മാരുതി സുസുക്കിയുടെ ആദ്യ ഇലക്ട്രിക് വാഹനം ഇന്ത്യയിൽ; ഇ-വിറ്റാരയുടെ ഫ്‌ലാഗ് ഓഫ് ചടങ്ങ് പ്രധാനമന്ത്രി നരേന്ദ്ര മോദി നിർവഹിച്ചു

ഗുജറാത്തിലെ ഹൻസൽപൂർ പ്ലാന്റിൽ നിർമ്മിച്ച മാരുതി സുസുക്കിയുടെ ആദ്യ ഇലക്ട്രിക് എസ്‌യുവിയായ ഇ-വിറ്റാരയുടെ ഫ്‌ലാഗ് ഓഫ് ചടങ്ങ് പ്രധാനമന്ത്രി നരേന്ദ്ര മോദി നിർവഹിച്ചു. തദ്ദേശീയമായി നിർമ്മിക്കുന്ന ഈ വാഹനം ജപ്പാൻ ഉൾപ്പെടെ 100-ലധികം രാജ്യങ്ങളിലേക്ക് കയറ്റുമതി ചെയ്യും.

അതോടൊപ്പം സുസുക്കി–തോഷിബ–ഡെൻസോ സംയുക്തമായി സ്ഥാപിച്ച ലിഥിയം-അയൺ ബാറ്ററി നിർമ്മാണ കേന്ദ്രവും പ്രധാനമന്ത്രി ഉദ്ഘാടനം ചെയ്തു. കഴിഞ്ഞ വർഷം യൂറോപ്പിൽ ഗ്ലോബൽ അവതരണം നടത്തിയ ഇ-വിറ്റാരയെ ഇന്ത്യയിൽ ആദ്യമായി 2025 ഭാരത് മൊബിലിറ്റി ഷോയിൽ പ്രദർശിപ്പിച്ചിരുന്നു.

ഇ-വിറ്റാര രണ്ട് ബാറ്ററി ഓപ്ഷനുകളോടെ വിപണിയിൽ എത്തും – 49kWh, 61kWh. വകഭേദങ്ങൾ, സവിശേഷതകൾ, ലോഞ്ച് തീയതി എന്നിവ ഉടൻ പ്രഖ്യാപിക്കുമെന്ന് പ്രതീക്ഷിക്കുന്നു. ഇന്ത്യയിലെ പ്രാരംഭ വില ഏകദേശം ₹20 ലക്ഷം ആയിരിക്കുമെന്ന് സൂചന.

ഹൻസൽപൂരിലെ മാരുതി സുസുക്കി പ്ലാന്റ് ഇന്ത്യയിലെ വലിയ ഓട്ടോമോട്ടീവ് നിർമ്മാണ കേന്ദ്രങ്ങളിൽ ഒന്നാണ്. വാർഷികമായി 7.5 ലക്ഷം കാറുകൾ നിർമ്മിക്കാൻ ശേഷിയുള്ള ഈ അത്യാധുനിക യൂണിറ്റ്, 2017-ൽ പ്രവർത്തനം ആരംഭിച്ചതാണ്. പൂർണമായും സുസുക്കി മോട്ടോർ കോർപ്പറേഷന്റെ ഉടമസ്ഥതയിലുള്ള പ്ലാന്റ്, നൂറുകണക്കിന് ഏക്കറിൽ വ്യാപിച്ചുകിടക്കുന്നു.

വാഹനങ്ങളുടെ നിര നിരയായി സജ്ജീകരിച്ച യാർഡ് ദൃശ്യങ്ങൾ ഇതിനോടകം പുറത്തുവന്നിട്ടുണ്ട്. കമ്പനിയുടെ ആകെ ഉൽപ്പാദനത്തിന്റെ 2–3 ശതമാനം മാത്രമാണ് ഇപ്പോൾ ദൃശ്യമാകുന്നത്.

Tag: Maruti Suzuki’s first electric vehicle in India; Prime Minister Narendra Modi flagged off the e-Vitara