കേരളത്തിൽ വോട്ടർ പട്ടിക പരിഷ്കരണം; തയാറെടുപ്പ് തുടങ്ങാൻ മുഖ്യ തിരഞ്ഞെടുപ്പ് ഓഫീസർ

കേരളത്തിൽ വോട്ടർ പട്ടിക പരിഷ്കരണം ബിഹാർ മാതൃകയിൽ നടപ്പാക്കാനാണ് തയ്യാറെടുപ്പെന്ന് മുഖ്യ തിരഞ്ഞെടുപ്പ് ഓഫീസർ അറിയിച്ചു. നിലവിലെ പട്ടികയിലും 2002 ലെ പട്ടികയിലും പേര് ഉണ്ടോ എന്ന് ജനങ്ങൾ പരിശോധിക്കണമെന്നും അദ്ദേഹം ആവശ്യപ്പെട്ടു. എസ്ഐആർ നടപ്പിലാക്കുന്ന തീയതി കേന്ദ്ര തിരഞ്ഞെടുപ്പ് കമ്മീഷൻ പ്രഖ്യാപിക്കും. 20-ാം തീയതി രാഷ്ട്രീയ പാർട്ടികളുടെ യോഗം ചേരുമെന്നും വ്യക്തമാക്കിയിട്ടുണ്ട്.

ജൂലൈ മുതൽ പട്ടിക പരിഷ്‌കരണത്തിനുള്ള നടപടികൾ ആരംഭിക്കാനായി സംസ്ഥാന തിരഞ്ഞെടുപ്പ് ഓഫീസർമാർക്ക് നിർദേശം നൽകിയിരുന്നു. സെപ്റ്റംബർ മാസത്തോടെ പ്രാഥമിക നടപടികൾ പൂർത്തിയാക്കാനാകുമെന്ന് ഡൽഹിയിൽ ചേർന്ന യോഗത്തിൽ സംസ്ഥാന ഓഫീസർമാർ വ്യക്തമാക്കി. സമഗ്ര വോട്ടർ പട്ടിക പരിഷ്‌കരണം നടക്കുന്നതിൽ വോട്ടർമാർക്ക് ആശങ്ക വേണ്ടെന്ന് മുഖ്യ തിരഞ്ഞെടുപ്പ് ഓഫീസർ രത്തൻ യു ഖേൽക്കർ നേരത്തെ ഉറപ്പുനൽകിയിരുന്നു.

2002ലെ പട്ടികയിൽ ഉണ്ടായിരുന്ന 80 ശതമാനം പേരും 2025ലെ പട്ടികയിൽ നിലനിൽക്കുന്നതായി പാലക്കാട് ജില്ലയിലെ രണ്ട് ബിഎൽഒമാർ നടത്തിയ താരതമ്യത്തിൽ കണ്ടെത്തിയതായി ഖേൽക്കർ പറഞ്ഞു. കൂടാതെ, സുപ്രീം കോടതി നിർദ്ദേശപ്രകാരം ആധാറും തിരിച്ചറിയൽ രേഖയായി ഉൾപ്പെടുത്തുമെന്നും അദ്ദേഹം വ്യക്തമാക്കി.

Tag: Kerala voters’ list revision; Chief Electoral Officer to start preparations