സാമ്പത്തിക ബാധ്യത; വെള്ളനാട് സർവീസ് സഹകരണ ബാങ്കിന്റെ മുൻ സെക്രട്ടറി ഇൻചാർജ് വീട്ടുവളപ്പിൽ ജീവനൊടുക്കി

വെള്ളനാട് സർവീസ് സഹകരണ ബാങ്കിന്റെ മുൻ സെക്രട്ടറി ഇൻചാർജായ അനിൽ കുമാർ (57) ആത്മഹത്യ ചെയ്തു. വെള്ളനാട്–വെള്ളൂർപ്പാറ സ്വദേശിയായ അനിൽ കുമാറിന്റെ വിരമിക്കൽ അടുത്ത വർഷം മെയ് മാസത്തിലാണ് നിശ്ചയിച്ചിരുന്നത്.

ബാങ്ക് മുൻപ് കോൺഗ്രസ് ഭരണത്തിലുള്ളതായിരുന്നു, എന്നാൽ കഴിഞ്ഞ ഒന്നര വർഷമായി അഡ്മിനിസ്ട്രേറ്റീവ് ഭരണമാണ് നിലവിലുള്ളത്. അനിൽ കുമാർ കഴിഞ്ഞ ഒന്നര വർഷത്തിലേറെയായി സസ്‌പെൻഷനിലായിരുന്നു. സാമ്പത്തിക ക്രമക്കേടുകളുമായി ബന്ധപ്പെട്ടാണ് സസ്‌പെൻഷൻ ഉണ്ടായത്.

ഇന്ന് രാവിലെ വീട്ടുവളപ്പിലെ പ്ലാവിൽ തൂങ്ങി മരിച്ച നിലയിലാണ് അനിൽ കുമാറിനെ കണ്ടെത്തിയത്. പ്രാഥമിക വിലയിരുത്തലിൽ സാമ്പത്തിക ബാധ്യതയാണ് ആത്മഹത്യയ്ക്ക് പിന്നിലെന്ന് പൊലീസ് സംശയിക്കുന്നു. വെള്ളനാട് ശശി പ്രസിഡന്റായിരുന്ന സഹകരണ ബാങ്കിലാണ് അനിൽ കുമാർ സേവനമനുഷ്ഠിച്ചിരുന്നത്.

Tag: Financial burden; Former secretary-in-charge of Vellanad Service Cooperative Bank committed suicide in his house compound