മലപ്പുറം ജില്ലയിലെ ട്രിപ്പിൾ ലോക്ക് ഡൗൺ പിൻവലിച്ചു

മലപ്പുറം : ജില്ലയിൽ ഈ ആഴ്ചയോടെ ടെസ്റ്റ് പോസിറ്റിവിറ്റി റേറ്റ് ഗണ്യമായി കുറഞ്ഞ സാഹചര്യത്തിൽ ട്രിപ്പിൾ ലോക്ഡൗൺ പിൻവലിച്ചു. മറ്റു ജില്ലകളിലേത് പോലെ സാധാരണ ലോക്ഡൗണാകും തിങ്കളാഴ്ച മുതൽ മലപ്പുറത്തും ഉണ്ടാകുക. കോവിഡ് അതിതീവ്ര വ്യാപനത്തെ തുടർന്ന് മലപ്പുറമടക്കം നാല് ജില്ലകളിലായിരുന്നു സംസ്ഥാനത്ത് ട്രിപ്പിൾ ലോക്ഡൗൺ പ്രഖ്യാപിച്ചിരുന്നത്. എന്നാൽ ടെസ്റ്റ് പോസിറ്റിവിറ്റി നിരക്ക് കുറഞ്ഞതോടെ മറ്റു മൂന്ന് ജില്ലകളിലെ ട്രിപ്പിൾ ലോക്ഡൗൺ ഒരാഴ്ച മുമ്പ് പിൻവലിച്ചിരുന്നു.

മലപ്പുറത്ത് വെള്ളിയാഴ്ച 13.3 ശതമാനമാണ് ടെസ്റ്റ് പോസിറ്റിവിറ്റി നിരക്ക് രേഖപ്പെടുത്തിയത്. സംസ്ഥാനത്തുടനീളം ലോക്ഡൗൺ ഇളവുകളോടെ ജൂൺ ഒമ്പത് വരെ നീട്ടിയിരുന്നു. അതേ സമയം ഞായറാഴ്ച മലപ്പുറത്ത് പ്രഖ്യാപിച്ച കർശന നിയന്ത്രണം നിലവിൽ ജില്ലാ കളക്ടർ പിൻവലിച്ചിട്ടില്ല. അവശ്യസാധനങ്ങൾ വിൽക്കുന്ന കടകളും നാളെ തുറക്കില്ലെന്നാണ് അറിയിപ്പ്.