‘ബ്ലൂടൂത്തിങ്’ അഥവാ ‘ഹോട്ട്‌സ്‌പോട്ടിങ്’; ലഹരി ഉപയോഗത്തിന്റെ പുതിയതലങ്ങൾ തേടി യുവാക്കൾ
ലഹരിവസ്തുക്കളുടെ ദുരുപയോഗത്തിന്റെ ഒരു പുതിയ രീതിയാണ് ‘ബ്ലൂടൂത്തിങ്’ അഥവാ ‘ഹോട്ട്‌സ്‌പോട്ടിങ്’. ഇത് ‘ഫ്‌ളാഷ് ബ്ലഡ്ഡിങ്’ എന്നും അറിയപ്പെടുന്നു. മയക്കുമരുന്ന് കുത്തിവെച്ച ഒരാളുടെ രക്തം സിറിഞ്ച് വഴി എടുത്ത്, ആ രക്തം മറ്റൊരാളിലേക്ക് കുത്തിവെച്ച് ലഹരി കണ്ടെത്താൻ ശ്രമിക്കുന്ന അപകടകരമായ പ്രവണതയാണിത്.
യുവാക്കൾക്കിടയിൽ ഒരു ട്രെൻഡ് പോലെ ഇത് പ്രചരിക്കുന്നുണ്ടെന്നും ഇത് എച്ച്‌ഐവി പോലുള്ള മാരകരോഗങ്ങളുടെ വ്യാപനത്തിന് വലിയ രീതിയിൽ കാരണമാകുന്നുണ്ടെന്നുമാണ് റിപ്പോർട്ടുകൾ. ഈ രീതി ദക്ഷിണാഫ്രിക്ക, ഫിജി എന്നിവയുൾപ്പെടെയുള്ള രാജ്യങ്ങളിൽ എച്ച്‌ഐവി കേസുകൾ കുത്തനെ വർധിക്കാൻ ഇടയാക്കിയിട്ടുണ്ട്. ഉദാഹരണത്തിന്, 2014-നും 2024-നും ഇടയിൽ ഫിജിയിൽ എച്ച്‌ഐവി അണുബാധകളിൽ ഏകദേശം 10 മടങ്ങ് വർധനവുണ്ടായി. ഞരമ്പുകളിലേക്ക് മയക്കുമരുന്ന് കുത്തിവെച്ചതിനെ തുടർന്നുള്ള എച്ച്‌ഐവി കേസുകൾ ഫിജിയിൽ റിപ്പോർട്ട് ചെയ്യപ്പെട്ടിട്ടുണ്ട്. മയക്കുമരുന്ന് ഉപയോഗത്തോടൊപ്പം ലൈംഗിക ബന്ധത്തിൽ ഏർപ്പെടുന്ന ‘കെംസെക്‌സ്’ (Chemsex) രീതിക്കൊപ്പം ബ്ലൂടൂത്തിങും വ്യാപകമാകുന്നുണ്ടെന്ന് ഫിജി മിനിസ്ട്രി ഓഫ് ഹെൽത്ത് ആന്റ് മെഡിക്കൽ സർവീസസ് കണ്ടെത്തി.
ലഹരിമരുന്നിന്റെ ലഭ്യത കുറയുന്നതും വില വർധിക്കുന്നതുമാണ് ഇത്തരം രീതികൾക്ക് പിന്നിലെ പ്രധാന കാരണം. ലഹരി എടുത്ത ഒരാളുടെ രക്തം ഉപയോഗിച്ച് കൂടുതൽ പേർക്ക് ലഹരി അനുഭവിക്കാൻ കഴിയും. ഒരേ സിറിഞ്ച് തന്നെ ഒന്നിലധികം പേർ കുത്തിവെപ്പിനായി ഉപയോഗിക്കുന്നത് എച്ച്‌ഐവി പോലുള്ള രോഗങ്ങൾ വ്യാപിക്കാൻ പ്രധാന കാരണമാകുന്നു.
ബ്ലൂടൂത്തിങ് എന്ന ഈ മാരകമായ ലഹരി ഉപയോഗ രീതി യുവാക്കളുടെ ആരോഗ്യത്തെയും സാമൂഹിക ജീവിതത്തെയും തകർക്കുന്ന ഒരു വിപത്താണ്. മരുന്നുകളുടെ ലഭ്യതക്കുറവും വിലവർധനവും ഈ പ്രവണതയ്ക്ക് ആക്കം കൂട്ടുന്നു. ഈ അപകടകരമായ ട്രെൻഡിനെ ചെറുക്കാൻ അടിയന്തിരമായി ബോധവൽക്കരണവും കർശനമായ നിയന്ത്രണങ്ങളും ആരോഗ്യ സംരക്ഷണ പദ്ധതികളും ആവശ്യമാണ്.
Tag: ‘Bluetoothing’ or ‘hotspotting’; Youth seeking new levels of drug use
