ഡിവൈഎഫ്ഐ നേതാവ് ജോയലിന്റെ മരണം; ‍ സിപിഐഎം നേതാക്കളുടെ പങ്കിനെക്കുറിച്ച് ആവർത്തിച്ച് കുടുംബം

അടൂരിലെ ഡിവൈഎഫ്ഐ നേതാവ് ജോയലിന്റെ മരണവുമായി ബന്ധപ്പെട്ട സിപിഐഎം നേതാക്കളുടെ പങ്കിനെക്കുറിച്ചുള്ള ആരോപണം വീണ്ടും പാർട്ടിക്കുള്ളിൽ ചർച്ചയായി മാറുകയാണ്. തട്ടിപ്പ് കേസിൽ മുതിർന്ന നേതാക്കളുടെ പേര് പുറത്തുവരാതിരിക്കാൻ പൊലീസിനെ പ്രയോഗിച്ച് ജോയലിനെ കസ്റ്റഡിയിൽ ക്രൂരമായി മർദ്ദിച്ചുവെന്നാണ് കുടുംബത്തിന്റെ ആവർത്തിച്ചുള്ള ആരോപണം. ജില്ലാ തലത്തിലെ ചില നേതാക്കളും സംശയനിഴലിൽ ആകുന്ന സാഹചര്യത്തിൽ സംസ്ഥാന നേതൃത്വം ഇടപെടണമെന്ന് പാർട്ടിക്കുള്ളിൽ നിന്നുള്ളൊരു വിഭാഗം ആവശ്യപ്പെടുന്നു.

ജോയലും പാർട്ടിയുമായി ബന്ധമില്ലെന്ന അടൂർ ഏരിയ സെക്രട്ടറിയുടെ നിലപാട് കുടുംബം തെളിവുകൾ സഹിതം തള്ളി. “ജോയൽ പൂർണ്ണമായും പാർട്ടിയിലേയ്ക്കു ചേർന്നവനായിരുന്നു,” എന്ന് കുടുംബം വ്യക്തമാക്കി. 2020-ൽ ജോയൽ അടൂർ പൊലീസിന്റെ കസ്റ്റഡി മർദ്ദനത്തിന് ഇരയായി മരിച്ചതാണെന്ന് അവർ ആരോപിക്കുന്നു. തട്ടിപ്പ് കേസിൽ അറസ്റ്റിലായ സിപിഎം വനിതാ നേതാവിന്റെ ഫോൺ രേഖകളിൽ നിന്ന് അടൂരിലെ പ്രധാന സിപിഎം നേതാക്കളിലേക്ക് ബന്ധങ്ങൾ തെളിഞ്ഞെങ്കിലും തുടർ അന്വേഷണം തടയപ്പെട്ടുവെന്നാണ് ആരോപണം. കോടികൾ ഉൾപ്പെട്ട തട്ടിപ്പ് പുറത്തുവരുമെന്ന ഭയമാണ് ജോയലിനെ പൊലീസ് വഴി ലക്ഷ്യമാക്കാൻ കാരണമായതെന്നും കുടുംബം പറയുന്നു.

2020-ലേ തന്നെ കുടുംബം സിപിഎം സംസ്ഥാന നേതൃത്വത്തിനും ആഭ്യന്തര വകുപ്പിനുമെതിരെ പരാതി നൽകിയിരുന്നെങ്കിലും അന്വേഷണങ്ങൾ അട്ടിമറിക്കപ്പെട്ടു. ഇപ്പോഴിതാ, അനധികൃത സമ്പാദ്യവുമായി ബന്ധപ്പെട്ട് അടൂരിലെ പ്രമുഖ സിപിഎം നേതാക്കൾക്കെതിരെ സംസ്ഥാന സെക്രട്ടറിക്ക് നൽകിയ പല പരാതികളും പാർട്ടി തലത്തിൽ അടച്ചു വച്ചിരിക്കുകയാണെന്ന് പുറത്തുവരുന്നു. ചില കേസുകളിൽ അന്വേഷണം ആരംഭിച്ചിട്ടുണ്ടെങ്കിലും കമ്മീഷൻ റിപ്പോർട്ടുകൾ മറച്ചുവച്ചുവെന്നാണ് ആരോപണം.

ജോയലിന്റെ കുടുംബം വീണ്ടും ആരോപണങ്ങൾ ശക്തമാക്കുമ്പോൾ, മറുവിഭാഗം നേതാക്കൾ സംസ്ഥാന നേതൃത്വത്തിന് ഔദ്യോഗികമായി വീണ്ടും പരാതി നൽകാനുള്ള തയ്യാറെടുപ്പിലാണ്. ഇതോടെ, ആഭ്യന്തര വകുപ്പിനൊപ്പം സിപിഎം സംസ്ഥാന നേതൃത്വവും പ്രതിരോധത്തിലാകുന്ന അവസ്ഥയാണ് രൂപപ്പെടുന്നത്.

Tag: Death of DYFI leader Joel; Family reiterates role of CPM leaders