നേപ്പാളിന്റെ ചരിത്രത്തിൽ ആദ്യമായി ഒരു വനിതാ പ്രധാനമന്ത്രി,; ആരാണ് സുശീല കർക്കി

കഴിഞ്ഞ ആഴ്ച നേപ്പാളിൽ പൊട്ടിപ്പുറപ്പെട്ട പ്രക്ഷോഭം രാജ്യത്തെ മുഴുവനും കലുഷിതമാക്കി. പൊതുവെ ശാന്തരെന്ന് കരുതിയിരുന്ന യുവജനതയുടെ നേതൃത്വത്തിലുള്ള പ്രതിഷേധം അധികാരകേന്ദ്രങ്ങളെ കീഴ്മേൽ മറിച്ചപ്പോൾ, പ്രധാനമന്ത്രി, പ്രസിഡന്റ്, മന്ത്രിമാർ, ഉന്നത ഉദ്യോഗസ്ഥർ തുടങ്ങി എല്ലാവരും സുരക്ഷ തേടി ഒഴിഞ്ഞോടേണ്ടി വന്നു. തെരുവുകൾ യുദ്ധഭൂമിയായി മാറി, രക്തച്ചൊരിച്ചിൽ നിറഞ്ഞ ദിവസങ്ങൾക്ക് ശേഷം രാജ്യം പതിയെ ശാന്തതയിലേക്ക് മടങ്ങുകയാണ്.

ഇതിന്റെ പിന്നാലെയാണ് നേപ്പാളിന്റെ ചരിത്രത്തിൽ ആദ്യമായി ഒരു വനിതാ പ്രധാനമന്ത്രി അധികാരമേൽക്കുന്നത്. സുപ്രീംകോടതിയുടെ മുൻ ചീഫ് ജസ്റ്റിസ് സുശീല കർകി (73) വെള്ളിയാഴ്ച രാത്രി ഒമ്പതിന് ഇടക്കാല പ്രധാനമന്ത്രിയായി സത്യപ്രതിജ്ഞ ചെയ്ത് ചുമതലയേറ്റു. “ജെൻ സി” തലമുറ (1997–2012 കാലഘട്ടത്തിൽ ജനിച്ചവർ) മുന്നോട്ട് വച്ച നേതൃപരിഗണനയിൽ, ശക്തമായ ധീര വനിത എന്ന നിലയിലാണ് അവർ തിരഞ്ഞെടുക്കപ്പെട്ടത്.

ശക്തനായ വനിത, ഇന്ത്യയുടെ സുഹൃത്ത്

നേപ്പാളിന്റെ വെറും 17 വർഷത്തെ ജനാധിപത്യചരിത്രത്തിൽ പുതിയ അധ്യായം തുറക്കുന്നതാണ് സുശീല കർക്കിയുടെ സ്ഥാനാരോഹണം. പ്രക്ഷോഭത്തിൽ കലങ്ങിയ രാജ്യത്തെ ശരിയായ ദിശയിലേക്ക് നയിക്കുമെന്ന് യുവജനങ്ങൾ വിശ്വസിക്കുന്നു.

1952-ൽ കിഴക്കൻ നേപ്പാളിലെ ബിരത് നഗരത്തിൽ ജനിച്ച സുശീല, ഏഴ് സഹോദരങ്ങളിൽ മൂത്തവളായിരുന്നു. വിദ്യാഭ്യാസത്തിനായി ഇന്ത്യയിലെ വരാണസിയിലെ ബനാറസ് ഹിന്ദു സർവകലാശാലയിൽ (BHU) ചേർന്ന് 1975-ൽ രാഷ്ട്രീയ ശാസ്ത്രത്തിൽ ബിരുദാനന്തരബിരുദം നേടി. നിയമ പഠനത്തിന് നാട്ടിലേക്ക് മടങ്ങിയ അവർ 1979-ൽ ബിരത് നഗരത്തിൽ അഭിഭാഷകയായി പ്രവർത്തനം തുടങ്ങി.

2009-ൽ സുപ്രീംകോടതിയിൽ താൽക്കാലിക ജഡ്ജിയായും പിന്നീട് സ്ഥിരം ജഡ്ജിയായും നിയമിതയായി. 2016-ൽ രാജ്യത്തെ ആദ്യ വനിതാ ചീഫ് ജസ്റ്റിസ് ആയപ്പോൾ, അഴിമതിക്കെതിരായ ശക്തമായ നിലപാടുകളും നീതിപൂർവമായ വിധികളും കൊണ്ട് ശ്രദ്ധേയയായി. മുൻ മന്ത്രിമാരെയും ഉന്നത ഉദ്യോഗസ്ഥരെയും ഉൾപ്പെടുത്തിയ അഴിമതി കേസുകളിൽ കടുത്ത നടപടികളെടുത്തതിലൂടെ അവർ ജനകീയ പിന്തുണ നേടി. 2012-ൽ മുൻമന്ത്രി ജയപ്രകാശ് ഗുപ്തയ്ക്കെതിരായ ചരിത്ര വിധി ഇതിൽ ഉൾപ്പെടുന്നു.

65-ാം വയസ്സിൽ വിരമിച്ച് എഴുത്തിനും വിശ്രമത്തിനുമിടയിൽ കഴിയുകയായിരുന്ന സുശീല, ഇപ്പോൾ 73-ാം വയസ്സിൽ തന്നെ രാജ്യത്തിന്റെ ആദ്യ വനിതാ പ്രധാനമന്ത്രിയായി ഉയർന്നു.

കുടുംബവും രാഷ്ട്രീയ ബന്ധവും

ഭർത്താവ് ദുർഗ പ്രസാദ് സുബേദി, നേപ്പാളിന്റെ ആദ്യ വിമാന റാഞ്ചലുമായി ബന്ധപ്പെട്ട ചരിത്രഘടനയിൽ പങ്കെടുത്ത വ്യക്തിയാണ്. ബനാറസ് സർവകലാശാലയിലെ പഠനകാലത്താണ് ഇരുവരും സൗഹൃദത്തിലാവുകയും വിവാഹിതരാകുകയും ചെയ്തത്.

കലാപത്തിന്റെ പശ്ചാത്തലം

സോഷ്യൽ മീഡിയ നിരോധനം, അഴിമതി, വികസനവിരുദ്ധ നടപടികൾ എന്നിവയ്ക്കെതിരെയായിരുന്നു “ജെൻ സി” തലമുറയുടെ പ്രക്ഷോഭം. ഔദ്യോഗിക വസതികൾക്കും ഓഫിസുകൾക്കും തീ വെച്ചും, സർക്കാർ കെട്ടിടങ്ങൾ കൈയേറിയും പ്രതിഷേധം വ്യാപിച്ചു. ഇതിന്റെ പിന്നാലെ പ്രധാനമന്ത്രി കെ.പി. ശർമ ഒലിയും മന്ത്രിസഭയും രാജിവെച്ച് ഒഴിഞ്ഞു. സൈന്യം കർഫ്യൂ ഏർപ്പെടുത്തി നിയന്ത്രണം കൈയിലെടുത്തു.

മൂന്നു ദിവസത്തെ കലാപത്തിൽ 55 പേർ കൊല്ലപ്പെടുകയും, ജയിലുകളിൽ നിന്നു ഏഴായിരത്തിലേറെ തടവുകാർ രക്ഷപ്പെടുകയും ചെയ്തു.

സുശീല കർകി, കാഠ്മണ്ഡു മേയർ ബലേന്ദ്ര ഷാ, മുൻ വൈദ്യുതി ബോർഡ് ചെയർമാൻ കുൽമാൻ ഗിസിങ് എന്നിവരുടെ പേരുകളാണ് പ്രതിഷേധക്കാർ മുന്നോട്ട് വെച്ചത്. അവസാനം ഇടക്കാല നായികയായി സുശീല കർക്കിയെ തെരഞ്ഞെടുത്തു.

Tag: First female Prime Minister in Nepal’s history; Who is Sushila Karki