കിംഗ് ഖാന് ഇന്ന് 60വയസ്സ്, പിറന്നാൾ ആശംസകളുമായി ആരാധകർ
ഇന്ത്യൻ സിനിമയിലെ സൂപ്പർതാരം, ആരാധകർ സ്‌നേഹത്തോടെ ‘കിംഗ് ഖാൻ’ എന്ന് വിളിക്കുന്ന ഷാരൂഖ് ഖാൻ ഇന്ന് തന്റെ അറുപതാം പിറന്നാൾ. ലോകമെമ്പാടുമുള്ള ലക്ഷക്കണക്കിന് ആരാധകരാണ് സോഷ്യൽ മീഡിയയിലൂടെ ആശംസകൾ അർപ്പിക്കുന്നത്. യുഎഇയിൽ ഗ്രാൻഡ് ഫിലിം ഫെസ്റ്റിവൽ സംഘടിപ്പിച്ചാണ് ഷാരൂഖിന്റെ ജന്മദിനം ആഘോഷിക്കുന്നത്. പതിവുപോലെ മുംബൈയിലെ ‘മന്നത്ത്’ ബംഗ്ലാവിന്റെ ബാൽക്കണിയിൽ നിന്ന് ആരാധകരെ അഭിവാദ്യം ചെയ്യുമെന്ന് പ്രതീക്ഷയുണ്ട്.
നവംബർ 2 എന്ന തീയതി, ഷാരൂഖിന്റെ ആരാധകർക്ക് ഒരു വിസ്മയസ്മരണാ ദിനം തന്നെയാണ്. ബോളിവുഡിൽ സ്വയം ഒരു ബ്രാൻഡായി മാറിയ താരമാണ് ഷാരൂഖ് ഖാൻ. ചെറുപ്പത്തിൽ തന്നെ പിതാവിനെയും മാതാവിനെയും നഷ്ടപ്പെട്ട അദ്ദേഹം, ആ ദുഖത്തിൽ നിന്ന് കരുത്ത് കണ്ടെത്തി കലാരംഗത്ത് തന്റെ സ്ഥാനം ഉറപ്പിച്ചു.
സൽമാൻ ഖാനും ആമിർ ഖാനും പോലെ സിനിമാ കുടുംബ പാരമ്പര്യമില്ലാതെ തന്നെ ഹിന്ദി സിനിമയിൽ പ്രവേശിച്ച ഷാരൂഖ്, കഠിനാധ്വാനത്തിലൂടെയും പ്രതിഭയിലൂടെയും ‘കിംഗ് ഓഫ് ബോളിവുഡ്’ ആയി. പ്രണയഭാവനകളിലൂടെ, മനുഷ്യന്റെ വികാരങ്ങൾ തൊട്ടറിയുന്ന കഥാപാത്രങ്ങളിലൂടെ, അദ്ദേഹം ലോകമെമ്പാടുമുള്ള പ്രേക്ഷകരുടെ ഹൃദയങ്ങൾ കീഴടക്കി.
ഇന്ന് ഷാരൂഖ് ഖാൻ അർണോൾഡ് ഷ്വാർസനേഗർ, ടോം ക്രൂസ്, ജാക്കി ചാൻ തുടങ്ങിയ ഹോളിവുഡ് താരങ്ങളെയും മറികടന്ന് ലോകത്തിലെ ഏറ്റവും സമ്പന്നരായ നടന്മാരിൽ ഒരാളായി മാറിയിരിക്കുകയാണ്. എന്നാൽ പ്രശസ്തിയും സമ്പത്തും നേടിയിട്ടും, ആരാധകഹൃദയങ്ങളിലേക്ക് വിനയത്തോടെ എത്തുന്ന അതേ ഷാരൂഖ് തന്നെയാണ് ഇന്നും ലോകം ആഘോഷിക്കുന്നത്.
Tag: King Khan turns 60 today, fans wish him a happy birthday
