സംസ്ഥാനത്ത് ശക്തമായ മഴ; നാല് ജില്ലകളിൽ ഇന്ന് ഓറഞ്ച് അലേർട്ട്

സംസ്ഥാനത്ത് ശക്തമായ മഴ തുടരുകയാണ്. നാല് ജില്ലകളിൽ ഇന്ന് ഓറഞ്ച് അലർട്ട് പ്രഖ്യാപിച്ചു. മലപ്പുറം, കോഴിക്കോട്, കണ്ണൂർ, കാസർഗോഡ് ജില്ലകളിലാണ് മുന്നറിയിപ്പ്. പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, പാലക്കാട് ജില്ലകളിൽ യെല്ലോ അലേർട്ടും പ്രഖ്യാപിച്ചിട്ടുണ്ട്.

എറണാകുളത്ത് ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയുള്ള ശക്തമായ കാറ്റിനും സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. അടുത്ത 24 മണിക്കൂറിനിടെ 115.6 മില്ലിമീറ്ററിൽ നിന്ന് 204.4 മില്ലിമീറ്റർ വരെ മഴ ലഭിച്ചേക്കുമെന്നാണ് പ്രവചനം.

തിങ്കളാഴ്ച പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിൽ യെല്ലോ മുന്നറിയിപ്പ് നിലനിൽക്കും. ചൊവ്വാഴ്ച പത്തനംതിട്ട, കോട്ടയം, ഇടുക്കി, തൃശൂർ, എറണാകുളം ജില്ലകളിലും ബുധനാഴ്ച കൊല്ലം, പത്തനംതിട്ട, കോട്ടയം, ഇടുക്കി, എറണാകുളം, തൃശൂർ, പാലക്കാട് ജില്ലകളിലും യെല്ലോ അലേർട്ട് പ്രഖ്യാപിച്ചിട്ടുണ്ട്.

തെക്ക് കിഴക്കൻ അറബിക്കടലിനും അതിനോട് ചേർന്നുള്ള കേരള–കർണാടക തീരപ്രദേശങ്ങൾക്കും ലക്ഷദ്വീപ് മേഖലക്കും മുകളിലായി രൂപപ്പെട്ട ന്യൂനമർദ്ദം ശക്തിപ്രാപിച്ച് ഡീപ്പ് ഡിപ്രഷനായി മാറിയിരിക്കുകയാണ്. ഇത് പടിഞ്ഞാറ്–വടക്കുപടിഞ്ഞാറ് ദിശയിലേക്ക് നീങ്ങി അടുത്ത 36 മണിക്കൂറിനുള്ളിൽ തീവ്ര ന്യൂനമർദമായി ശക്തിപ്രാപിക്കുമെന്നാണ് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകുന്നത്.

ഇടുക്കിയിൽ കനത്ത മഴ തുടരുകയാണ്. കുമളിയിൽ രണ്ട് ഇടങ്ങളിൽ ഉരുൾപൊട്ടിയതായി സംശയിക്കുന്നു, എങ്കിലും ആളുകൾ സുരക്ഷിതരാണെന്ന് പഞ്ചായത്ത് പ്രസിഡൻറ് അറിയിച്ചു. കുമളി–ആനവിലാസം റോഡിൽ ഗതാഗതം തടസപ്പെട്ടു. ഒന്നാംമൈൽ, റോസാപൂക്കണ്ടം, പെരിയാർ കോളനി തുടങ്ങിയ പ്രദേശങ്ങളിൽ വെള്ളം ഉയരുകയാണ്. താഴ്ന്ന പ്രദേശങ്ങളിൽ നിന്നുള്ളവരെ സുരക്ഷിത സ്ഥലങ്ങളിലേക്ക് മാറ്റി താമസിപ്പിച്ചു. അട്ടപ്പള്ളം മേഖലയിലെ ആറു കുടുംബങ്ങളെയും രണ്ട് കുടുംബങ്ങളെയും റിസോർട്ടിലേക്കും മാറ്റിയിട്ടുണ്ട്.

അതേസമയം, കുമളി വെള്ളാരംകുന്നിൽ സ്കൂട്ടർ നിയന്ത്രണം നഷ്ടപ്പെട്ട് മൺകൂനയിലേക്ക് ഇടിച്ച് ഒരാൾ മരിച്ചു. കുമളി–ആനവിലാസം റോഡിലാണ് അപകടം നടന്നത്. മരിച്ചയാൾ പറപ്പള്ളിയിലെ തങ്കച്ചൻ ആണ്. ശക്തമായ മഴയെത്തുടർന്ന് റോഡിലേക്ക് മണ്ണ് ഇടിഞ്ഞ് വീണതും അപകടത്തിന് കാരണമായി.

മുല്ലപ്പെരിയാറിലും ജലനിരപ്പ് ഉയരുകയാണ്. നിലവിൽ ജലനിരപ്പ് 139.20 അടി. സെക്കൻഡിൽ 17,000 ഘനയടി വെള്ളം അണക്കെട്ടിലേക്ക് ഒഴുകിയെത്തുന്നു, ഇതിൽ 8,800 ഘനയടി വെള്ളം പെരിയാറിലേക്കാണ് തുറന്ന് വിടുന്നത്. അണക്കെട്ടിലേക്ക് ശക്തമായ നീരൊഴുക്ക് തുടരുകയാണ്.

Tag: Heavy rain in the state; Orange alert in four districts today