ഉത്തർപ്രദേശിലെ സിആർപിഎഫ് ക്യാമ്പ് ആക്രമണം; പ്രതികളുടെ വധശിക്ഷ അലഹബാദ് ഹൈക്കോടതി റദ്ദാക്കി

ഉത്തർപ്രദേശിലെ റാംപൂരിൽ 2008ൽ സിആർപിഎഫ് ക്യാമ്പിന് നേരെയുണ്ടായ ഭീകരാക്രമണ കേസിലെ നാല് പ്രതികൾക്ക് വിധിച്ച വധശിക്ഷ അലഹബാദ് ഹൈക്കോടതി റദ്ദാക്കി. രണ്ട് പാകിസ്ഥാൻ പൗരന്മാർ ഉൾപ്പെടെ നാല് പ്രതികളുടെ വധശിക്ഷയും, ഒരു പ്രതിക്ക് നൽകിയിരുന്ന ജീവപര്യന്തം തടവും കോടതി റദ്ദാക്കിയിട്ടുണ്ട്. ഏഴ് സിആർപിഎഫ് ഉദ്യോഗസ്ഥരും ഒരു സാധാരണക്കാരനും കൊല്ലപ്പെട്ട ആക്രമണവുമായി ബന്ധപ്പെട്ട കേസിലാണ് ഈ തീരുമാനം.

ഷരീഫ്, സബാഹുദ്ദീൻ, പാകിസ്ഥാൻ പൗരന്മാരായ ഇമ്രാൻ ഷെഹ്സാദ്, മുഹമ്മദ് ഫാറൂഖ് എന്നിവർക്കാണ് വിചാരണ കോടതി വധശിക്ഷ വിധിച്ചിരുന്നത്. ഇവരുടെ ശിക്ഷയാണ് ജസ്റ്റിസ് സിദ്ധാർഥ് വർമ്മയും ജസ്റ്റിസ് റാം മനോഹർ നാരായൺ മിശ്രയും ഉൾപ്പെട്ട അലഹബാദ് ഹൈക്കോടതിയുടെ ഡിവിഷൻ ബെഞ്ച് റദ്ദാക്കിയത്. അതോടൊപ്പം, ജങ് ബഹാദൂരിന് വിധിച്ച ജീവപര്യന്തം തടവും കോടതി റദ്ദാക്കി.

എന്നാൽ, നിയമവിരുദ്ധമായി ആയുധങ്ങളും വെടിക്കോപ്പുകളും കൈവശം വച്ച കേസിൽ പാകിസ്ഥാൻ പൗരന്മാർ ഉൾപ്പെടെ നാല് പ്രതികളെ ഹൈക്കോടതി കുറ്റക്കാരെന്ന് കണ്ടെത്തി. ഈ കുറ്റത്തിന് 10 വർഷത്തെ തടവുശിക്ഷയാണ് വിധിച്ചത്. പ്രതികൾ കഴിഞ്ഞ 17 വർഷമായി കസ്റ്റഡിയിലാണെന്നതും തിരിച്ചറിയൽ പരേഡ് നടത്താതെയാണ് വിചാരണ കോടതി ശിക്ഷ വിധിച്ചതെന്നതും പരിഗണിച്ചാണ് ഹൈക്കോടതിയുടെ തീരുമാനം. രാജ്യത്തിനെതിരെ യുദ്ധം ചെയ്തതും, യുഎപിഎ നിയമപ്രകാരം ഭീകരപ്രവർത്തനം നടത്തിയതുമെന്ന വകുപ്പുകൾ പ്രകാരമാണ് വിചാരണ കോടതി വധശിക്ഷ വിധിച്ചത്. ഗൂഢാലോചനക്കുറ്റത്തിൽ ജങ് ബഹാദൂരിനെ കുറ്റക്കാരനായി കണ്ടെത്തിയിരുന്നു. 2019ലാണ് വിചാരണ കോടതിയുടെ വിധി വന്നത്. ഗുലാബ് ഖാൻ, മുഹമ്മദ് കൗസർ എന്നിവർ ഇതിനകം കുറ്റവിമുക്തരായിരുന്നു.

2008-ലെ പുതുവത്സരരാത്രിയിലാണ് റാംപൂരിലെ സിആർപിഎഫ് ക്യാമ്പിന് നേരെ ഭീകരാക്രമണം നടന്നത്. എകെ-47 തോക്കുകളും ഗ്രനേഡുകളും ഉപയോഗിച്ചായിരുന്നു ആക്രമണം. ലഷ്കർ-ഇ-തൊയ്ബയാണ് ഈ ആക്രമണത്തിന് പിന്നിലുണ്ടെന്ന് അന്വേഷണത്തിൽ കണ്ടെത്തിയിരുന്നു. ഉത്തർപ്രദേശ് പൊലീസ് നടത്തിയ അന്വേഷണത്തിന്റെ ഭാഗമായി പ്രതികളെ 2008 ഫെബ്രുവരിയിൽ ലഖ്നൗവിൽ വച്ചാണ് അറസ്റ്റ് ചെയ്തത്.

Tag: CRPF camp attack in Uttar Pradesh; Allahabad High Court quashes death sentence of convicts