നേപ്പാളിലെ ജെൻ സി പ്രക്ഷോഭത്തിന്റെ അവസാനം പുതിയ ഭരണകൂടത്തിലേക്കും ബലേന്ദ്ര ഷാ എന്ന പ്രിയപ്പെട്ട നേതാവിലേക്കുമോ?

നേപ്പാളിലെ ജെൻ സി പ്രക്ഷോഭം രാജ്യത്തിന്റെ രാഷ്ട്രീയ ഭാവിയെ തന്നെ മാറ്റിമറിക്കുന്ന തരത്തിലാണ് പുരോഗമിക്കുന്നത്. പ്രധാനമന്ത്രി കെ.പി. ശർമ്മ ഒലിയുടെ രാജിയോടെ, എല്ലാ കണ്ണുകളും ഇപ്പോൾ ഒരാളിലേക്കാണ് തിരിയുന്നത് — കാഠ്മണ്ഡു മേയറും റാപ്പറുമായ ബലേന്ദ്ര ഷാ, അഥവാ ബലേൻ. പുതിയ സർക്കാർ തിരഞ്ഞെടുക്കപ്പെടും വരെ ഇടക്കാല ഭരണത്തിനായി അദ്ദേഹത്തിന്റെ പേരാണ് ജെൻ സി മുന്നോട്ട് വെക്കുന്നത്. സോഷ്യൽ മീഡിയകളിൽ ബലേനെ അനുകൂലിച്ചുള്ള പോസ്റ്റുകൾ നിറയുകയാണ്.

ഒലി രാജിവച്ചതിനു പിന്നാലെ ബലേൻ ഫേസ്ബുക്കിലൂടെ പ്രക്ഷോഭകരോട് സംയമനം പാലിക്കണമെന്ന് അഭ്യർത്ഥിച്ചു. “നിങ്ങളുടെ പ്രധാന ആവശ്യം — സർക്കാരിന്റെ രാജി — ഇതിനകം നേടിയെടുത്തു. ഇനി സമാധാനം നിലനിർത്തേണ്ട സമയമാണിത്” എന്നാണ് അദ്ദേഹത്തിന്റെ സന്ദേശം. അദ്ദേഹത്തിന്റെ ഈ വാക്കുകൾക്ക് പിന്നാലെ രാജ്യത്തെ ചില പ്രതിഷേധങ്ങൾ താൽക്കാലികമായി നിർത്തിവച്ചതായും, കാഠ്മണ്ഡുവിലെ ജനങ്ങൾ അദ്ദേഹത്തിന്റെ നിലപാട് സ്വാഗതം ചെയ്തതായും റിപ്പോർട്ടുകളുണ്ട്.

യുവതലമുറയുടെ വോട്ടർമാർക്ക് പരമ്പരാഗത രാഷ്ട്രീയ പാർട്ടികളോടുള്ള അവിശ്വാസവും വിരക്തിയും, ബലേൻ പോലുള്ള സ്വതന്ത്ര സ്ഥാനാർത്ഥികൾക്ക് വലിയ പിന്തുണ നേടിക്കൊടുത്തു. “യുവജനങ്ങളുടെ താൽപര്യങ്ങൾക്ക് വേണ്ടി ഞാൻ നിലകൊള്ളും, എന്നാൽ സമാധാനവും രാജ്യത്തിന്റെ പുരോഗതിയും ഒരുപോലെ പ്രാധാന്യമുള്ളതാണ്” എന്ന് ബലേൻ വ്യക്തമാക്കിയിരുന്നു.

പ്രക്ഷോഭങ്ങളുടെ തുടക്കമായത് സർക്കാർ 26 സോഷ്യൽ മീഡിയ ആപ്പുകൾ — ഫേസ്ബുക്ക്, ഇൻസ്റ്റാഗ്രാം, യൂട്യൂബ്, എക്സ് എന്നിവ ഉൾപ്പെടെ — നിരോധിച്ചതോടെയാണ്. സ്കൂൾ-കോളേജ് യൂണിഫോമിൽ എത്തിയ വിദ്യാർത്ഥികളായിരുന്നു പ്രതിഷേധത്തിന്റെ മുഖ്യശക്തി. രാജ്യവ്യാപക പ്രതിഷേധത്തിൽ 19 പേർ കൊല്ലപ്പെടുകയും, നൂറിലധികം പേർക്ക് പരിക്കേൽക്കുകയും ചെയ്തു. യുവാക്കൾക്ക് ഐക്യദാർഢ്യം പ്രഖ്യാപിച്ച കുറച്ച് രാഷ്ട്രീയക്കാരിൽ ഒരാളാണ് ബലേൻ.

1990-ൽ കാഠ്മണ്ഡുവിൽ ജനിച്ച ബലേന്ദ്ര ഷാ, നേപ്പാളിൽ സിവിൽ എഞ്ചിനീയറിംഗ് പൂർത്തിയാക്കിയ ശേഷം ഇന്ത്യയിലെ വിശ്വേശ്വരയ്യ ടെക്നോളജിക്കൽ യൂണിവേഴ്സിറ്റിയിൽ നിന്ന് സ്ട്രക്ചറൽ എഞ്ചിനീയറിങ്ങിൽ മാസ്റ്റർ ബിരുദം നേടി. രാഷ്ട്രീയത്തിലേക്ക് വരുന്നതിന് മുമ്പ്, നേപ്പാളിലെ അണ്ടർഗ്രൗണ്ട് ഹിപ്-ഹോപ്പ് രംഗത്ത് റാപ്പറായും ഗാനരചയിതാവായും അദ്ദേഹം സജീവമായിരുന്നു. അഴിമതി, അസമത്വം തുടങ്ങിയ വിഷയങ്ങൾ സംഗീതത്തിലൂടെ ഉയർത്തിക്കാട്ടിയിരുന്നു.

2022-ൽ കാഠ്മണ്ഡു മേയർ തെരഞ്ഞെടുപ്പിൽ സ്വതന്ത്ര സ്ഥാനാർഥിയായി മത്സരിച്ച ബലേൻ, 61,000-ത്തിലധികം വോട്ടുകൾ നേടി, പ്രമുഖ പാർട്ടികളുടെ സ്ഥാനാർഥികളെ പരാജയപ്പെടുത്തി വിജയിച്ചു. തെരഞ്ഞെടുപ്പിന് ശേഷം, പൊതുജനങ്ങളുമായി നേരിട്ട് ആശയവിനിമയം നടത്തുന്നതിൽ അദ്ദേഹം വളരെ സജീവനാണ്.

Tag: Will the end of the Gen C uprising in Nepal lead to a new government and a beloved leader named Balendra Shah