ക്രിപ്റ്റോകറൻസിയെ ഇന്ത്യൻ നിയമം അംഗീകരിക്കുന്ന ആസ്തിയായി കണക്കാക്കാമെന്ന് മദ്രാസ് ഹൈക്കോടതി

ക്രിപ്റ്റോകറൻസിയെ ഇന്ത്യൻ നിയമം അംഗീകരിക്കുന്ന ആസ്തിയായി കണക്കാക്കാമെന്ന് മദ്രാസ് ഹൈക്കോടതി വിധിച്ചു. സ്വന്തമാക്കാനും, നിക്ഷേപിക്കാനും, വിപണനം നടത്താനും കഴിയുന്ന ആസ്തിയായി ക്രിപ്റ്റോകറൻസിയെ പരിഗണിക്കാമെന്ന് കോടതി വ്യക്തമാക്കി. ക്രിപ്റ്റോ ഇടപാടുകൾ നടത്തുന്ന സ്ഥാപനങ്ങൾ സാധാരണ സാമ്പത്തിക ഇടപാടുകൾക്ക് ബാധകമായ എല്ലാ മാർഗ്ഗനിർദേശങ്ങളും പാലിക്കണമെന്ന് ജസ്റ്റിസ് ആനന്ദ് വെങ്കടേഷ് അധ്യക്ഷനായ ബെഞ്ച് വ്യക്തമാക്കി.

ക്രിപ്റ്റോ നിക്ഷേപ അക്കൗണ്ട് മരവിപ്പിച്ചതിനെതിരെ ചെന്നൈയിലെ ഒരു നിക്ഷേപക സമർപ്പിച്ച ഹർജിയിലാണ് കോടതി വിധി പുറപ്പെടുവിച്ചത്. ഹർജിക്കാരിയുടെ നിക്ഷേപത്തിന് ഇടക്കാല സംരക്ഷണവും കോടതി അനുവദിച്ചു.

“ക്രിപ്റ്റോകറൻസി സ്ഥാവര വസ്തുവോ കറൻസിയോ അല്ലെങ്കിലും, ഇന്ത്യൻ നിയമപ്രകാരം ആസ്തിയായി കണക്കാക്കാവുന്ന എല്ലാ സവിശേഷതകളും അതിന് ഉണ്ട്,” എന്നാണ് കോടതിയുടെ നിലപാട്. അതിനാൽ അത് സ്വന്തമാക്കാനും, നിക്ഷേപമായി സൂക്ഷിക്കാനും, വിപണനം നടത്താനും നിയമപരമായ തടസ്സമില്ലെന്നും കോടതി വ്യക്തമാക്കി.

കോടതിയുടെ വിലയിരുത്തലുപ്രകാരം, ക്രിപ്റ്റോകറൻസി വ്യക്തമായി നിർവചിക്കപ്പെട്ട സാങ്കേതിക സംവിധാനമാണ് — കൈമാറ്റം ചെയ്യാവുന്നതും നിശ്ചിത വ്യക്തികൾക്ക് നിയന്ത്രണാവകാശം കൈവശം വയ്ക്കാനാവുന്നതുമായ. ഈ സവിശേഷതകൾ അതിനെ ഒരു ആസ്തിയായി അംഗീകരിക്കാൻ മതിയെന്നാണ് കോടതി ചൂണ്ടിക്കാട്ടിയത്.

ഊഹാധിഷ്ഠിത ഇടപാടായല്ല, മറിച്ച് ഡിജിറ്റൽ ആസ്തിയായാണ് ഇന്ത്യൻ നിയമം ക്രിപ്റ്റോകറൻസിയെ കാണുന്നതെന്നും, ഇത് ആദായനികുതി നിയമത്തിലെ 2(47എ) വകുപ്പിന്റെ പരിധിയിൽപ്പെടുന്നതുമാണ് കോടതിയുടെ വിലയിരുത്തൽ.

2024-ൽ സെൻട്രലൈസ്ഡ് ക്രിപ്റ്റോ എക്സ്ചേഞ്ചായ വസീർഎക്സിനെതിരെ നടന്ന സൈബർ ആക്രമണത്തിൽ ഇആർസി-20 കറൻസി ശേഖരം മോഷണം പോയതിനെത്തുടർന്ന്, വസീർഎക്സിന്റെ എല്ലാ നിക്ഷേപ അക്കൗണ്ടുകളും മരവിപ്പിച്ചിരുന്നു. ഇതിനെ ചോദ്യം ചെയ്താണ് ചെന്നൈ സ്വദേശിനി കോടതിയെ സമീപിച്ചത്. 1.98 ലക്ഷം രൂപ നിക്ഷേപിച്ച് 3,532 എക്സ്‌ആർപി (XRP) ക്രിപ്റ്റോകറൻസി സൂക്ഷിച്ചിരുന്നതായി അവർ ഹർജിയിൽ വ്യക്തമാക്കിയിരുന്നു.

Tag: Madras High Court says cryptocurrency can be considered an asset recognized by Indian law