കുംഭമേളയിലും റമദാനിലും കോവിഡ് ചട്ടലംഘനം ; ബംഗാള്‍ റാലിയെ ന്യായീകരിച്ച്‌ അമിത് ഷാ
ന്യൂഡല്‍ഹി: ഹരിദ്വാറില്‍ നടന്ന മഹാ കുംഭമേള, റമദാന്‍ എന്നീ ആഘോഷങ്ങളില്‍ കോവിഡ് ചട്ടങ്ങള്‍ പാലിക്കുന്നതില്‍ വീഴ്ചയുണ്ടെന്ന് കേന്ദ്ര ആഭ്യന്തര മന്ത്രി അമിത് ഷാ. നിലവിലെ വ്യാപനം തീര്‍ച്ചയായും വിഷമകരമാണെന്നും കോവിഡ് രണ്ടാം തരംഗത്തിനെതിരെ വിജയം നേടാന്‍ ശരിയായ തീരുമാനങ്ങള്‍ സര്‍ക്കാര്‍ സ്വീകരിച്ചിട്ടുണ്ടെന്നും അമിത് ഷാ പറഞ്ഞു.
”കുംഭമേളയാകട്ടെ റമദാന്‍ ആകട്ടെ കോവിഡ് സാഹചര്യത്തില്‍ ഉണ്ടാകേണ്ട പെരുമാറ്റമല്ല ഉണ്ടാകുന്നത്. അത് സംഭവിച്ചുകൂടാ, അതുകൊണ്ടാണ് കുംഭമേള പ്രതീകാത്മകമാക്കാന്‍ നിര്‍ദേശിക്കേണ്ടിവന്നത്”- ഒരു ഇംഗ്ലീഷ് ചാനലിന് അനുവദിച്ച അഭിമുഖത്തില്‍ അമിത് ഷാ പ്രതികരിച്ചു .
അതെ സമയം, പശ്ചിമ ബംഗാളില്‍ കഴിഞ്ഞ ദിവസം സംഘടിപ്പിച്ച തെരഞ്ഞെടുപ്പ് റാലികളെ അദ്ദേഹം ന്യായീകരിച്ചു. തെരഞ്ഞെടുപ്പ് നടത്തുന്നത് തെരഞ്ഞെടുപ്പ് കമീഷനാണ്. തെരഞ്ഞെടുക്കപ്പെട്ട സര്‍ക്കാറല്ല. പാര്‍ലമെന്‍റാകട്ടെ സംസ്ഥാന നിയമസഭകളാകട്ടെ കാലാവധി കഴിഞ്ഞാല്‍ ഒഴിഞ്ഞുകിടക്കാനാകില്ല. ഇനി ദേശീയാടിസ്ഥാനത്തില്‍ ലോക്ഡൗണ്‍ ഉണ്ടാകില്ലെന്നും സംസ്ഥാനങ്ങളാണ് തീരുമാനിക്കേണ്ടതെന്നും അമിത് ഷാ കൂട്ടിച്ചേര്‍ത്തു .
