ഹിന്ദു ദേവതകളെ അധിക്ഷേപിച്ച 12-വയസ്സുകാരിക്കെതിരെ കേസ്; മാതാപിതാക്കൾ അറസ്റ്റിൽ
ഉത്തർപ്രദേശിലെ ഇറ്റാവയിൽ ഹിന്ദു ദേവതകളെ അധിക്ഷേപിക്കുന്ന വീഡിയോ സോഷ്യൽ മീഡിയയിൽ പോസ്റ്റ് ചെയ്ത 12 വയസ്സുകാരിക്കെതിരെ പൊലീസ് കേസെടുത്തു. പ്രായപൂർത്തിയാകാത്ത പെൺകുട്ടിയെ ജുവനൈൽ ഹോമിലേക്ക് അയച്ചതായാണ് റിപ്പോർട്ട്. പെൺകുട്ടിയുടെ മാതാപിതാക്കളായ മുഹമ്മദ് ഷബ്ബീറെന്ന സാബിർ, ഭാര്യ ഷമീന എന്നിവരെയും പൊലീസ് അറസ്റ്റ് ചെയ്തു.
ഒക്ടോബർ 27-നാണ് പെൺകുട്ടി ഒരു മിനിറ്റ് ദൈർഘ്യമുള്ള വീഡിയോ സോഷ്യൽ മീഡിയയിൽ അപ്‌ലോഡ് ചെയ്തത്. വീഡിയോ പെട്ടെന്ന് തന്നെ വൈറലായി, ഹിന്ദു സംഘടനകളുടെ ശക്തമായ പ്രതിഷേധത്തിനും കാരണമായി. അന്വേഷണം ആരംഭിച്ച പൊലീസ്, വീഡിയോ പെൺകുട്ടി മാതാപിതാക്കളുടെ അറിവോടെയും ആസാദ് നഗറിലെ ആസിഫ് എന്ന ഇൻസ്റ്റാഗ്രാം സുഹൃത്തിന്റെ പ്രേരണയോടെയും തയ്യാറാക്കിയതാണെന്ന് കണ്ടെത്തി.
കൂടുതൽ ഫോളോവേഴ്സിനെയും ഓൺലൈൻ വരുമാനവുമാണ് ലക്ഷ്യമിട്ടതെന്ന് അന്വേഷണ ഉദ്യോഗസ്ഥർ പറഞ്ഞു. പൊതുജന രോഷത്തിനും മതവൈരത്തിനും ഇടയാക്കുമെന്നറിഞ്ഞിട്ടും മാതാപിതാക്കൾ മകളെ തടയാൻ ശ്രമിച്ചില്ലെന്നും പൊലീസ് വ്യക്തമാക്കി.
സംഭവത്തിൽ പെൺകുട്ടിയേയും മാതാപിതാക്കളെയും ആസിഫിനേയും എതിർത്ത് ഭാരതീയ ന്യായ സംഹിത (BNS) വകുപ്പ് 196 പ്രകാരം എഫ്‌.ഐ.ആർ. രജിസ്റ്റർ ചെയ്തതായി ഇറ്റാവ സിറ്റി സർക്കിൾ ഓഫീസർ അഭയ് നാഥ് റായ് അറിയിച്ചു. പെൺകുട്ടിയെ ശിശുക്ഷേമ വിഭാഗത്തിന്റെ സംരക്ഷണയിൽ ജുവനൈൽ ഹോമിലേക്ക് അയച്ചു.
ചോദ്യം ചെയ്യലിൽ, കൂടുതൽ ഫോളോവേഴ്സിനും പണത്തിനും വേണ്ടിയാണ് മാതാപിതാക്കളുടെ നിർദ്ദേശപ്രകാരവും ആസിഫിന്റെ പ്രേരണയോടെയുമാണ് വീഡിയോ തയ്യാറാക്കിയതെന്ന് പെൺകുട്ടി മൊഴി നൽകി. ആസിഫിനെ പിടികൂടാനുള്ള അന്വേഷണം തുടരുകയാണ്.
Tag: Case filed against 12-year-old girl for insulting Hindu deities; parents arrested
