പള്ളുരുത്തി സെന്റ് റീത്താസ് സ്കൂളിന് ഹൈക്കോടതിയുടെ തിരിച്ചടി; ഹിജാബ് ധരിച്ച കുട്ടിയെ സ്‌കൂളിൽ പ്രവേശിപ്പിക്കണമെന്ന ഉത്തരവിന് സ്റ്റേ ഇല്ല

പള്ളുരുത്തി സെന്റ് റീത്താസ് സ്കൂളിന് ഹൈക്കോടതിയുടെ തിരിച്ചടി. ഹിജാബ് ധരിച്ച വിദ്യാർത്ഥിനിയെ സ്കൂളിൽ പ്രവേശിപ്പിക്കണമെന്ന ഡിഡിഇയുടെ ഉത്തരവിന് സ്റ്റേ അനുവദിക്കാനില്ലെന്ന് ഹൈക്കോടതി വ്യക്തമാക്കി. സ്കൂൾ സമർപ്പിച്ച ഹർജിയിൽ സർക്കാരിനോട് വിശദീകരണം നൽകാൻ കോടതി നിർദ്ദേശിക്കുകയും ചെയ്തു.

ജസ്റ്റിസ് വി. ജെ. അരുണ്‍ അധ്യക്ഷനായ ഏകബഞ്ചാണ് ഈ തീരുമാനം കൈക്കൊണ്ടത്. ഹർജി അടുത്ത വെള്ളിയാഴ്ച വീണ്ടും പരിഗണിക്കും. ഹിജാബ് ധരിച്ചതിന്റെ പേരിൽ എട്ടാം ക്ലാസ് വിദ്യാർത്ഥിനിയെ ക്ലാസിലേക്ക് കയറാൻ അനുവദിക്കാതിരുന്നതിൽ, സ്കൂൾ ഭരണകൂടത്തിന്റെ ഭാഗത്ത് ഗുരുതരമായ വീഴ്ചയുണ്ടായതായി എറണാകുളം ഡിഡിഇയുടെ റിപ്പോർട്ടിൽ ചൂണ്ടിക്കാട്ടിയിരുന്നു. ഇതിനെതിരെ സ്കൂൾ അധികൃതർ ഹൈക്കോടതിയെ സമീപിച്ചായിരുന്നു ഹർജി.

സ്കൂൾ വാദിച്ചത്, “സെന്റ് റീത്താസ് ഒരു സിബിഎസ്ഇ സ്ഥാപനമാണ്, അതിനാൽ സംസ്ഥാന വിദ്യാഭ്യാസ വകുപ്പിനും ഡിഡിഇയ്ക്കും നടപടി എടുക്കാൻ അധികാരമില്ല. ഇത് അമിതാധികാര പ്രയോഗമാണ്,” എന്നായിരുന്നു.

അതേസമയം, സ്കൂൾ പ്രിൻസിപ്പൽ വ്യക്തമാക്കിയതെന്ന്, “സ്കൂളിന്റെ നിബന്ധനകൾ അനുസരിച്ച് വിദ്യാർത്ഥി ഹാജരായാൽ സ്വീകരിക്കും. സർക്കാർ മാർഗനിർദ്ദേശങ്ങൾക്കും നിയമത്തിനും അനുസൃതമായാണ് സ്കൂൾ ഇതുവരെ പ്രവർത്തിച്ചിരിക്കുന്നത്.”

വിദ്യാർത്ഥിനിയുടെ പിതാവ് അറിയിച്ചു, “കുട്ടി സെന്റ് റീത്താസ് സ്കൂളിൽ നിന്നും വിടുതൽ സർട്ടിഫിക്കറ്റ് വാങ്ങി പഠനം മറ്റൊരു സ്കൂളിൽ തുടരാനാണ് തീരുമാനം. ഹിജാബ് വിവാദം കുട്ടിക്ക് മാനസിക സമ്മർദ്ദം ഉണ്ടാക്കിയതിനാലാണ് ഈ തീരുമാനം.”

Tag: High Court hits back at Palluruthy St. Reethas School; No stay on order to admit child wearing hijab to school