ഇഡി ഹൈദരലി ശിഹാബ് തങ്ങളെ ചോദ്യം ചെയ്തുവെന്ന് കെ.ടി ജലീല്‍
തിരുവനന്തപുരം: എന്‍ഫോഴ്‌സ്‌മെന്റ് ഡയറക്‌ട്രേറ്റ് (ഇഡി) ഹൈദരലി ശിഹാബ് തങ്ങള്‍ക്ക് ചോദ്യം ചെയ്യലിനായി നേരിട്ട് ഹാജരാകാന്‍ നോട്ടീസ് നല്‍കിയതായി കെ ടി ജലീല്‍. ജൂലൈ 24ന് ഹാജരാകാനായിരുന്നു നോട്ടീസെന്നും ഇഡി പാണക്കാട് നേരിട്ടെത്തി മൊഴിയെടുത്തുവെന്നുമാണ് ജലീല്‍ പറയുന്നത്. നോട്ടീസിന്റെ പകര്‍പ്പ് ജലീല്‍ വാര്‍ത്താസമ്മേളനത്തില്‍ പുറത്ത് വിട്ടു.
ആദായനികുതി വകുപ്പ് രേഖകള്‍ ഹാജരാക്കണമെന്നാവശ്യപ്പെട്ട് നല്‍കിയ നോട്ടീസിലെ ആദ്യ പേര് കുഞ്ഞാലിക്കുട്ടിയുടെ മകന്റേതാണെന്നും ജലീല്‍ പറയുന്നു. സഹകരണ ബാങ്കിലെ മൂന്നര കോടി ആരാണ് പിന്‍വലിച്ചത് എന്ന് പരിശോധിക്കണം, അന്വേഷണം വേണം. കുഞ്ഞാലിക്കുട്ടിയുടെയും മകന്റെയും ഇടപാടുകള്‍ അന്വേഷിക്കണമെന്നാവശ്യപ്പെട്ട് ഇഡിക്ക് പരാതി നല്‍കുമെന്നും ജലീല്‍ പറഞ്ഞു.
പാണക്കാട് തങ്ങളെ ചതിക്കുഴിയില്‍ ചാടിച്ചുവെന്നാണ് ജലീലിന്റെ ആരോപണം. എ ആര്‍ നഗര്‍ ബാങ്ക് ഭരണ സമിതി പിരിച്ചുവിടണമെന്നും ജലീല്‍ ആവശ്യപ്പെട്ടു.
കുഞ്ഞാലിക്കുട്ടി വ്യാപകമായി കള്ളപ്പണം വെളുപ്പിച്ചിട്ടുണ്ട്. ലീഗിനേയും ലീഗ് സ്ഥാപനങ്ങളേയും ഇതിനായി ഉപയോഗിച്ചു. ഇബ്രാഹീംകുഞ്ഞ് വഴി കള്ളപ്പണം വെളുപ്പിക്കാന്‍ കുഞ്ഞാലിക്കുട്ടി ശ്രമിച്ചു. കുഞ്ഞാലിക്കുട്ടിയുടേയും മകന്റെയും സാമ്ബത്തിക സ്രോതസുകള്‍ ദുരൂഹമാണെന്നും ജലീല്‍ ആരോപിച്ചു.
