കെപിസിസി, ഡിസിസി; പുനഃസംഘടന ആവശ്യപ്പെട്ടുള്ള ചര്‍ച്ചകള്‍ ഡല്‍ഹിയില്‍ രണ്ടാം ദിവസവും തുടരുന്നു
കെപിസിസിയും ഡിസിസിയും പുനസംഘടിപ്പിക്കുന്നതിനുള്ള ചര്‍ച്ചകള്‍ ഡല്‍ഹിയില്‍ രണ്ടാം ദിവസവും തുടരുകയാണ്. കെപിസിസി, ഡിസിസി അധ്യക്ഷന്മാരെ മാറ്റുന്നതിലെ അന്തിമ തീരുമാനമാണ് ഇപ്പോൾ ചര്‍ച്ച ചെയ്യപ്പെടുന്നത്. തൃശ്ശൂര്‍ ഡിസിസി ഒഴികെയുള്ള എല്ലാ ജില്ലാ അധ്യക്ഷന്മാരെയും ഭാരവാഹികളെയും മാറ്റണമെന്ന നിര്‍ദ്ദേശത്തിന്റെ പശ്ചാത്തലത്തിൽ നിലപാടുകള്‍ ഏകോപിപ്പിക്കാൻ ശ്രമം തുടരുന്നു. ഇതോടൊപ്പം കെപിസിസി ഭാരവാഹികളുടെ നിയമനത്തെയും ചുറ്റിപ്പറ്റി തര്‍ക്കം നിലനില്‍ക്കുന്നു.
കെപിസിസി അധ്യക്ഷനും വര്‍ക്കിംഗ് പ്രസിഡന്റുമാരും മേയ് മാസത്തിൽ പുതുക്കി നിയമിച്ചിരുന്നുവെങ്കിലും മറ്റ് ഭാരവാഹികളെ തീരുമാനിക്കാൻ കഴിഞ്ഞിരുന്നില്ല. നിലമ്പൂര്‍ ഉപതിരഞ്ഞെടുപ്പിന് ശേഷം പുനസംഘടന പൂർത്തിയാക്കാനായിരുന്നു തീരുമാനം. ഈ സമയത്ത് കെപിസിസി അധ്യക്ഷൻ അഡ്വ. സണ്ണി ജോസഫ്, ശശി തരൂര്‍ എംപിയെ കണ്ടുമുട്ടി പാര്‍ട്ടിയെ ശക്തിപ്പെടുത്താനുള്ള പ്രവര്‍ത്തനങ്ങള്‍ക്ക് പിന്തുണ തേടി.
പുനസംഘടനയെക്കുറിച്ച് രമേശ് ചെന്നിത്തല, വി.ഡി. സതീശന്‍, എം.കെ. രാഘവന്‍, രാജ്‌മോഹന്‍ ഉണ്ണിത്താന്‍, ഷാഫി പറമ്പില്‍, കെ. സുധാകരന്‍, കൊടിക്കുന്നില്‍ സുരേഷ്, അടൂര്‍ പ്രകാശ്, ഹൈബി ഈഡന്‍ എന്നിവര്‍ അടക്കമുള്ള നേതാക്കളുമായി ചര്‍ച്ച നടത്തി. കോഴിക്കോട്, എറണാകുളം, മലപ്പുറം, തൃശ്ശൂര്‍ ജില്ലാ അധ്യക്ഷന്മാരെ മാറ്റരുതെന്നാണ് ഉയര്‍ന്ന ആവശ്യം. കൊല്ലം ജില്ലാ അധ്യക്ഷനെ നിലനിര്‍ത്തണമെന്നും കൊടിക്കുന്നില്‍ സുരേഷ് ആവശ്യപ്പെട്ടു. നേതാക്കള്‍ പുനസംഘടനയ്ക്ക് പകരം കൂട്ടിച്ചേർക്കലുകൾ വേണമെന്നാണ് അഭിപ്രായപ്പെടുന്നത്.
എറണാകുളം ഡിസിസി അധ്യക്ഷന്‍ മുഹമ്മദ് ഷിയാസ് സിപിഐഎം അടക്കം പല പാര്‍ട്ടികളില്‍നിന്നും പ്രവര്‍ത്തകരെ കോണ്‍ഗ്രസിലേക്ക് കൊണ്ടുവരാൻ സാധിച്ചുവെന്നതിനാല്‍ നിലനിര്‍ത്തണമെന്ന് വി.ഡി. സതീശന്‍ വാദിക്കുന്നു. മലപ്പുറം ജില്ലാ അധ്യക്ഷന്‍ വി.എസ്. ജോയിയുടെ പ്രവര്‍ത്തനങ്ങൾക്ക് പ്രത്യേക പരിഗണന നല്‍കും. കോഴിക്കോട് അധ്യക്ഷനും തുടരാന്‍ സാധ്യതയുണ്ട്. നാല് ജില്ലാ അധ്യക്ഷന്മാരെ നിലനിര്‍ത്തണമെന്ന ആവശ്യം അംഗീകരിക്കപ്പെടും.
ജില്ലകളില്‍ ആവശ്യമായിടത്ത് ജനറല്‍ സെക്രട്ടറിമാരെയും മറ്റു ഭാരവാഹികളെയും മാറ്റാനാണ് പദ്ധതി. ഗ്രൂപ്പ് അടിസ്ഥാനത്തില്‍ തന്നെ നിയമനം വേണമെന്ന ആവശ്യം നേതാക്കള്‍ മുന്നോട്ടുവയ്ക്കുന്നു. എന്നാല്‍ ഹൈക്കമാന്‍ഡ് പ്രവര്‍ത്തനമികവാണ് പരിഗണിക്കേണ്ടത് എന്ന് നിര്‍ദേശിച്ചിട്ടുണ്ട്. എഐസിസി തര്‍ക്കമില്ലാതെ പുനസംഘടന പൂര്‍ത്തിയാക്കാന്‍ നിര്‍ദ്ദേശം നല്‍കിയിട്ടുണ്ട്. കേരള ചുമതലയുള്ള എഐസിസി ജനറല്‍ സെക്രട്ടറി ദീപാദാസ് മുന്‍ഷി എല്ലാ മുതിര്‍ന്ന നേതാക്കളുമായി വിശദമായ ചര്‍ച്ചകള്‍ നടത്തി.
തദ്ദേശ തിരഞ്ഞെടുപ്പിനും 2026 നിയമസഭാ തിരഞ്ഞെടുപ്പിനും പാര്‍ട്ടിയെ സജ്ജമാക്കുകയെന്നതാണ് പുതിയ കമ്മിറ്റികളുടെ പ്രധാന ചുമതല. കൂടുതല്‍ പുതുമുഖങ്ങള്‍ക്ക് സ്ഥാനാര്‍ത്ഥിത്വം നല്‍കുകയും, സ്ഥാനഭ്രഷ്ടരാവുന്ന ചിലരെ നിയമസഭാ തെരഞ്ഞെടുപ്പില്‍ സ്ഥാനാര്‍ത്ഥികളായി പരിഗണിക്കാനുമുള്ള ചര്‍ച്ചകളും നടക്കുന്നു.
ഓരോ ജില്ലയ്ക്കും മൂന്ന് പേരുടെ പേരുകളാണ് ഹൈക്കമാന്‍ഡിന് സമര്‍പ്പിച്ചിരിക്കുന്നത്. സമ്മര്‍ദ്ദങ്ങള്‍ നിലനില്‍ക്കുന്നുണ്ടെങ്കിലും കെപിസിസി ജനറല്‍ സെക്രട്ടറിമാരും വൈസ് പ്രസിഡന്റുമാരും ഉള്‍പ്പെടുന്ന പട്ടിക ഉടന്‍ അന്തിമരൂപം നേടും. എട്ട് ജില്ലാ അധ്യക്ഷന്മാരെ കെപിസിസി ഭാരവാഹികളായി നിയമിക്കാനുള്ള നിര്‍ദേശവും പരിഗണനയിലാണ്.
പാര്‍ട്ടിയില്‍ തര്‍ക്കങ്ങളോ പുറത്തുപോക്കലുകളോ ഇല്ലാതെ പുനസംഘടന പൂർത്തിയാക്കാന്‍ നേതൃത്വത്തിന് ചുമതല നല്‍കിയിട്ടുണ്ട്. സ്ഥാനഭ്രഷ്ടരാവുന്ന ഭാരവാഹികളെ പാര്‍ട്ടിയില്‍ സംരക്ഷിക്കണമെന്നും ഹൈക്കമാന്‍ഡ് നിര്‍ദേശിച്ചു. ഭൂരിപക്ഷം നേതാക്കള്‍ കെപിസിസിയില്‍ ഭാഗികമായ മാറ്റം മാത്രമേ വേണ്ടുവെന്നും ജംബോ കമ്മിറ്റിയിലേക്ക് നീങ്ങേണ്ടി വരാനിടയുണ്ടെന്നും വിലയിരുത്തുന്നു.
യുവനേതാക്കള്‍ക്ക് നേതൃത്വം നല്‍കുന്ന അവസരം കൂടുതല്‍ നല്‍കണമെന്നും, യുവ വോട്ടര്‍മാരെ ആകര്‍ഷിക്കുന്ന നേതാക്കളെ മുന്നോട്ട് കൊണ്ടുവരണമെന്നും ഹൈക്കമാന്‍ഡ് നിര്‍ദേശിച്ചു. പ്രവര്‍ത്തകരുമായുള്ള അടുപ്പം പുലര്‍ത്തുന്ന നേതാക്കളെ വാര്‍ഡ് തലത്തില്‍ കണ്ടെത്താന്‍ ഡിസിസി അധ്യക്ഷന്മാര്‍ക്ക് ചുമതല നല്‍കും. പുതിയ കമ്മിറ്റികൾക്ക് പാര്‍ട്ടിയുടെ അടിത്തറ ശക്തിപ്പെടുത്താനുള്ള ഉത്തരവാദിത്തം നല്‍കിയിരിക്കുകയാണ്.
Tag: KPCC, DCC; Discussions seeking reorganization continue for second day in Delhi
