പുതിയ പ്രഖ്യാപനം; കോഴിക്കോട് സ്റ്റേഡിയത്തിലെ ബൈക്ക് റേസ് പ്രശസ്ത ബോളിവുഡ് താരം സൽമാൻ ഖാൻ ഉദ്ഘാടനം ചെയ്യുമെന്ന് കായികമന്ത്രി

അർജന്റീന ഫുട്ബോൾ ടീം കേരളത്തിലെത്തുമോ എന്ന ചർച്ചകൾക്കിടയിൽ കായികമന്ത്രി വി. അബ്ദുറഹിമാൻ പുതിയ വാഗ്ദാനവുമായി രംഗത്തെത്തി. കോഴിക്കോട് സ്റ്റേഡിയത്തിലെ ബൈക്ക് റേസ് പ്രശസ്ത ബോളിവുഡ് താരം സൽമാൻ ഖാൻ ഉദ്ഘാടനം ചെയ്യും എന്നതാണ് മന്ത്രിയുടെ പ്രഖ്യാപനം. വണ്ടിപൂട്ടുമത്സരത്തിന് അംഗീകാരം നൽകാനുള്ള ആവശ്യം സർക്കാരിന്റെ പരിഗണനയിലുണ്ടെന്നും അദ്ദേഹം വ്യക്തമാക്കി. മലപ്പുറം പൂക്കോട്ടൂരിൽ നടന്ന വണ്ടിപൂട്ടുമത്സരം ഉദ്ഘാടനം ചെയ്ത ശേഷം സംസാരിക്കുകയായിരുന്നു മന്ത്രി.

അതേസമയം, അർജന്റീന ഫുട്ബോൾ ടീം കേരളത്തിൽ കളിക്കാൻ എത്തുമെന്ന പ്രതീക്ഷ ഇപ്പോഴും നിലനിൽക്കുന്നുവെന്ന് വി. അബ്ദുറഹിമാൻ വ്യക്തമാക്കി. “അത് സഫലമാക്കാൻ ശ്രമങ്ങൾ തുടരുകയാണ്. അർജന്റീനയുടെ കേരള യാത്രയ്ക്കുള്ള വാതിലുകൾ പൂർണമായും അടഞ്ഞിട്ടില്ല,” എന്നും അദ്ദേഹം കൂട്ടിച്ചേർത്തു.

കൊച്ചി കലൂർ സ്റ്റേഡിയത്തിലെ നവീകരണപ്രവർത്തനങ്ങളുമായി ബന്ധപ്പെട്ട ഫിഫ അനുമതി വൈകിയതാണ് നവംബർ മാസത്തിലെ സന്ദർശനം തടസപ്പെട്ടതിന്റെ പ്രധാന കാരണം. സ്റ്റേഡിയം നിശ്ചിത സമയത്ത് പുനർനിർമ്മാണം പൂർത്തിയാകും എന്ന പ്രതീക്ഷയിലാണ് അർജന്റീനയുടെ കേരളയാത്രയുടെ തീയതികൾ പ്രഖ്യാപിച്ചതെന്നും മന്ത്രി പറഞ്ഞു.

“അർജന്റീന നവംബറിൽ വരാതിരുന്നാലും, മറ്റൊരു അവസരത്തിൽ തീർച്ചയായും എത്തും. നമ്മുടെ നാട്ടിൽ ചിലർ ഇമെയിൽ അയച്ച് അർജന്റീനയുടെ വരവ് തടയാൻ ശ്രമിച്ചുവെന്നതും സത്യമാണെന്ന്” മന്ത്രി ആരോപിച്ചു.

Tag: New announcement; Famous Bollywood star Salman Khan will inaugurate the bike race at Kozhikode Stadium, says Sports Minister