“കോട് ഇൻ പ്രൊവിഡൻസ്” ജഡ്ജി ഫ്രാങ്ക് കാപ്രിയോ അന്തരിച്ചു

ലോകമെമ്പാടുമുള്ള പ്രേക്ഷകരുടെ ഹൃദയം കീഴടക്കിയ റോഡ് ഐലൻഡ് മുനിസിപ്പൽ ജഡ്ജി ഫ്രാങ്ക് കാപ്രിയോ (88) അന്തരിച്ചു. ദീർഘകാലമായി പാൻക്രിയാറ്റിക് കാൻസറിന് ചികിത്സയിലായിരുന്ന അദ്ദേഹം, കഴിഞ്ഞ ആഴ്ച ആശുപത്രിയിൽ പ്രവേശിപ്പിക്കപ്പെട്ടിരുന്നു. മരണം അദ്ദേഹത്തിന്റെ കുടുംബം സാമൂഹ്യ മാധ്യമങ്ങളിലൂടെ സ്ഥിരീകരിച്ചു.

ദയയും അനുകമ്പയും നിറഞ്ഞ വിധികളിലൂടെ പ്രശസ്തനായ കാപ്രിയോ, സാധാരണ ട്രാഫിക് നിയമലംഘനങ്ങൾ പോലുള്ള കേസുകളിലും കരുണയോടെ സമീപിച്ചിരുന്നു. പലർക്കും പിഴ മാപ്പ് നൽകി, “നിയമം മാനവികതയോടെ നടപ്പാക്കാം” എന്ന സന്ദേശം അദ്ദേഹം ജീവിതത്തിലൂടെ പകർന്നു.

അദ്ദേഹത്തിന്റെ വീഡിയോകൾക്ക് 100 കോടിയിലധികം കാഴ്ചക്കാർ ഉണ്ടായിരുന്നു. കുട്ടികളോട് വിധി പറയാൻ ആവശ്യപ്പെടുന്ന രംഗങ്ങളും, ഒരു സ്ത്രീയുടെ മകന്റെ വിയോഗത്തെ തുടർന്ന് പിഴ ഒഴിവാക്കിയത് പോലുള്ള സംഭവങ്ങളും സോഷ്യൽ മീഡിയയിൽ വ്യാപകമായി ശ്രദ്ധ നേടി. കുറഞ്ഞ വരുമാനക്കാരെ സഹായിക്കുന്ന വിധികളും അദ്ദേഹത്തെ ലോകപ്രശസ്തനാക്കി.

2023-ൽ നാല് പതിറ്റാണ്ടിലധികം നീണ്ട സേവനത്തിന് ശേഷം അദ്ദേഹം ജഡ്ജി സ്ഥാനത്ത് നിന്ന് വിരമിച്ചിരുന്നു. ആരോഗ്യനില വഷളായപ്പോൾ, “എനിക്കായി പ്രാർത്ഥിക്കണം” എന്ന് അഭ്യർത്ഥിച്ച് അദ്ദേഹം അടുത്തിടെ വീഡിയോ സന്ദേശവും പങ്കുവച്ചിരുന്നു.

റോഡ് ഐലൻഡ് ഗവർണർ ഡാൻ മക്കീ അടക്കമുള്ള പ്രമുഖർ അനുശോചനം രേഖപ്പെടുത്തി. “അദ്ദേഹം ഒരു ജഡ്ജി മാത്രമല്ല, അനുകമ്പയുടെ പ്രതീകവുമായിരുന്നു” എന്ന് ഗവർണർ പറഞ്ഞു. കുടുംബത്തിന്റെ കുറിപ്പിൽ, അദ്ദേഹം “സ്നേഹനിധിയായ ഭർത്താവ്, പിതാവ്, മുത്തച്ഛൻ, സുഹൃത്ത്” ആയിരുന്നുവെന്ന് ഓർത്തു.

Tag:“Cote in Providence” Judge Frank Caprio Dies