ടോക്‌ട്ടെ മുംബൈ തീരത്തോട് അടുക്കുന്നു; ഇതിനോടകം തകര്‍ന്നത് അറുനൂറോളം കെട്ടിടങ്ങള്‍
മുംബൈ: ടോക്‌ട്ടെ ചുഴലിക്കാറ്റ് മുംബൈ തീരത്തോട് അടുക്കുന്നു. മുംബൈ തീരത്തു നിന്നും നൂറ്റിയമ്പത് കിലോമീറ്റ൪ അകലെയാണ് ചുഴലിക്കാറ്റ് നിലവിലുള്ളത്. മുംബൈ തീരങ്ങളില്‍ നൂറ് കിലോമീറ്റ൪ വരെ വേഗതയുള്ള കാറ്റാണ് ഇപ്പോള്‍ വീശിയടിക്കുന്നത്. പ്രദേശത്ത് കനത്ത പേമാരിയും തുടരുകയാണ്. അറുനൂറോളം കെട്ടിടങ്ങളാണ് ഇതിനോടകം ചുഴലിക്കാറ്റില്‍ തക൪ന്നത്.
മഹാരാഷ്ട്ര ഗുജറാത്ത് തീരങ്ങളില്‍ നിന്നും ആളുകളെ മാറ്റിപ്പാ൪പ്പിക്കുന്നത് തുടരുകയാണ്. ഇതിനകം മപ്പതിനായിരത്തിലധികം പേരെ മാറ്റിപ്പാ൪പ്പിച്ചതായാണ് റിപ്പോര്‍ട്ടുകള്‍. 56 ദേശീയ ദുരന്ത നിവാരണ സേന വിഭാഗങ്ങളെ ഇവിടങ്ങളില്‍ വിന്യസിച്ചിട്ടുണ്ട്. മുംബൈ വിമാത്താവളം ഉച്ചക്ക് രണ്ട് മണി വരെ അടച്ചിട്ടിരിക്കുകയാണ്. 300 ഓളം കപ്പലുകളും വഴിതിരിച്ച്‌ വിട്ടിട്ടുണ്ട്.
ഡാം ആന്‍ഡ് ഡിയു തീരത്തില്‍ നിന്ന് 220 കിലോമീറ്റ൪ അകലത്തിലും ഗുജറാത്തിലെ വരാവല്‍ തീരത്ത് നിന്ന് 260 കിലോമീറ്റ൪ അകലത്തിലുമാണ് ടോക്‌ട്ടെ നിലവിലുള്ളത്. മണിക്കൂറില്‍ 150 കിലോമീറ്റ൪ വേഗതയില്‍ സഞ്ചരിക്കുന്ന കാറ്റ് ഇന്ന് വൈകിട്ടോടെ ഗുജറാത്ത് തീരത്തെത്തും. രാത്രി എട്ട് മണിയോടെ തീരം തൊടും. അതിതീവ്ര ചുഴലിക്കാറ്റായി തന്നെ ടോക്‌ട്ടെ തീരംതൊടുമെന്നാണ് മുന്നറിയിപ്പ്. ഗുജറാത്തില്‍ നിന്നും ഏകദേശം ഒരു ലക്ഷത്തോളം പേരെ ഇതിനോടകം മാറ്റിപാര്‍പ്പിച്ചിട്ടുണ്ട്. 180-200 കിലോമീറ്റ൪ വരെ വേഗതയിലാകും കാറ്റ് വീശുക. നാളെയും മറ്റന്നാളുമായി രാജസ്ഥാനിലും ശക്തമായ കാറ്റും മഴയും ഉണ്ടാകും. കേരള, ക൪ണാടക, ഗോവന്‍ തീരങ്ങള്‍ വഴി കടന്നുപോയ ടോക്‌ട്ടെ കനത്ത നാശനഷ്ടം വിതച്ചിരുന്നു.
