നാമൊന്ന് നമുക്ക് രണ്ടല്ല, മൂന്ന് വരെയാകാം; നിയമം മാറ്റിയെഴുതി ചൈന

കുടുംബാസൂത്രണ നയത്തില്‍ ഇളവു വരുത്തി ചൈന.ദമ്ബതികള്‍ക്ക് മൂന്ന് കുട്ടികള്‍ വരെ ഉണ്ടായിരിക്കാമെന്നാണ് ചൈനയുടെ പുതിയ പ്രഖ്യാപനം.ജനന നിരക്കില്‍ വലിയ കുറവുണ്ടായതോടെയാണ്​ നയം മാറ്റത്തിലേക്ക്​ ചൈന കടന്നത്​.

പ്രായമേറിയ ജനവിഭാഗത്തിന്‍റെ എണ്ണം കൂടുന്നത്​ പരിഗണിച്ചാണ്​ നയം മാറ്റുന്നതെന്ന്​ ഔദ്യോഗിക മാധ്യമമായ സിന്‍ഹുവ റിപ്പോര്‍ട്ട്​ ചെയ്യുന്നു​. ഷീ ജിങ്​പിങ്ങിന്‍റെ അധ്യക്ഷതയില്‍ ചേര്‍ന്ന ചൈനീസ്​ കമ്യൂണിസ്റ്റ്​ പാര്‍ട്ടിയുടെ പോളിറ്റ്​ബ്യൂറോയിലാണ്​ തീരുമാനമുണ്ടായത്​.

1960കള്‍ക്ക്​ ശേഷമുള്ള ഏറ്റവും കുറഞ്ഞ ജനനനിരക്കാണ്​ കഴിഞ്ഞ മാസം ചൈനയില്‍ രേഖപ്പെടുത്തിയത്​. 2015ല്‍ ഒറ്റകുട്ടി നയത്തിലും ചൈന മാറ്റം വരുത്തിയിരുന്നു. 2010 മുതല്‍ 2020 വരെയുള്ള കാലയളവില്‍ 0.53 ശതമാനമാണ്​ ചൈനയിലെ ജനസംഖ്യ വളര്‍ച്ചാ നിരക്ക്​.