ശബരിമല സ്വർണക്കൊള്ള; ഉണ്ണികൃഷ്ണൻ പോറ്റിയെ റിമാൻഡ് ചെയ്തു; അന്വേഷണം കടുപ്പിച്ച് എസ്ഐടി

ശബരിമല ദ്വാരപാലക ശില്പങ്ങളിലെ സ്വർണ മോഷണക്കേസിൽ എസ്ഐടി കസ്റ്റഡിയിലായിരുന്ന ഉണ്ണികൃഷ്ണൻ പോറ്റിയെ കോടതി റിമാൻഡ് ചെയ്തു. 14 ദിവസത്തെ കസ്റ്റഡി കാലാവധി പൂർത്തിയായതിനെ തുടര്‍ന്നാണ് റിമാൻഡ് നടപടി. അപസ്മാര ബാധിതനാണെന്നും ജയിലിൽ പോകുന്നത് ബുദ്ധിമുട്ടുണ്ടെന്നും പ്രതിഭാഗം അഭിഭാഷകൻ കോടതിയെ അറിയിച്ചു. എന്നാൽ ആവശ്യമായ ചികിത്സാ സൗകര്യങ്ങൾ ജയിലിൽ ഒരുക്കിയിട്ടുണ്ടെന്ന് പ്രോസിക്യൂഷൻ വ്യക്തമാക്കി. പ്രതിയെ തിരുവനന്തപുരം സ്പെഷ്യൽ സബ് ജയിലിലേക്ക് മാറ്റി.

ഇതിനിടെ, ശബരിമല ശ്രീകോവിലിലെ കട്ടിളപ്പാളിയിലെ സ്വർണം തട്ടിയെടുത്ത കേസിലും ഉണ്ണികൃഷ്ണൻ പോറ്റിയുടെ അറസ്റ്റ് രേഖപ്പെടുത്താൻ എസ്ഐടി തീരുമാനിച്ചു. നവംബർ 3-ന് റാന്നി കോടതിയിൽ ഹാജരാക്കി കസ്റ്റഡിയിൽ വാങ്ങും. ദ്വാരപാലക പാളികളിലെ മോഷണത്തിനൊപ്പം കട്ടിളപ്പാളികളിലെ സ്വർണ തട്ടിപ്പിലും പ്രതിയുടെ പങ്കുണ്ടെന്ന കണ്ടെത്തലിന്റെ അടിസ്ഥാനത്തിലാണ് നടപടി.

കേസിലെ രണ്ടാം പ്രതി മുരാരി ബാബുവിനെ രണ്ടുകേസുകളിലും പ്രത്യേക സംഘം ഇതിനകം അറസ്റ്റ് ചെയ്തിട്ടുണ്ട്. ഇരുവരോടും ഒരുമിച്ച് ചോദ്യം ചെയ്യൽ നടത്തിയതിൽ നിന്ന് പാളികൾ ചെമ്പ് പാളികൾ എന്നായി രേഖപ്പെടുത്തിയ ഗൂഢാലോചനയിലേക്കാണ് അന്വേഷണ സംഘം ശ്രദ്ധ തിരിച്ചത്. മുൻപ് ബംഗളൂരു, ചെന്നൈ എന്നിവിടങ്ങളിൽ നടത്തിയ റെയ്ഡുകളിൽ കവർച്ച ചെയ്ത സ്വർണത്തിന് സമാനമായ സ്വർണം എസ്ഐടി കണ്ടെത്തിയിരുന്നു. ഇതിനകം 608 ഗ്രാം സ്വർണം തെളിവായി റാന്നി കോടതിയിൽ ഹാജരാക്കി.

അതേസമയം, കേസിൽ ദേവസ്വം വക ഉദ്യോഗസ്ഥരോട് എസ്ഐടി നിലപാട് കടുപ്പിച്ചിരിക്കുകയാണ്. ആവശ്യപ്പെട്ട രേഖകൾ ഇപ്പോഴും സമർപ്പിക്കാത്ത ഉദ്യോഗസ്ഥർക്കെതിരെ നിയമനടപടി സ്വീകരിക്കുമെന്ന് സംഘം മുന്നറിയിപ്പ് നൽകി. ഇനി സമയം നീട്ടാനാകില്ലെന്നും 1999-ൽ വിജയ് മല്ല്യയുടെ നേതൃത്വത്തിൽ നടപ്പിലാക്കിയ സ്വർണ്ണ പൊതിയൽ സംബന്ധിച്ച രേഖകൾ അടിയന്തിരമായി കൈമാറണമെന്ന് എസ്ഐടി വ്യക്തമാക്കി. ശബരിമലയിലെ പരിപാലന, നവീകരണ രേഖകളും അന്വേഷണത്തിന് നിർണായകമാണെന്നതും സംഘം കൂട്ടിച്ചേർത്തു.

Tag: Sabarimala gold theft; Unnikrishnan Potty remanded; SIT tightens investigation