വ്യാജ ഐഡി കാർഡ് കേസ്; രാഹുല്‍ മാങ്കൂട്ടത്തിലുമായി ബന്ധമുള്ള പ്രവർത്തകരുടെ വീടുകളിൽ ക്രൈംബ്രാഞ്ച് വ്യാപക പരിശോധന
വ്യാജ ഐഡി കാർഡ് കേസിൽ രാഹുല്‍ മാങ്കൂട്ടത്തിലുമായി ബന്ധമുള്ള പ്രവർത്തകരുടെ വീടുകളിൽ ക്രൈംബ്രാഞ്ച് വ്യാപക പരിശോധന നടത്തി. അടൂരിലെ വീടുകളിലാണ് പരിശോധന നടന്നത്. ഇന്ന് രാവിലെ പത്തു മണിയോടെ രണ്ട് അന്വേഷണ സംഘങ്ങളാണ് അടൂരിലെത്തി പരിശോധന നടത്തിയത്. കേസിൽ നാളെ ചോദ്യം ചെയ്യലിന് ഹാജരാകണമെന്ന് ആവശ്യപ്പെട്ട് ക്രൈംബ്രാഞ്ച് ഇതിനകം രാഹുലിന് നോട്ടീസ് നൽകിയിരുന്നു.
കെഎസ്യു ജില്ലാ സെക്രട്ടറി നൂബിന്‍ ബിനുവിന്റെ മൊബൈൽ ഫോൺ ക്രൈംബ്രാഞ്ച് ഏറ്റെടുത്തിട്ടുണ്ട്. മറ്റ് രണ്ടു പ്രവർത്തകരുടെ വീടുകളിലും പരിശോധന നടന്നു.
ഇതിനിടെ, ലൈംഗിക ആരോപണ കേസിൽ രാഹുല്‍ മാങ്കൂട്ടത്ത് എം.എല്‍.എയ്ക്കെതിരെ ക്രൈംബ്രാഞ്ച് ഇന്ന് മൊഴിയെടുക്കൽ നടപടികൾക്ക് തുടക്കം കുറിക്കുമെന്നാണ് സൂചന. അനുഭവങ്ങൾ തുറന്ന് പറഞ്ഞ റിനി ആൻ ജോർജ്, അവന്തിക, ഹണി ഭാസ്‌കരൻ തുടങ്ങിയവരുടെ മൊഴിയാണ് ആദ്യം രേഖപ്പെടുത്തുക. അന്വേഷണ ഉദ്യോഗസ്ഥനായ ക്രൈംബ്രാഞ്ച് ഡിവൈഎസ്പി ബിനുകുമാർ ഇന്നലെ പരാതിയുടെ വിശദാംശങ്ങൾ ശേഖരിച്ചിരുന്നു.
ഇപ്പോൾ വരെ മാധ്യമ റിപ്പോർട്ടുകളുടെ അടിസ്ഥാനത്തിലുള്ള ചില പരാതികൾ മാത്രമാണ് ക്രൈംബ്രാഞ്ചിന് ലഭ്യമെന്ന് അറിയുന്നു. രണ്ടുദിവസത്തിനകം മുഴുവൻ അന്വേഷണ സംഘാംഗങ്ങളെയും പ്രഖ്യാപിക്കുമെന്ന് പ്രതീക്ഷ. അന്വേഷണ ചുമതലയുള്ള എഡിജിപി എച്ച് വെങ്കിടേഷ് നേരിട്ട് മേൽനോട്ടം വഹിക്കും.
എം.എൽ.എയുടെ മോശം പെരുമാറ്റത്തിന് ഇരയായ സ്ത്രീകൾ നേരിട്ട് പരാതി നൽകാത്തത് കേസിന് വെല്ലുവിളിയായേക്കാമെന്ന വിലയിരുത്തലിലാണ് ക്രൈംബ്രാഞ്ച്. അതുകൊണ്ടുതന്നെ, അനുഭവങ്ങൾ പൊതുവിൽ തുറന്ന് പറഞ്ഞവരുടെ മൊഴി അടിയന്തരമായി രേഖപ്പെടുത്താൻ ക്രൈംബ്രാഞ്ച് തീരുമാനിച്ചിരിക്കുകയാണ്.
Tag: Fake ID card case; Crime Branch conducts extensive searches at the homes of activists linked to Rahul Mangkootatil
