറഞ്ഞതിൽ പുതുമയൊന്നുമില്ല. ഇതിന് മുമ്പ് പറഞ്ഞ പല കാര്യങ്ങളിലും അവർ അവസാനം പിണറായി വിജയനോടൊത്ത് പോകാറാണ് പതിവ്. അതിനാൽ ഇപ്പോഴും അതേ സംഭവിക്കും,” എന്നും അദ്ദേഹം ചൂണ്ടിക്കാട്ടി.
Tag: Vellappally mocks CPI’s stance on PM Sree project
