നടി ശ്വേതാ മേനോന് എതിരായ കേസ്; തുടര്‍നടപടികള്‍ ഹൈക്കോടതി താത്കാലികമായി തടഞ്ഞു

നടി ശ്വേതാ മേനോന് എതിരായ കേസിലെ തുടര്‍നടപടികള്‍ ഹൈക്കോടതി താത്കാലികമായി തടഞ്ഞു. കേസില്‍ ശ്വേതാ മേനോന്‍ സമര്‍പ്പിച്ച ഹര്‍ജി പരിഗണിച്ചായിരുന്നു ഹൈക്കോടതിയുടെ ഇടപെടല്‍. പ്രഥമദൃഷ്ട്യാ ശ്വേതാ മേനോൻ കോടതിയിൽ ഉന്നയിച്ച വാദങ്ങള്‍ക്ക് നിലനില്‍പുണ്ടെന്ന് കണ്ടെത്തിയ ജസ്റ്റിസ് വി.ജി. അരുണിന്റെ സിംഗിൾ ബെഞ്ച്, കേസ് രജിസ്റ്റര്‍ ചെയ്യാന്‍ കാരണമായ സി.ജെ.എം. കോടതിയുടെ നിര്‍ദ്ദേശവുമായി ബന്ധപ്പെട്ട റിപ്പോർട്ട് തേടിയിട്ടുണ്ട്.

അശ്ലീല സിനിമകളില്‍ അഭിനയിച്ചതിനെ കുറിച്ച് ആരോപണമുയര്‍ന്നതിനെ തുടര്‍ന്നാണ് ശ്വേതാ മേനോന്‍ ഹൈക്കോടതിയെ സമീപിച്ചത്. താന്‍ അഭിനയിച്ച എല്ലാ സിനിമകള്‍ക്കും സെന്‍സര്‍ സര്‍ട്ടിഫിക്കറ്റ് ലഭിച്ചതാണെന്നും, നിലവിലുള്ള നിയമപ്രകാരമാണ് അഭിനയമെന്നും ഹര്‍ജിയില്‍ ശ്വേതാ അറിയിച്ചു. മജിസ്ട്രേറ്റ് കോടതിയുടെ നിര്‍ദ്ദേശത്തിലും തള്ളപ്പെടേണ്ട വീഴ്ചകളുണ്ടെന്നുമാണ് അവര്‍ വാദിച്ചത്.

കേസ് അന്വേഷിക്കേണ്ടതുള്ളതിന്റെ അടിസ്ഥാനത്തില്‍ മജിസ്ട്രേറ്റ് കോടതിയില്‍ നിന്നുള്ള രേഖകള്‍ സമര്‍പ്പിക്കാന്‍ ഹൈക്കോടതി രജിസ്‌ട്രാറിന് ജസ്റ്റിസ് വി.ജി. അരുണ്‍ നിര്‍ദേശം നല്‍കി.

Tag: Case against actress Shweta Menon; High Court temporarily stays further proceedings