മുഖം മിനുക്കി കെഎസ്ആർടിസി; പുതിയ വോള്‍വോ 9600 ബസ് എത്തി
കെഎസ്ആർടിസിയുടെ നവീകരണ പദ്ധതിയുടെ ഭാഗമായി പുതിയ ബസുകളുടെ നിരയിൽ വോൾവോയുടെ ആഡംബര ബസ് എത്തി. മൾട്ടി ആക്സിൽ മോഡലായ വോൾവോ 9600 സീറ്റർ ആണ് കെ.എസ്.ആർ.ടി.സിക്കായി വാങ്ങിയിരിക്കുന്നത്. ഇന്ത്യയിലെ എക്സ്ഷോറൂം വില 1.30 കോടി മുതൽ 2 കോടി രൂപ വരെയാണ്.
റീബ്രാൻഡിംഗിന്റെ ഭാഗമായി സീറ്റർ, സ്ലീപ്പർ ബസുകൾക്ക് നൽകിയ ത്രിവർണ കളർ തീമിലാണ് വോൾവോയും ഒരുക്കിയിരിക്കുന്നത്. വിപണിയിൽ സ്ലീപ്പർ മോഡലും ലഭ്യമായിരുന്നാലും, കെ.എസ്.ആർ.ടി.സിക്ക് എത്തിയിരിക്കുന്നത് സീറ്റർ മോഡലാണ്. സ്ലീപ്പർ പതിപ്പും വരുമോയെന്ന കാര്യത്തിൽ ഇപ്പോൾ വ്യക്തതയില്ല.
വോൾവോ 9600 മൂന്ന് വലിപ്പങ്ങളിൽ ലഭ്യമാണ് — 12.2 മീറ്റർ, 13.5 മീറ്റർ, 15 മീറ്റർ. ഇതിൽ 15 മീറ്റർ നീളമുള്ള മോഡലാണ് കെ.എസ്.ആർ.ടി.സിക്ക് എത്തിയത്. 55 സീറ്റുകളുള്ള 2+2 ലേഔട്ടിലാണ് യാത്രാസൗകര്യം. സീറ്റർ മോഡലിന് 3800 എംഎം ഉയരവും, സ്ലീപ്പർ മോഡലിന് 4000 എംഎം ഉയരവും ഉണ്ട്. ബസിന്റെ വീതി 2600 എംഎം, വീൽബേസ് 8340 എംഎം.
ശക്തിക്കായി 346 എച്ച്.പി. കരുത്ത് നൽകുന്ന ഡിബികെ 6350 കോമൺ റെയിൽ ഡീസൽ എൻജിനാണ് ഉൾപ്പെടുത്തിയിരിക്കുന്നത്. 1200–1600 ആർപിഎമ്മിൽ 1350 എൻഎം ടോർക്ക് ഉൽപാദിപ്പിക്കുന്നു. 12 ഫോർവേഡ്, 4 റിവേഴ്സ് ഗിയറുകളുള്ള ഐ-ഷിഫ്റ്റ് ഓട്ടോമേറ്റഡ് മാനുവൽ ഗിയർബോക്‌സ് ആണ് ട്രാൻസ്മിഷൻ. 540 ലിറ്റർ ഡീസൽ ടാങ്കും 50 ലിറ്റർ ആഡ്‌ബ്ലൂ ടാങ്കുമുണ്ട്.
കെ.എസ്.ആർ.ടി.സി.യ്ക്ക് ആകെ 143 പുതിയ ബസുകളാണ് വാങ്ങിയിരിക്കുന്നത്. ഇവ ഫാസ്റ്റ് പാസഞ്ചർ, സൂപ്പർഫാസ്റ്റ്, ഫാസ്റ്റ് പാസഞ്ചർ ലിങ്ക്, പ്രീമിയം സീറ്റർ, സ്ലീപ്പർ, സീറ്റർ-കം-സ്ലീപ്പർ, ഓർഡിനറി സർവീസുകൾക്കായി വിന്യസിക്കും. അന്തർസംസ്ഥാന പാതകളിൽ സേവനത്തിനായി വോൾവോയുടെ ആഡംബര ബസിനെയും ഉൾപ്പെടുത്തിയിട്ടുണ്ട്.
അശോക് ലെയ്‌ലാൻഡിന്റെ 13.5 മീറ്റർ ഗാർഡ് ചാസിസിൽ സ്ലീപ്പറും സീറ്റർ-കം-സ്ലീപ്പർ ബസുകളും ഒരുക്കിയിട്ടുണ്ട്. ഫാസ്റ്റ് പാസഞ്ചർ, സൂപ്പർഫാസ്റ്റ് സർവീസിനായി ടാറ്റയുടെ ബസുകൾ എത്തിയപ്പോൾ, തുടർന്ന് എത്തിയവയിൽ ഭൂരിഭാഗവും ലെയ്‌ലാൻഡിനുടേതാണ്. ഫാസ്റ്റ് പാസഞ്ചർ ലിങ്കിനായി 10.5 മീറ്റർ ലെയ്‌ലാൻഡ് ഷാസിയും, ഓർഡിനറി സർവീസിനായി ഐഷറിന്റെ 8.5 മീറ്റർ മോഡലും തെരഞ്ഞെടുത്തു.
Tag: KSRTC gets a facelift; KSRTC gets new Volvo 9600 bus
