തിരുവനന്തപുരം മെഡിക്കൽ കോളേജിലെ ഉപകരണക്ഷാമം; ഡോ. ഹാരിസ് ചിറയ്ക്കലിന്റെ വെളിപ്പെടുത്തലിനോട് യോജിച്ച് നാല് വകുപ്പ് മേധാവികൾ

തിരുവനന്തപുരം മെഡിക്കൽ കോളേജ് ആശുപത്രിയിലെ യൂറോളജി വിഭാഗം മേധാവി ഡോ. ഹാരിസ് ചിറയ്ക്കൽ ഉന്നയിച്ച ആരോപണങ്ങൾക്കും ആശങ്കകൾക്കും ശക്തമായ പിന്തുണയാണ് നാല് വകുപ്പ് മേധാവികൾ നൽകിയിരിക്കുന്നത്. ന്യൂറോളജി, ഗാസ്ട്രോഎന്ററോളജി, നെഫ്രോളജി, ന്യൂറോസർജറി വിഭാഗങ്ങളിലെ മേധാവികളാണ് ഹാരിസ് ചിറയ്ക്കലിന്റെ നിലപാടിനോട് യോജിപ്പ് അറിയിച്ചത്.

ആശുപത്രിയിലെ ശസ്ത്രക്രിയാ ഉപകരണങ്ങൾ വാങ്ങുന്ന സർക്കാർ സംവിധാനം തെറ്റായതാണ് പ്രധാന പ്രശ്നമെന്ന് വിദഗ്ധ സമിതിക്ക് മുന്നിൽ വകുപ്പ് മേധാവികൾ വ്യക്തമാക്കി. ഉപകരണങ്ങൾ പലപ്പോഴും തകരാറിലാകുന്നത് മൂലം ശസ്ത്രക്രിയ മാറ്റിവയ്ക്കേണ്ടി വരുന്ന സാഹചര്യമുണ്ടെന്നും, വാങ്ങൽ നടപടികളിലെ കാലതാമസം രോഗികൾക്ക് നേരിട്ട് ബാധിക്കുന്നുവെന്നും റിപ്പോർട്ടിൽ ചൂണ്ടിക്കാട്ടുന്നു.

യൂറോളജി വിഭാഗത്തിന് ആവശ്യമായ ലിത്തോക്ലാസ്റ്റ് പ്രോബിന്റെ ലഭ്യതക്കുറവാണ് ഹാരിസ് ചിറയ്ക്കൽ ആദ്യമായി തുറന്നുപറഞ്ഞത്. 2024 ഡിസംബർ 19-ന് അദ്ദേഹം മെഡിക്കൽ കോളേജ് സൂപ്രണ്ടിന് കത്ത് നൽകി. ഒരു ലക്ഷം രൂപവരെ വിലയുള്ള ഉപകരണങ്ങൾ വാങ്ങാൻ സൂപ്രണ്ടിന് അധികാരം ഉണ്ടെങ്കിലും, ഹാരിസിന്റെ ആവശ്യം കളക്ടറുടെ പരിഗണനയ്ക്കായി കൈമാറുകയായിരുന്നു. അതിനുശേഷം നടപടി നടന്നത് 2025 ജൂൺ 23-നാണ്. അതായത്, ഒരു ഉപകരണം വാങ്ങുന്നതിന് ആറുമാസത്തിലധികം വൈകുന്നുവെന്നാണ് റിപ്പോർട്ട് ചൂണ്ടിക്കാണിക്കുന്നത്.

വിദഗ്ധ സമിതിയുടെ റിപ്പോർട്ട് അനുസരിച്ച്, ചിലപ്പോൾ ശസ്ത്രക്രിയാ ഉപകരണങ്ങൾ വാങ്ങാൻ രോഗികളിൽ നിന്ന് തന്നെ പണം പിരിച്ചെടുത്തിട്ടുണ്ട്. നാല് ആയിരം രൂപവരെ രോഗികൾ നൽകിയതായും, കാരുണ്യ പദ്ധതിക്ക് കീഴിലെ രോഗികളും പണം നല്‍കേണ്ടി വന്നിട്ടുണ്ടെന്നും റിപ്പോര്‍ട്ടില്‍ വ്യക്തമാക്കുന്നു. രോഗികളുടെ മൊഴിയില്‍ നിന്നാണ് വിദഗ്ധ സമിതി ഈ നിഗമനത്തില്‍ എത്തിയത്.

ഉപകരണക്ഷാമത്തെക്കുറിച്ച് പരിഹാരം ലഭിക്കാത്ത സാഹചര്യത്തിലാണ് ഹാരിസ് ചിറയ്ക്കൽ ഫേസ്ബുക്കിൽ തുറന്നെഴുതിയത്. “ആശുപത്രിയിൽ ഗുരുതര രോഗികൾ കാത്തിരിക്കുമ്പോഴും ബ്യൂറോക്രസിയുടെ മതിൽ മുമ്പിൽ തന്നെ നില്ക്കുകയാണ്” എന്നായിരുന്നു അദ്ദേഹത്തിന്റെ വിമർശനം. പോസ്റ്റ് വൈറലായതോടെ വിവാദം ശക്തമായി, പിന്നീട് അദ്ദേഹം കുറിപ്പ് പിന്‍വലിച്ചുവെങ്കിലും, മാധ്യമങ്ങളെ കണ്ടപ്പോൾ തന്റെ നിലപാടിൽ ഉറച്ചുനിൽക്കുന്നതായി വ്യക്തമാക്കി.

ഡിഎംഇയുടെ മറുപടിയും സർക്കാരിന്റെ ഇടപെടലും വിവാദം പൊട്ടിപ്പുറപ്പെട്ടതോടെ ഡയറക്ടറേറ്റ് ഓഫ് മെഡിക്കൽ എജ്യുക്കേഷൻ (ഡിഎംഇ) രംഗത്തെത്തി. ഹാരിസിന്റെ പ്രതികരണം “വൈകാരികമായത്” മാത്രമാണെന്നും, ഒരു ഉപകരണത്തിലെ തകരാറിനാൽ വെറും ഒരു ശസ്ത്രക്രിയ മാത്രമേ മാറ്റിവെച്ചിട്ടുള്ളൂ എന്നും ഡിഎംഇ അറിയിച്ചു. അതേസമയം, ആരോഗ്യവകുപ്പ് മന്ത്രി വീണാ ജോർജ് വിഷയത്തിൽ പ്രതികരിച്ചു. സംഭവം സർക്കാരിന്റെ ശ്രദ്ധയിൽപ്പെട്ടിട്ടില്ലെന്നും, സമഗ്ര അന്വേഷണം നടത്താൻ നിർദ്ദേശം നൽകിയിട്ടുണ്ടെന്നും മന്ത്രി വ്യക്തമാക്കി. ഉപകരണക്ഷാമവും വൈകുന്ന വാങ്ങൽ നടപടികളും രോഗികളുടെ ചികിത്സയെ നേരിട്ട് ബാധിക്കുന്നുവെന്ന വിദഗ്ധ സമിതി കണ്ടെത്തൽ.

Tag: Equipment shortage at Thiruvananthapuram Medical College; Four department heads agree with Dr. Harris Chirakkal’s revelation