ലൈഫ് മിഷൻ പദ്ധതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസ്; മുഖ്യമന്ത്രിയുടെ മകന് ഇഡി സമൻസ് അയച്ചതായി റിപ്പോർട്ട്

ലൈഫ് മിഷൻ പദ്ധതിയുമായി ബന്ധപ്പെട്ട കള്ളപ്പണം വെളുപ്പിക്കൽ കേസിൽ മുഖ്യമന്ത്രി പിണറായി വിജയന്റെ മകൻ വിവേക് കിരൺ വിജയന്‌ 2023-ൽ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) സമൻസ് അയച്ചതായി റിപ്പോർട്ടുകൾ വ്യക്തമാക്കുന്നു. കേസിൽ സാക്ഷിയായി ഹാജരാകാൻ ആവശ്യപ്പെട്ടാണ് ഇഡി സമൻസ് അയച്ചത്.

നയതന്ത്ര സ്വർണ്ണക്കടത്ത് കേസിന്റെ അന്വേഷണത്തിനിടെ വടക്കാഞ്ചേരി ലൈഫ് മിഷൻ ഭവനപദ്ധതിയിൽ ക്രമക്കേടുകൾ കണ്ടെത്തിയതിനെ തുടർന്നാണ് സമൻസ് നൽകിയത്. സമൻസ് ക്ലിഫ് ഹൗസിന്റെ വിലാസത്തിലേക്കാണ് അയച്ചത്. എന്നാൽ, വിവേക് കിരൺ ഇഡിയുടെ മുന്നിൽ ഹാജരായിരുന്നില്ല എന്നും തുടർന്ന് ഇഡി കൂടുതൽ നടപടികൾ സ്വീകരിച്ചില്ലെന്നും റിപ്പോർട്ടുകൾ പറയുന്നു.

2023 ഫെബ്രുവരി 14-ന് രാവിലെ 10.30-ന് ഇഡിയുടെ കൊച്ചി ഓഫീസിൽ ഹാജരാകണമെന്ന് സമൻസിൽ വ്യക്തമാക്കിയിരുന്നു. കേസുമായി ബന്ധപ്പെട്ട അന്വേഷണത്തിന്റെ ഭാഗമായി വിവരങ്ങൾ നൽകാനാണ് ആവശ്യപ്പെട്ടിരുന്നത്. അന്നത്തെ ഇഡി അസിസ്റ്റന്റ് ഡയറക്ടർ പി.കെ. ആനന്ദ് ആണ് നോട്ടീസ് അയച്ചത്.

ഇതേ കേസിൽ ഇഡിയുടെ ചോദ്യം ചെയ്യലിനൊടുവിൽ മുഖ്യമന്ത്രിയുടെ മുൻ പ്രിൻസിപ്പൽ സെക്രട്ടറി എം. ശിവശങ്കർ അറസ്റ്റിലായിരുന്നു. അതേ അന്വേഷണത്തിന്റെ ഭാഗമായി മുഖ്യമന്ത്രി പിണറായി വിജയന്റെ മകനിലേക്കും അന്വേഷണം വ്യാപിച്ചതായി ഇപ്പോൾ പുറത്തുവന്ന വിവരങ്ങൾ സൂചിപ്പിക്കുന്നു.

ഇഡിയുടെ ഔദ്യോഗിക വെബ്‌സൈറ്റിലെ രേഖകളാണ് ഈ വിവരം പുറത്തുവന്നതിന്റെ ആധാരം. എന്നാൽ മുഖ്യമന്ത്രിയും അദ്ദേഹത്തിന്റെ ഓഫീസും ഇതുസംബന്ധിച്ച് ഔദ്യോഗികമായി പ്രതികരിച്ചിട്ടില്ല.

2018-ലെ പ്രളയത്തിന് ശേഷം വീടുകൾ നഷ്ടപ്പെട്ടവർക്ക് വേണ്ടി വടക്കാഞ്ചേരിയിൽ റെഡ് ക്രസന്റ് മുഖേന ഫ്‌ളാറ്റ് സമുച്ചയം നിർമ്മിക്കുന്നതിനായുള്ള ലൈഫ് മിഷൻ പദ്ധതിയിലാണ് ഈ വിവാദം ആരംഭിച്ചത്. യൂണിടാക് ബിൽഡേഴ്സ് എന്ന സ്ഥാപനത്തിന് കരാർ ലഭിക്കുന്നതിനായി കോൺസുലേറ്റ് ഉദ്യോഗസ്ഥർക്കും എം. ശിവശങ്കർക്കും നാല് കോടിയിലധികം രൂപ കൈക്കൂലി നൽകിയതായി ഇഡി അന്വേഷണത്തിൽ കണ്ടെത്തിയിരുന്നു.

Tag: Money laundering case related to Life Mission project; ED summons CM’s son, reports