എം.എം. ലോറൻസിന്റെ മൃതദേഹം വൈദ്യപഠനത്തിനായി വിട്ടുകൊടുക്കുന്നതിൽ പുനഃപരിശോധന ആവശ്യമില്ലെന്ന് ഹൈക്കോടതി

മുതിർന്ന സിപിഐഎം നേതാവ് എം.എം. ലോറൻസിന്റെ മൃതദേഹം വൈദ്യപഠനത്തിനായി വിട്ടുകൊടുക്കുന്നതിൽ പുനഃപരിശോധന ആവശ്യമില്ലെന്ന് ഹൈക്കോടതി വ്യക്തമാക്കി. മൃതദേഹം മെഡിക്കൽ പഠനത്തിനായി നൽകണമെന്ന ഹൈക്കോടതി ഡിവിഷൻ ബെഞ്ചിന്റെ മുൻവിധിക്കെതിരെ മകൾ ആശ ലോറൻസ് നൽകിയ റിവ്യൂ ഹർജിയാണ് ഹൈക്കോടതി തള്ളിയത്.

മുന്‍പ് ഡിവിഷൻ ബെഞ്ച് മക്കളായ ആശ ലോറൻസിന്റെയും സുജാത ബോബന്റെയും അപ്പീൽ തള്ളിക്കൊണ്ട്, മെഡിക്കൽ കോളേജ് അധികൃതരുടെ നടപടിയെ ശരിവെച്ചിരുന്നു. അതിന് മുമ്പും സിംഗിൾ ബെഞ്ച് സമാനമായ വിധി പ്രസ്താവിച്ചിരുന്നു. മക്കൾ തമ്മിലുള്ള വ്യക്തിപരമായ തർക്കമാണിതെന്നും, ഇതിനെ അനന്തമായി നീട്ടിക്കൊണ്ടുപോകാനാവില്ലെന്നും ഹൈക്കോടതി നേരത്തെ വ്യക്തമാക്കിയിരുന്നു.

ലോറൻസ് ജീവിച്ചിരുന്ന കാലത്ത് തന്നെ തന്റെ മൃതദേഹം വൈദ്യപഠനത്തിനായി സമർപ്പിക്കണമെന്ന ആഗ്രഹം പ്രകടിപ്പിച്ചതായി മകൻ സജീവൻ കോടതിയെ അറിയിച്ചിരുന്നു. മറുവശത്ത്, മതപരമായ ചടങ്ങുകളോടെ സംസ്കരിക്കണമെന്ന ആവശ്യത്തോടെയാണ് മക്കളായ ആശ ലോറൻസും സുജാത ബോബനും കോടതിയെ സമീപിച്ചത്.

വിഷയത്തിൽ മധ്യസ്ഥതയിലൂടെ സമവായമുണ്ടാക്കാൻ ഹൈക്കോടതി ശ്രമിച്ചെങ്കിലും, അത് പരാജയപ്പെട്ടിരുന്നു. നിലവിൽ ലോറൻസിന്റെ മൃതദേഹം എറണാകുളം മെഡിക്കൽ കോളേജിലാണ് സൂക്ഷിച്ചിരിക്കുന്നത്. 2024 സെപ്റ്റംബർ 21-നാണ് എം.എം. ലോറൻസ് ന്യൂമോണിയ ബാധയെ തുടർന്ന് കൊച്ചിയിലെ സ്വകാര്യ ആശുപത്രിയിൽ ചികിത്സയിലിരിക്കെ അന്തരിച്ചത്.

Tag: High Court says no review needed in releasing M.M. Lawrence’s body for medical study