“എന്റെ ഫിഫ്റ്റിയോ സെഞ്ചുറിയോ പ്രധാനമല്ല, ഇന്ത്യയുടെ വിജയമാണ് എല്ലാം” ദൈവത്തോടും കുടുംബത്തോടും പരിശീലകനോടും നന്ദി, കണ്ണീരോടെ ജമീമ

വനിതാ ഏകദിന ലോകകപ്പിൽ ഓസ്ട്രേലിയയെ പരാജയപ്പെടുത്തി ഫൈനലിലേക്ക് മുന്നേറിയ ഇന്ത്യയുടെ വിജയത്തിന് പിന്നാലെ താരം ജെമിമാ റോഡ്രിഗ്സ് വികാരാധീനയായി. സെഞ്ചുറിയുമായി പുറത്താകാതെ നിന്ന ജെമിമയുടെയും 89 റൺസ് സംഭാവന ചെയ്ത ക്യാപ്റ്റൻ ഹർമൻപ്രീത് കൗറിന്റെയും തകർപ്പൻ പ്രകടനങ്ങളാണ് ഇന്ത്യൻ വിജയത്തിന്റെ അടിസ്ഥാനം. മത്സരശേഷം ജെമിമ പറഞ്ഞു, “എന്റെ ഫിഫ്റ്റിയോ സെഞ്ചുറിയോ പ്രധാനമല്ല, ഇന്ത്യയുടെ വിജയമാണ് എല്ലാം.” ദൈവത്തോടും കുടുംബത്തോടും പരിശീലകനോടും നന്ദി രേഖപ്പെടുത്തി താരം.

“ദൈവത്തിന് നന്ദി പറയുന്നു. എനിക്ക് ഒറ്റയ്ക്കിത് സാധ്യമാകുമായിരുന്നില്ല. അമ്മയ്ക്കും അച്ഛനും കോച്ചിനും, എന്നിൽ വിശ്വാസം വെച്ച എല്ലാവർക്കും നന്ദി പറയുന്നു. കഴിഞ്ഞ മാസം വളരെ ബുദ്ധിമുട്ടുകളിലൂടെ കടന്നുപോയി. ഈ വിജയം ഒരു സ്വപ്നം പോലെ തോന്നുന്നു. ഇതുവരെ ഞാൻ അതിനെ പൂർണമായി ഉൾക്കൊണ്ടിട്ടില്ല.”

തന്റെ കരിയറിലെ പ്രതിസന്ധി ഘട്ടങ്ങളിൽ ദൈവവിശ്വാസമാണ് തനിക്കു ശക്തി നൽകിയതെന്നും ജെമിമ പറഞ്ഞു:

“ആദ്യ മത്സരങ്ങളിൽ മോശം പ്രകടനം കാഴ്ചവെച്ചപ്പോഴും ദൈവം എല്ലാം നോക്കിക്കൊണ്ടിരിക്കുന്നു എന്ന് ഞാൻ വിശ്വസിച്ചു. ബൈബിളിലെ ഒരു വചനമാണ് എനിക്ക് ആത്മവിശ്വാസം നൽകിയത് — ‘നിശ്ചലമായി നിൽക്കുക, ദൈവം നിനക്കായി പോരാടും’. ഞാൻ നിശ്ചലമായി നിന്നു, അവൻ എന്റെ വേണ്ടി പോരാടി.”

“കളി തുടങ്ങാൻ അഞ്ചു മിനിറ്റ് മുൻപാണ് എനിക്ക് മൂന്നാം നമ്പറിൽ ഇറങ്ങേണ്ടത് എന്ന് പറഞ്ഞത്. ലീഗ് ഘട്ടത്തിൽ നിർണായക മത്സരങ്ങൾ നഷ്ടമായതുകൊണ്ട്, ഈ മത്സരത്തിൽ ഇന്ത്യയ്ക്കായി ജയിക്കണമെന്ന ഏക ലക്ഷ്യമായിരുന്നു എന്റെ മനസ്സിൽ. എന്റെ സെഞ്ചുറിയോ ഫിഫ്റ്റിയോ അത്ര പ്രാധാന്യമുള്ളതല്ല — ഇന്ത്യയുടെ വിജയം മാത്രമാണ് പ്രധാന്യം.”

ഓസ്ട്രേലിയക്കെതിരെ ചരിത്രവിജയം നേടി ഇന്ത്യ വനിതാ ഏകദിന ലോകകപ്പ് ഫൈനലിലേക്ക് കടന്നിരിക്കുകയാണ്. വനിതാ ഏകദിന ലോകകപ്പ് ചരിത്രത്തിൽ ഇതാദ്യമായാണ് ഇത്രയും വലിയ ലക്ഷ്യം പിന്തുടർന്ന് ഒരു ടീം വിജയിക്കുന്നത്. ഞായറാഴ്ച നടക്കുന്ന ഫൈനലിൽ ഇന്ത്യയുടെ എതിരാളികൾ ദക്ഷിണാഫ്രിക്കയായിരിക്കും.

Tag: Thank God, family and coach, Jemimah says in tears