നിർബന്ധിത സൈനിക സേവനത്തിനെതിരെ ഇസ്രയേലിൽ വൻ പ്രതിഷേധം; ഒരാൾ മരിച്ചു

ഇസ്രയേലിൽ നിർബന്ധിത സൈനിക സേവനത്തിനെതിരെ അതീവ യാഥാസ്ഥിതിക ജൂത വിഭാഗമായ ഹരേദികൾ വൻ പ്രതിഷേധവുമായി തെരുവിലിറങ്ങി. ‘ദശലക്ഷം പേരുടെ പ്രതിഷേധം’ എന്ന പേരിൽ സംഘടിപ്പിച്ച ഈ മഹാസംഗമം പിന്നീട് സംഘർഷത്തിലും ഒരു യുവാവിന്റെ ദുരൂഹമരണത്തിലും കലാശിച്ചു. വ്യാഴാഴ്ച ഉച്ചയോടെ ജറുസലേമിലെ പ്രധാന പ്രവേശന കവാടം തടഞ്ഞുകൊണ്ട് രണ്ട് ലക്ഷത്തിലധികം ഹരേദികൾ പ്രതിഷേധത്തിൽ പങ്കെടുത്തു.

പ്രകടനം നിരീക്ഷിക്കാൻ സമീപത്തെ ബഹുനില കെട്ടിടത്തിലേക്ക് കയറിനിന്ന യുവാവ് താഴേക്ക് വീണ് മരണപ്പെട്ടു. മരിച്ച യുവാവിനെ മെനാഹേം മെൻഡൽ ലിറ്റ്‌സ്‌മാൻ (20) എന്ന് തിരിച്ചറിഞ്ഞു. ആത്മഹത്യയാണോ അപകടമരണമാണോ എന്ന് കണ്ടെത്താൻ പൊലീസ് അന്വേഷണം ആരംഭിച്ചു. നഗരമധ്യത്തിലെ പണിതീരാത്ത കെട്ടിടത്തിൽ നിന്നാണ് യുവാവ് വീണത്. സംഭവവിവരം പുറത്തുവന്നതോടെ പ്രതിഷേധ സംഘാടകർ പരിപാടി അവസാനിപ്പിച്ചതായി പ്രഖ്യാപിക്കുകയും, പങ്കെടുക്കുന്നവരെ സുരക്ഷിതമായി പിരിഞ്ഞുപോകാൻ അഭ്യർത്ഥിക്കുകയും ചെയ്തു.

എന്നാൽ പ്രതിഷേധം അവസാനിച്ചതിന് പിന്നാലെ ചിലർ അക്രമാസക്തരായി മാറി. പ്രതിഷേധക്കാർ മാധ്യമപ്രവർത്തകരെ ആക്രമിക്കുകയും പൊലീസുമായി ഏറ്റുമുട്ടലുകളും നടക്കുകയും ചെയ്തു. പ്രാർത്ഥനാ റാലിയായി പ്രഖ്യാപിച്ച പരിപാടിയിൽ ഏകദേശം 2,00,000 പേർ പങ്കെടുത്തുവെങ്കിലും, അവരുടെ ഇടയിൽ ചിലർ അതിക്രമങ്ങൾ നടത്തിയതായി റിപ്പോർട്ടുകൾ സൂചിപ്പിക്കുന്നു. വനിതാ മാധ്യമപ്രവർത്തകരുടെ നേരെ തത്സമയ സംപ്രേഷണത്തിനിടെ വെള്ളക്കുപ്പികളും മറ്റു വസ്തുക്കളും എറിഞ്ഞ സംഭവങ്ങളും ഉണ്ടായി. പൊലീസിന്റെ സംരക്ഷണത്തോടെയാണ് മാധ്യമങ്ങൾ റിപ്പോർട്ടിങ് തുടരേണ്ടിവന്നത്.

സമരക്കാരെ പിരിച്ചുവിടാൻ പൊലീസ് ബലംപ്രയോഗിച്ചതോടെ നിരവധി ഇടങ്ങളിൽ ഏറ്റുമുട്ടലുകൾ ഉണ്ടായി. പ്രതിഷേധം അവസാനിച്ചതായി പ്രഖ്യാപിച്ചിട്ടും നൂറുകണക്കിന് യുവാക്കൾ ജറുസലേം നഗരത്തിൽ പൊലീസ് ഉദ്യോഗസ്ഥരുമായി തുടർ സംഘർഷത്തിൽ ഏർപ്പെട്ടു. ലിറ്റ്‌സ്‌മാൻ വീണു മരിച്ച സ്ഥലത്തേക്ക് പ്രവേശിക്കാൻ ശ്രമിച്ചവരെ തടയാൻ പൊലീസ് ശക്തമായ നടപടി സ്വീകരിച്ചു.

Tag: Massive protests in Israel against compulsory military service; one dead