ഓൺലൈൻ മദ്യവിൽപ്പന സംബന്ധിച്ച് സർക്കാർ ഇതുവരെ തീരുമാനമെടുത്തിട്ടില്ലെന്ന് എക്സൈസ് മന്ത്രി

ഓൺലൈൻ മദ്യവിൽപ്പന സംബന്ധിച്ച് സർക്കാർ ഇതുവരെ തീരുമാനമെടുത്തിട്ടില്ലെന്ന് എക്സൈസ് മന്ത്രി എം.ബി. രാജേഷ് വ്യക്തമാക്കി. സർക്കാരിൽ നിന്ന് അടിയന്തരമായോ എടുത്തു ചാടുന്ന തരത്തിലോ തീരുമാനങ്ങൾ ഉണ്ടാകില്ലെന്നും, വരുമാനം വർദ്ധിപ്പിക്കുന്നതിന് മറ്റ് മാർഗങ്ങൾ പരിഗണിക്കേണ്ടിവരുമെന്നും അദ്ദേഹം പറഞ്ഞു.

കഴിഞ്ഞ നാല് വർഷത്തിനിടെ മദ്യവില കൂട്ടിയിട്ടില്ലെങ്കിലും, മറ്റ് പല സംസ്ഥാനങ്ങളും വില വർദ്ധിപ്പിച്ചിട്ടുണ്ടെന്ന് മന്ത്രി ചൂണ്ടിക്കാട്ടി. ഓൺലൈൻ മദ്യവിൽപ്പനയ്ക്ക് മുമ്പും പ്രൊപ്പോസലുകൾ ലഭിച്ചിരുന്നെങ്കിലും, തൽക്കാലം അത് പരിഗണിക്കേണ്ടതില്ലെന്നാണ് തീരുമാനമായത്. “വിവിധ പ്രൊപ്പോസലുകൾ വരാറുണ്ട്, എന്നാൽ അവയെല്ലാം ചർച്ച ചെയ്ത്, കാബിനറ്റ് അംഗീകരിച്ച മദ്യനയത്തിന്റെ പരിധിയിൽ നിന്നാണ് സർക്കാർ നടപടികൾ കൈക്കൊള്ളുന്നത്,” അദ്ദേഹം വ്യക്തമാക്കി. മറ്റ് സംസ്ഥാനങ്ങളിൽ ഇത്തരം പദ്ധതികൾക്ക് നേതൃത്വം നൽകുന്നവർ, ഇവിടെ നടപ്പാക്കുന്നതിൽ മടിക്കുന്നുവെന്നും എം.ബി. രാജേഷ് കൂട്ടിച്ചേർത്തു.

ഓൺലൈൻ മദ്യവിൽപ്പനയ്ക്കുള്ള വിശദമായ ശുപാർശ ബെവ്കോ എം.ഡി. ഹർഷിത അട്ടല്ലൂരി സർക്കാരിന് സമർപ്പിച്ചിരുന്നു. വരുമാനം 2000 കോടി രൂപ വർദ്ധിപ്പിക്കാനാണ് ബെവ്കോ ലക്ഷ്യമിടുന്നത്. ഇതിനായി ബെവ്കോ സ്വന്തം മൊബൈൽ ആപ്പ് പോലും വികസിപ്പിച്ചു. മദ്യവിൽപ്പനയ്ക്കായി സ്വിഗ്ഗിയടക്കമുള്ള ഓൺലൈൻ ഡെലിവറി പ്ലാറ്റ്‌ഫോമുകളും താത്പര്യം പ്രകടിപ്പിച്ചിട്ടുണ്ടെന്ന് ഹർഷിത അട്ടല്ലൂരി അറിയിച്ചു.

Tag: Excise Minister says government has not yet taken a decision on online liquor sales