മുഖ്യമന്ത്രിയുടെ മകന് ഇ.ഡി സമൻസ് അയച്ചത് എസ്.എൻ.സി. ലാവലിൻ കേസുമായി ബന്ധപ്പെട്ടെന്ന് വിവരം

മുഖ്യമന്ത്രി പിണറായി വിജയന്റെ മകൻ വിവേക് കിരണിന് എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) അയച്ച സമൻസ് എസ്.എൻ.സി. ലാവലിൻ കേസുമായി ബന്ധപ്പെട്ടതാണെന്ന വിവരം പുറത്തുവന്നു. 2023-ലാണ് ഇ.ഡി വിവേകിന് സമൻസ് അയച്ചത്. ക്രൈം നന്ദകുമാർ നൽകിയ പരാതിയുടെ അടിസ്ഥാനത്തിലാണ് അന്വേഷണം ആരംഭിച്ചത്. ലാവലിൻ കമ്പനിയുടെ ഡയറക്ടറായിരുന്ന ദിലീപ് രാഹുലൻ, വിവേക് കിരണിന്റെ വിദേശവിദ്യാഭ്യാസത്തിനായി പണം നൽകിയെന്ന വിവരം ലഭിച്ചതിനെ തുടർന്നായിരുന്നു സമൻസ് അയച്ചത്. എന്നാൽ വിവേക് ഹാജരായിരുന്നില്ല.

കള്ളപ്പണം വെളുപ്പിക്കൽ കേസുമായി ബന്ധപ്പെട്ട് ഹാജരാകാനായി അയച്ച സമൻസിന്റെ രേഖകളും പിന്നീട് പുറത്തുവന്നു. “സൺ ഓഫ് പിണറായി വിജയൻ, ക്ലിഫ് ഹൗസ്” എന്ന് വിലാസം രേഖപ്പെടുത്തി 2023-ലാണ് സമൻസ് അയച്ചത്. നേരത്തെ വടക്കാഞ്ചേരി ലൈഫ് മിഷൻ ഭവന പദ്ധതിയിലെ ക്രമക്കേട് അന്വേഷിക്കുന്നതിനോടനുബന്ധിച്ചാണ് സമൻസ് അയച്ചതെന്ന് റിപ്പോർട്ടുകളുണ്ടായിരുന്നു. അന്ന് കൊച്ചിയിലെ ഇ.ഡി അസിസ്റ്റന്റ് ഡയറക്ടർ പി. കെ. ആനന്ദാണ് നടപടിയെടുത്തത്.

2023 ഫെബ്രുവരി 14-ന് രാവിലെ 10.30-ന് കൊച്ചിയിലെ ഇ.ഡി ഓഫിസിൽ ഹാജരാകാനായിരുന്നു നിർദേശം. 2020-ൽ ലാവലിൻ കേസുമായി ബന്ധപ്പെട്ട് ഇ.ഡി എൻഫോഴ്‌സ്‌മെന്റ് കേസ് ഇൻഫർമേഷൻ റിപ്പോർട്ട് (ഇ.സി.ഐ.ആർ) രജിസ്റ്റർ ചെയ്തിരുന്നു. കള്ളപ്പണം വെളുപ്പിക്കൽ നിരോധന നിയമപ്രകാരം എടുത്ത നടപടിയായിരുന്നു അത്. ദിലീപ് രാഹുലൻ, മുഖ്യമന്ത്രിയുടെ മകന്റെ യു.കെ.യിലെ വിദ്യാഭ്യാസത്തിനായി വലിയ തുക ചെലവഴിച്ചുവെന്ന മൊഴിയും ഇ.സി.ഐ.ആറിൽ ഉൾപ്പെടുത്തിയിട്ടുണ്ട്. ഈ മൊഴിയിലെ വിവരങ്ങൾ പരിശോധിക്കുന്നതിനും കൂടുതൽ വിശദാംശങ്ങൾ മനസ്സിലാക്കുന്നതിനുമാണ് വിവേകിന് സമൻസ് അയച്ചതെന്നാണ് റിപ്പോർട്ടുകൾ. പിന്നീട് ഇതുമായി ബന്ധപ്പെട്ട് തുടർനടപടികളൊന്നും ഉണ്ടായിരുന്നില്ല.

പന്നിയാർ, ചെങ്കുളം, പള്ളിവാസൽ എന്നീ ജലവൈദ്യുത പദ്ധതികളുടെ നവീകരണത്തിന് കാനഡയിലെ എസ്.എൻ.സി. ലാവലിൻ കമ്പനിയുമായി കരാറുണ്ടാക്കുന്നതിൽ ക്രമക്കേടുണ്ടായെന്നും ഇതുവഴി സംസ്ഥാനത്തിന് 86.25 കോടിയോളം രൂപയുടെ നഷ്ടം സംഭവിച്ചുവെന്നുമാണ് കേസ്. കരാർ ലാവലിന് നൽകിയത് സംസ്ഥാനത്തിന് ആകെ 374 കോടിയോളം രൂപയുടെ നഷ്ടമുണ്ടാക്കിയെന്നുമാണ് പ്രധാന ആരോപണം. ലാവലിൻ കമ്പനിയുമായി അന്തിമ കരാർ ഒപ്പിട്ടത് അന്നത്തെ വൈദ്യുതമന്ത്രിയായ പിണറായി വിജയനാണ്.

Tag: ED summons CM’s son in connection with SNC Lavalin case