രണ്ട് കിലോമീറ്റര്‍ ഓടാനായില്ല, ബി.സി.സി.ഐ ഫിറ്റ്നെസ് ടെസ്റ്റ് തോറ്റ് സഞ്ജുവും ഇഷാനും
മുംബൈ: ടീം ഫിറ്റ്നെസ് ഉറപ്പാക്കാനായി ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് വീണ്ടും ഏര്‍പെടുത്തിയ രണ്ടു കിലോമീറ്റര്‍ ഓട്ടം തോറ്റ് മലയാളി താരം സജ്ഞു സാംസണ്‍ ഉള്‍പെടെ ആറു പേര്‍. ഇഷാന്‍ കിഷന്‍, നിതീഷ് റാണ, രാഹുല്‍ തെവാത്തിയ, സിദ്ധാര്‍ഥ് കൗള്‍, ജയദേവ് ഉനദ്കട്ട് എന്നിവരാണ് ബംഗളൂരുവിലെ നാഷനല്‍ ക്രിക്കറ്റ് അക്കാദമിയില്‍ ആരംഭിച്ച ഫിറ്റ്നസ് റണ്‍’ പരാജയപ്പെട്ടത്.
പുതുതായി ഉള്‍പെടുത്തിയതായതിനാല്‍ എല്ലാവര്‍ക്കും ഫിറ്റ്നെസ് ഉറപ്പാക്കാന്‍ രണ്ടാമതും അവസരം നല്‍കും. അതിലും പരാജയമായാല്‍ ഇംഗ്ലണ്ടിനെതിരായ വരുന്ന മൂന്ന് ഏകദിനങ്ങള്‍, അഞ്ച് ട്വന്‍റി20കള്‍ എന്നിവയടങ്ങിയ വൈറ്റ്ബാള്‍ പരമ്പരയില്‍ ഇവര്‍ക്ക് ഇടം അപകടത്തിലാകും.
2018ല്‍ സാംസണ്‍, മുഹമ്മദ് ഷമി, അംബാട്ടി റായുഡു എന്നിവര്‍ സമാനമായി യോ-യോ ടെസ്റ്റ് പരാജയപ്പെട്ടിരുന്നു. ഇതോടെ ഇംഗ്ലണ്ട് പര്യടനത്തിലെ ഏകദിനങ്ങളില്‍ നിന്നുള്‍പെടെ ഇവര്‍ പുറത്തായി. അടുത്തിടെ ആസ്ട്രേലിയക്കെതിരെ നടന്ന ട്വന്‍റി20 പരമ്പരയില്‍ സാംസണ്‍ അംഗമായിരുന്നു.
20ലധികം താരങ്ങള്‍ക്കാണ് യോ-യോ ടെസ്റ്റും രണ്ടു കിലോമീറ്റര്‍ ഓട്ടവും നടത്തി ഫിറ്റ്നസ് പരിശോധിക്കുന്നത്. ഈ വര്‍ഷം നടക്കുന്ന ട്വന്‍റി20 ലോകകപ്പിലുള്‍പെടെ ഇറങ്ങാനുള്ള ടീമിനെ കണ്ടെത്താന്‍ ലക്ഷ്യമിട്ടാണ് പരിശോധന.
ബാറ്റ്സ്മാന്‍, വിക്കറ്റ്കീപര്‍, സ്പിന്നര്‍ എന്നിവര്‍ എട്ടുമിനിറ്റും 30 സെക്കന്‍ഡുമെടുത്ത് രണ്ടു കിലോമീറ്റര്‍ ദൂരം പൂര്‍ത്തിയാക്കണമെന്നാണ് ചട്ടം. ഫാസ്റ്റ്ബൗളര്‍ക്ക് സമയപരിധി പിന്നെയും ചുരുങ്ങി എട്ടുമിനിറ്റ് 15 സെക്കന്‍ഡാകും.
