ശസ്ത്രക്രിയാ ഉപകരണങ്ങൾ തിരിച്ചെടുത്തതോടെ മെഡിക്കൽ കോളേജുകളിൽ പ്രതിസന്ധി; 158 കോടി രൂപ കുടിശിക

സംസ്ഥാനത്തെ മെഡിക്കൽ കോളേജുകളും സർക്കാർ ആശുപത്രികളും ശസ്ത്രക്രിയാ ഉപകരണങ്ങളുടെ ഗുരുതരമായ ക്ഷാമം നേരിടുന്നു. അടിയന്തര ശസ്ത്രക്രിയാ ഉപകരണങ്ങൾ വിതരണം ചെയ്തതിന്റെ 158 കോടി രൂപ കുടിശിക ലഭിക്കാത്തതിനാൽ വിതരണ കമ്പനികൾ ഉപകരണങ്ങൾ തിരികെ വാങ്ങിത്തുടങ്ങി.

ഹൃദയ ശസ്ത്രക്രിയകൾ ഉൾപ്പെടെ നിരവധി അടിയന്തര ശസ്ത്രക്രിയകൾ നിലച്ചതോടെ നിരവധിയാളുകൾ ചികിത്സയ്ക്ക് കാത്തിരിക്കുകയാണ്. കോട്ടയം മെഡിക്കൽ കോളേജിൽ ഹൃദയ ശസ്ത്രക്രിയയ്ക്കായി ആവശ്യമായ സ്റ്റെന്റുകളും അനുബന്ധ ഉപകരണങ്ങളും ഇതിനകം തന്നെ കമ്പനികൾ തിരികെ എടുത്തു തുടങ്ങി. ഈ ഉപകരണങ്ങളുടെ മൂല്യം നാലുകോടിയിലധികം രൂപ വരും. കുടിശിക പരിഹരിക്കാത്ത പക്ഷം തിരിച്ചെടുക്കൽ നടപടി മറ്റു കോളേജുകളിലും വ്യാപിക്കാനുള്ള സാധ്യതയുണ്ട്.

തിരുവനന്തപുരം, കോഴിക്കോട് മെഡിക്കൽ കോളേജുകൾക്കും എറണാകുളം ജനറൽ ആശുപത്രിക്കും നേരെ സമാന നടപടി പരിഗണിക്കുകയാണ് വിതരണക്കാർ. 18 മാസമായി കുടിശ്ശിക തീർന്നിട്ടില്ല, അതിൽ മാത്രം രണ്ടുമാസത്തേക്കുള്ള തുകയാണ് ആരോഗ്യവകുപ്പ് ഇതുവരെ നൽകിയത്. കഴിഞ്ഞ ആഴ്ചയോടെ കുടിശ്ശിക തീർക്കാമെന്ന് ആരോഗ്യവകുപ്പ് ഉറപ്പുനൽകിയിരുന്നെങ്കിലും അത് നടപ്പായില്ല.

കോടികളിൽ കണക്കാക്കാവുന്ന കുടിശ്ശിക മൂലം സ്വകാര്യ കമ്പനികൾ കഴിഞ്ഞ മാസം മുതൽ ഉപകരണ വിതരണം നിർത്തിയിരിക്കുകയാണ്. സംസ്ഥാനത്തെ 21 ആശുപത്രികളിൽ നിന്നായി 158 കോടി രൂപയുടെ കുടിശ്ശിക ആണ് റിപ്പോർട്ട് ചെയ്തിരിക്കുന്നത്. തിരുവനന്തപുരം മെഡിക്കൽ കോളേജുമായി നടത്തിയ ചർച്ചയിൽ പത്തുദിവസം കൂടി സമയം അനുവദിച്ചതിനെ തുടർന്ന് അവിടെ നിന്ന് ഉപകരണങ്ങൾ തിരികെ എടുത്തിട്ടില്ല.

കുടിശ്ശിക തീർക്കാത്ത പക്ഷം ഉപകരണങ്ങൾ പിന്‍വലിക്കുമെന്നും, ചേംബർ ഓഫ് ഡിസ്‌ട്രിബ്യൂട്ടേഴ്‌സ് ഓഫ് മെഡിക്കൽ ഇംപ്ലാൻറ്സ് ആൻഡ് ഡിസ്പോസിബിൾസ് വ്യക്തമാക്കിയിട്ടുണ്ട്. സെപ്റ്റംബറിലേ സംഘടന മെഡിക്കൽ കോളേജ് സൂപ്രണ്ടുമാർക്കും ആശുപത്രി മേധാവികൾക്കും കത്ത് നൽകി, ഒക്ടോബർ 5നുള്ളിൽ കുടിശ്ശിക തീർക്കണമെന്ന് ആവശ്യപ്പെട്ടിരുന്നു. സർക്കാർ തുടർന്ന് 15 ദിവസത്തെ അധികസമയം ആവശ്യപ്പെട്ടെങ്കിലും, പുതുക്കിയ സമയപരിധിയും പാലിക്കാത്തതിനാലാണ് തിരിച്ചെടുക്കൽ നടപടി ആരംഭിച്ചത്.

സംഘടനാ ഭാരവാഹികളുടെ ആരോപണമനുസരിച്ച്, മെഡിക്കൽ കോളേജുകളിൽ നിലവിലുള്ള ഉപകരണങ്ങളുടെ പട്ടിക അധികൃതർ നൽകാൻ തയ്യാറല്ല. കുടിശ്ശികയിൽ ഏറ്റവും കൂടുതൽ ബാധിതരായിരിക്കുന്നത് തിരുവനന്തപുരം (11 കോടി)യും കോഴിക്കോട് (8 കോടി)യും മെഡിക്കൽ കോളേജുകളാണ്. അന്ന് ഉപകരണങ്ങൾ തിരിച്ചെടുക്കില്ലെന്നുറപ്പു തന്നിരുന്ന വിതരണ ഏജൻസികൾ ഇപ്പോൾ നടപടി ശക്തമാക്കുകയാണ്.

Tag: Crisis in medical colleges after surgical equipment was taken back; Rs 158 crore outstanding