അനുഭവിച്ചോളു എന്ന് പറഞ്ഞത് മോശം അര്‍ഥത്തിലല്ല; മാധ്യമങ്ങളോട് ക്ഷുഭിതയായി ജോസഫൈന്‍
കൊല്ലം: വിവാദ പരാമര്‍ശത്തില്‍ പ്രതികരണവുമായി വനിത കമ്മീഷന്‍ അധ്യക്ഷ എം.സി ജോസഫൈന്‍. യുവതിയോട് ‘അനുഭവിച്ചോളു’ എന്ന് പറഞ്ഞത് മോശം അര്‍ഥത്തിലല്ലെന്ന് ജോസഫൈന്‍ പറഞ്ഞു. പൊലീസില്‍ പരാതിപ്പെടേണ്ട കേസായിരുന്നു അത്. അതിനാലാണ് അങ്ങനെ പറഞ്ഞതെന്നും അധ്യക്ഷ വ്യക്തമാക്കി.
ഭീഷണിയും പ്രകോപനവും അല്ല വേണ്ടത്. തന്നെ നിയമിച്ചത് യൂത്ത് കോണ്‍ഗ്രസല്ല. സര്‍ക്കാറിന് എന്ത് തീരുമാനവും എടുക്കാമെന്നും അവര്‍ പറഞ്ഞു. ഇതുമായി ബന്ധപ്പെട്ടുള്ള മാധ്യമ പ്രവര്‍ത്തകരുടെ ചോദ്യങ്ങള്‍ ക്ഷുഭിതയായാണ് ജോസഫൈന്‍ പ്രതികരിച്ചത്. കൊല്ലത്ത് ഭര്‍തൃഗൃഹത്തില്‍ മരിച്ച വിസ്മയയുടെ വീട് സന്ദര്‍ശിച്ച ശേഷമായിരുന്നു ജോസഫൈന്‍റെ പ്രതികരണം.
സ്വകാര്യ ചാനലില്‍ നടന്ന ലൈവ് ഷോയില്‍ ഗാര്‍ഹികപീഡന പരാതി പറഞ്ഞ യുവതിയോടുള്ള ജോസഫൈന്‍റെ പ്രതികരണമാണ് വിവാദമായത്. ‘2014ല്‍ ആണ് കല്യാണം കഴിഞ്ഞത്. ഭര്‍ത്താവ് വിദേശത്ത് പോയ ശേഷം അമ്മായിയമ്മ ശാരീരികമായി മര്‍ദ്ദിക്കുകയും മാനസികമായി പീഡിപ്പിക്കുകയും ചെയ്യാറുണ്ട്. ഭര്‍ത്താവില്‍ നിന്നും സമാനമായ പീഡനമേറ്റതായും യുവതി വനിതാകമീഷന് േഫാണിലൂടെ നല്‍കിയ പരാതിയില്‍ പറഞ്ഞിരുന്നു.
ഇത് കേട്ട ഉടന്‍ നിങ്ങള്‍ എന്ത് കൊണ്ട് െപാലീസില്‍ പരാതി നല്‍കിയില്ലെന്നാണ് ജോസഫൈന്‍ ചോദിച്ചത്. ഞാന്‍ ആരെയും അറിയിച്ചില്ലെന്ന് യുവതി മറുപടി നല്‍കുന്നുണ്ട്. എന്നാല്‍ പിന്നെ അനുഭവിച്ചോ എന്നാണ് യുവതിക്ക് ജോസഫൈന്‍ നല്‍കിയ മറുപടി.
