ഭാരത് രാഷ്ട്ര സമിതി (ബിആർഎസ്) അധ്യക്ഷനും മുൻ മുഖ്യമന്ത്രിയുമായ കെ. ചന്ദ്രശേഖര റാവു (കെ.സി.ആർ) തന്റെ മകൾ കൂടിയായ പാർട്ടി എംഎൽസി കെ. കവിതയെ പാർട്ടിയിൽ നിന്ന് പുറത്താക്കി. പാർട്ടി വിരുദ്ധ പ്രവർത്തനങ്ങളിൽ തുടർച്ചയായി ഏർപ്പെട്ടുവെന്നാരോപിച്ചാണ് നടപടി സ്വീകരിച്ചതെന്ന് ബിആർഎസ് ഔദ്യോഗിക പ്രസ്താവനയിൽ അറിയിച്ചു.
പാർട്ടിക്കെതിരെ നിരന്തരം വിമർശനങ്ങൾ ഉന്നയിക്കുകയും, നേതൃത്വത്തിനെതിരെ തുറന്നുപറയുകയും ചെയ്ത കവിതയുടെ സമീപകാല നടപടികൾ പാർട്ടിക്ക് ഗൗരവകരമായ തിരിച്ചടിയാണ് സൃഷ്ടിച്ചത്. ഇതിനെ തുടർന്നാണ് പാർട്ടി സസ്‌പെൻഷനും പുറത്താക്കലും ഉൾപ്പെടെയുള്ള കടുത്ത തീരുമാനങ്ങൾ എടുത്തതെന്ന് ബിആർഎസ് വ്യക്തമാക്കി.
കവിത കെ.സി.ആറിന് നേരത്തെ കത്തെഴുതി, നിരവധി വിഷയങ്ങളിൽ പാർട്ടി മൗനം പാലിക്കുന്നതിനെതിരെ അസന്തോഷം രേഖപ്പെടുത്തിയിരുന്നു. കൂടാതെ, കെ.ടി.ആർ.യുടെ നേതൃത്വത്തെ പരസ്യമായി ചോദ്യം ചെയ്തതും പ്രശ്നങ്ങൾ രൂക്ഷമാക്കിയിരുന്നു. ഇക്കഴിഞ്ഞ ദിവസം കവിത ആരംഭിച്ച ‘തെലങ്കാന ജാഗ്രതി’യുടെ പുതിയ ഓഫീസ്, അവരെ പാർട്ടിയിൽ നിന്ന് കൂടുതൽ അകറ്റുന്ന നടപടിയായിരുന്നു.
കുറച്ചുകാലമായി പാർട്ടിയിൽ നിന്ന് കവിതയെ പുറത്താക്കുമെന്ന അഭ്യൂഹങ്ങൾ ഉയർന്നിരുന്നുവെങ്കിലും, കെ.സി.ആറിന്റെ തീരുമാനത്തോടെ അതിന് അന്തിമരൂപം ലഭിച്ചു.
Tag: Chandrasekhara Rao expels daughter K. Kavitha from BRS
