തദ്ദേശ തിരഞ്ഞെടുപ്പ് പ്രഖ്യാപനം നവംബര്‍ രണ്ടിന് ശേഷം; ഡിസംബര്‍ ആദ്യ ആഴ്ചയില്‍ വോട്ടെടുപ്പ് തുടങ്ങും

സംസ്ഥാനത്ത് തദ്ദേശസ്വയംഭരണ തിരഞ്ഞെടുപ്പിന്റെ തീയതി അടുത്ത രണ്ടാഴ്ചയ്ക്കുള്ളിൽ പ്രഖ്യാപിക്കാനാണ് സാധ്യത. ഇതിന്റെ പശ്ചാത്തലത്തിൽ, ക്ഷേമ പെൻഷൻ വർധന ഉൾപ്പെടെയുള്ള ജനപ്രിയ പദ്ധതികൾ പ്രഖ്യാപിക്കാൻ സർക്കാർ ഒരുങ്ങുകയാണ്. പെൻഷൻ 200 രൂപ വരെ വർധിപ്പിക്കാനുള്ള നീക്കമാണ് നടക്കുന്നത്. നവംബർ ഒന്നിന് ശേഷം പ്രഖ്യാപനം നടത്തുന്നത് മതിയെന്ന നിലപാടിലാണ് സർക്കാർ. അതിദരിദ്രരില്ലാ കേരളം പദ്ധതിയുടെ പ്രഖ്യാപനം നവംബർ ഒന്നിന് നിയമസഭയിൽ നടക്കും. ആ പ്രഖ്യാപനം മുഖ്യ വിഷയമാകേണ്ടതിനാൽ മറ്റ് വലിയ പ്രഖ്യാപനങ്ങൾ അതിന് മുൻപ് ഒഴിവാക്കാനാണ് തീരുമാനം. മന്ത്രിസഭ നിയമസഭ വിളിച്ചു ചേർക്കാൻ നേരത്തെ തീരുമാനിച്ചിരുന്നു. അതിനാൽ നവംബർ രണ്ടോടെ തദ്ദേശ തിരഞ്ഞെടുപ്പ് പ്രഖ്യാപിക്കപ്പെടാനാണ് സാധ്യത. നവംബർ അവസാനം അല്ലെങ്കിൽ ഡിസംബർ ആദ്യം വോട്ടെടുപ്പ് നടക്കുമെന്നാണ് സൂചന. തിരഞ്ഞെടുപ്പ് രണ്ടു ഘട്ടങ്ങളിലായിരിക്കും, കൂടുതൽ സാധ്യത ഡിസംബർ ആദ്യ ആഴ്ചയ്ക്കാണ്.

അടുത്ത വർഷം നിയമസഭാ തിരഞ്ഞെടുപ്പ് നടക്കുന്നതിനാൽ ഈ തദ്ദേശ തിരഞ്ഞെടുപ്പ് എല്ലാ രാഷ്ട്രീയ പാർട്ടികൾക്കും നിർണായകമായിരിക്കും. സിപിഎം, കോൺഗ്രസ്, ബിജെപി തുടങ്ങിയ പ്രധാന പാർട്ടികൾ ഇതിനായി ശക്തമായ തയ്യാറെടുപ്പിലാണ്. സംസ്ഥാന തിരഞ്ഞെടുപ്പ് കമ്മീഷണർ എ. ഷാജഹാൻ നേരത്തെ പറഞ്ഞതുപോലെ നവംബർ-ഡിസംബർ മാസങ്ങളിൽ തെരഞ്ഞെടുപ്പ് നടക്കും. വോട്ടർ പട്ടിക പുതുക്കൽ നടപടികൾ ഒരുതവണ കൂടി പൂർത്തിയാക്കും. ഡിസംബർ 20നകം പുതിയ ഭരണസമിതി ചുമതലയേൽക്കണമെന്നും അദ്ദേഹം വ്യക്തമാക്കിയിരുന്നു. അതനുസരിച്ച് ഡിസംബർ 10നോട് അടുക്കെ വോട്ടെണ്ണൽ നടക്കും.

ഈ തവണ തദ്ദേശ തിരഞ്ഞെടുപ്പ് പൂർണ്ണമായും ഹരിത ചട്ടങ്ങൾ പാലിച്ചായിരിക്കും. തെരഞ്ഞെടുപ്പ് പ്രഖ്യാപനം മുതൽ ഫലപ്രഖ്യാപനം വരെയെല്ലാം പരിസ്ഥിതിസൗഹൃദമായ രീതിയിലാണ് നടപടികൾ. തദ്ദേശവകുപ്പ്, ശുചിത്വ മിഷൻ, ക്ലീൻ കേരള കമ്പനി, കുടുംബശ്രീ, ഹരിതകർമസേന എന്നിവയുടെ സഹകരണത്തോടെയാകും ഇത് നടപ്പാക്കുന്നത്. സംസ്ഥാനത്തും ജില്ലകളിലും നിരീക്ഷണ സമിതികൾ രൂപീകരിക്കും.

പ്രചാരണ സാമഗ്രികളിൽ നിരോധിത വസ്തുക്കൾ ഉപയോഗിക്കരുതെന്നും, അത് കണ്ടെത്തിയാൽ പിഴ ഈടാക്കുമെന്നും കമ്മീഷൻ മുന്നറിയിപ്പ് നൽകി. പരിസ്ഥിതി മലിനീകരണം, ശബ്ദ മലിനീകരണം തുടങ്ങിയ വിഷയങ്ങളിൽ പൊതുജനാഭിപ്രായം തേടിയിട്ടുണ്ട്. പഞ്ചായത്തുകളിലെ സംവരണ വാർഡുകളുടെ നറുക്കെടുപ്പ് നാളെയോടെ പൂർത്തിയാകും.

തെരഞ്ഞെടുപ്പ് വിജ്ഞാപനം പുറപ്പെടുവിക്കുന്നതിനു മുൻപായി സർക്കാർ ജീവനക്കാരുടെ സ്ഥലംമാറ്റങ്ങൾക്ക് വിലക്ക് ഏർപ്പെടുത്തിയിട്ടുണ്ട്. സർക്കാർ വകുപ്പുകൾ, പൊതുമേഖലാ സ്ഥാപനങ്ങൾ, തദ്ദേശ സ്ഥാപനങ്ങൾ, സർവകലാശാലകൾ തുടങ്ങി എല്ലാ സ്ഥാപനങ്ങളിലെയും ജീവനക്കാരുടെ സ്ഥലംമാറ്റങ്ങൾ വിലക്കിനുള്ളിലാണ്. ഭരണപരമായ അടിയന്തര സാഹചര്യം ഉണ്ടെങ്കിൽ തിരഞ്ഞെടുപ്പ് കമ്മീഷന്റെ മുൻകൂർ അനുമതി വേണം.

വോട്ടർ പട്ടിക പുതുക്കലുമായി ബന്ധപ്പെട്ട ജീവനക്കാർക്ക് വിലക്ക് ബാധകമല്ല. തദ്ദേശ സ്ഥാപനങ്ങളിലെ ഒഴിവുകൾ ഉടൻ നികത്തണം. ഒക്ടോബർ മൂന്നിന് മുമ്പ് പുറപ്പെടുവിച്ച സ്ഥലംമാറ്റ ഉത്തരവുകൾ നടപ്പാക്കാമെന്ന് കമ്മീഷൻ വ്യക്തമാക്കി.

തെരഞ്ഞെടുപ്പിന്റെ സുതാര്യത ഉറപ്പാക്കാൻ പ്രശ്‌നബാധിത പോളിംഗ് സ്റ്റേഷനുകളിൽ വെബ്കാസ്റ്റിംഗ് ഏർപ്പെടുത്തും. മുൻ തെരഞ്ഞെടുപ്പുകളിൽ രേഖപ്പെടുത്തിയ വോട്ടിംഗ് പാറ്റേണുകൾ പരിഗണിച്ച് ഇത്തവണയും അത്തരത്തിലുള്ള ബൂത്തുകളിലാണ് വെബ്കാസ്റ്റിംഗ് നടപ്പാക്കുക. വോട്ടിങ് ശതമാനം വളരെ കൂടുതലായതോ വളരെ കുറഞ്ഞതോ ആയ കേന്ദ്രങ്ങൾ, ക്രമസമാധാന പ്രശ്നങ്ങൾ ഉണ്ടായ സ്ഥലങ്ങൾ തുടങ്ങിയവയെല്ലാം സൂക്ഷ്മമായി നിരീക്ഷിക്കും. ന്യൂനപക്ഷങ്ങൾ, പട്ടികജാതി/വർഗ വിഭാഗങ്ങൾ, സാമൂഹ്യ-സാമ്പത്തികമായി പിന്നാക്ക പ്രദേശങ്ങൾ എന്നിവിടങ്ങളിലും പ്രത്യേക ശ്രദ്ധ നൽകും. വോട്ടിനായി പണം വിതരണം, ഭീഷണി, അക്രമം തുടങ്ങിയ പരാതികൾ ലഭിക്കുന്ന മേഖലകളിലും അന്വേഷണം ശക്തമാക്കുമെന്നും കമ്മീഷൻ അറിയിച്ചു.

Tag: Local body elections to be announced after November 2; voting to begin in the first week of December