തിരഞ്ഞെടുപ്പ് പ്രവർത്തനങ്ങളിൽ വീഴ്ച, തനിഷ്ടപ്രകാരം വിനിയോ​ഗം, ജി സുധാകരനെതിരായ അച്ചടക്ക നടപടി; പാർട്ടി രേഖ പുറത്ത്

മുതിർന്ന സിപിഐഎം നേതാവ് ജി. സുധാകരനെതിരെ എടുത്ത അച്ചടക്കനടപടിയുമായി ബന്ധപ്പെട്ടുള്ള പാർട്ടി റിപ്പോർട്ട് പുറത്ത്. 2021ലെ നിയമസഭാ തിരഞ്ഞെടുപ്പിനിടെ തിരഞ്ഞെടുപ്പ് പ്രവർത്തനങ്ങളിൽ വീഴ്ചയും ഫണ്ട് തനിഷ്ടപ്രകാരം വിനിയോഗിച്ചതുമാണ് രേഖയിൽ ചൂണ്ടിക്കാട്ടിയ പ്രധാന ആരോപണങ്ങൾ. ഉയർന്ന അച്ചടക്കനടപടി ആവശ്യമാണ് എന്ന് സംസ്ഥാന കമ്മിറ്റി വിലയിരുത്തിയിരുന്നുവെങ്കിലും, ദീർഘകാല പാർട്ടി സേവനം പരിഗണിച്ച് പരസ്യ ശാസനയിൽ ഒതുക്കുകയായിരുന്നു.

നിയമസഭാ തിരഞ്ഞെടുപ്പിന് ശേഷം ജി. സുധാകരനെതിരെ നിരവധി പരാതികൾ ഉയർന്നതിനെ തുടർന്ന് പാർട്ടി അന്വേഷണ കമ്മീഷനെ രൂപീകരിച്ചിരുന്നു. കെ.ജെ. തോമസും എളമരം കരീമും അടങ്ങിയ കമ്മീഷൻ ജില്ലാ കമ്മിറ്റി മുതൽ ഏരിയ കമ്മിറ്റി വരെ പ്രവർത്തകരുടെ മൊഴി രേഖപ്പെടുത്തി. ഇതിന് പിന്നാലെയാണ് ഗുരുതരമായ ആരോപണങ്ങൾ ഉൾപ്പെട്ട അന്വേഷണം റിപ്പോർട്ട് സമർപ്പിച്ചത്, അതിന്റെ അടിസ്ഥാനത്തിലാണ് ഇപ്പോൾ പുറത്തുവന്ന പാർട്ടി രേഖയും.

അമ്പലപ്പുഴ മണ്ഡലത്തിന് മതിയായ തുക അനുവദിച്ചില്ല, അതിനാൽ തിരഞ്ഞെടുപ്പ് പ്രവർത്തനങ്ങൾക്ക് പലിശയ്ക്ക് പണം കടമെടുക്കേണ്ടി വന്നു എന്ന് രേഖ ചൂണ്ടിക്കാട്ടുന്നു. മനപ്പൂർവമായ വീഴ്ചയാണ് സുധാകരന്റെ ഭാഗത്ത് നിന്നുണ്ടായതെന്ന് പാർട്ടി രേഖ വ്യക്തമാക്കുന്നു. സ്ഥാനാർത്ഥി എച്ച്. സലാം എസ്ഡിപിഐ അനുകൂല സ്ഥാനാർത്ഥിയാണെന്ന പ്രചാരണത്തിനെതിരെ സുധാകരൻ പ്രതികരിക്കാതിരുന്നതും രേഖയിൽ വിമർശിക്കപ്പെട്ടിട്ടുണ്ട്.

മണ്ഡല ചുമതലക്കാരനെന്ന നിലയിൽ ഉത്തരവാദിത്വം നിറവേറ്റാനാകാതിരിക്കുകയും തിരഞ്ഞെടുപ്പ് ഫലത്തെ ബാധിക്കുന്ന നിലപാടുകൾ സ്വീകരിക്കുകയും ചെയ്തുവെന്ന വിലയിരുത്തലും റിപ്പോർട്ടിൽ ഉണ്ട്. പാർട്ടി ഭരണഘടന പ്രകാരം കർശനമായ അച്ചടക്ക നടപടി വേണമെന്നായിരുന്നു സംസ്ഥാന കമ്മിറ്റിയുടെ ആദ്യനിലപാട്, എന്നാൽ സുധാകരന്റെ ദീർഘകാല പാർട്ടി സേവനം പരിഗണിച്ച് അതിനെ പരസ്യ ശാസനയിലേക്ക് പരിമിതപ്പെടുത്തി.

അന്വേഷണ റിപ്പോർട്ട് സംസ്ഥാന സമിതി മുന്നിൽ അവതരിപ്പിക്കുമ്പോൾ സുധാകരന് തന്റെ പക്ഷം വിശദീകരിക്കാനുള്ള അവസരവും നൽകിയതായി രേഖ വ്യക്തമാക്കുന്നു.

Tag: Disciplinary action against G Sudhakaran for lapses in election activities, arbitrary use of funds; Party document released