“ഞാനെന്താ പഴയതാണോ? ഞാനും ഈ തലമുറയിലെ ആളല്ലേ,” പുരസ്കാരത്തിനു പിന്നാലെ മമ്മൂട്ടിയുടെ മറുപടി

സംസ്ഥാന ചലച്ചിത്ര പുരസ്കാരങ്ങൾ പ്രഖ്യാപിച്ചതിന് പിന്നാലെ നടൻ മമ്മൂട്ടി മാധ്യമങ്ങളോട് പ്രതികരിച്ചു. “എല്ലാവർക്കും നന്ദി. എന്റെ കൂടെ പുരസ്കാരം നേടിയ എല്ലാവർക്കും ഹൃദയം നിറഞ്ഞ ആശംസകൾ. ആസിഫിനും ടൊവിനോയ്ക്കും, ഷംല ഹംസയ്ക്കും, സിദ്ധാർത്ഥ് ഭരതനും, സൗബിനും അഭിനന്ദനങ്ങൾ. അമൽ നീരദ് ടീമിനും മഞ്ഞുമ്മൽ ബോയ്സ് ടീമിനും അഭിനന്ദനങ്ങൾ. ലഭിക്കാത്തവർക്ക് അടുത്ത തവണ തീർച്ചയായും ലഭിക്കും,” — കൊച്ചിയിൽ മാധ്യമങ്ങളോട് മമ്മൂട്ടി പറഞ്ഞു.

“കഥയും കഥാപാത്രവും എല്ലാം വ്യത്യസ്തമാണ്. ഇത് ഒരു യാത്രയാണ്, അതിൽ ഒത്തിരി പേരാണ് കൂടെ നടക്കുന്നത്. ഇതൊന്നും ഒരു മത്സരം അല്ല,” — മമ്മൂട്ടി കൂട്ടിച്ചേർത്തു. ‘പുതുതലമുറയാണ് ഇത്തവണ അവാർഡുകൾ നേടിയതെന്ന വിലയിരുത്തലിനെ’ കുറിച്ചും മമ്മൂട്ടി പ്രതികരിച്ചു. “ഞാനെന്താ പഴയതാണോ? ഞാനും ഈ തലമുറയിലെ ആളല്ലേ,” മമ്മൂട്ടി ചിരിയോടെ മറുപടി നൽകി.

ഭ്രമയുഗം എന്ന ചിത്രത്തിലെ കൊടുമൺ പോറ്റി എന്ന കഥാപാത്രാവിഷ്‌കരണത്തിനാണ് മമ്മൂട്ടിക്ക് മികച്ച നടനുള്ള 55-ാമത് സംസ്ഥാന ചലച്ചിത്ര പുരസ്കാരം ലഭിച്ചത്. രാഹുൽ സദാശിവൻ സംവിധാനം ചെയ്ത ഈ ചിത്രത്തിന് സംഗീതം ഒരുക്കിയത് ക്രിസ്റ്റോ സേവ്യറാണ്. അർജുൻ അശോകൻ, സിദ്ധാർത്ഥ് ഭരതൻ തുടങ്ങിയവരും പ്രധാന വേഷങ്ങളിൽ അഭിനയിച്ചു.

അതേസമയം, മഞ്ഞുമ്മൽ ബോയ്സ് മികച്ച ചിത്രത്തിനുള്ള അവാർഡ് സ്വന്തമാക്കി. ഫെമിനിച്ചി ഫാത്തിമ എന്ന ചിത്രത്തിലൂടെ ഷംല ഹംസ മികച്ച നടിയായി തെരഞ്ഞെടുത്തു.

Tag;”Am I old? Aren’t I also from this generation?” Mammootty’s response after the award