മുല്ലപ്പെരിയാർ അണക്കെട്ടിന്റെ സ്പിൽവേ ഷട്ടറുകൾ തുറന്നു; സെക്കൻഡിൽ 1063 ഘനയടി വെള്ളം പെരിയാറിലേക്ക്

മുല്ലപ്പെരിയാർ അണക്കെട്ടിന്റെ സ്പിൽവേ ഷട്ടറുകൾ തുറന്നു. മൂന്ന് ഷട്ടറുകൾ 75 സെന്റിമീറ്റർ വീതം ഉയർത്തി, സെക്കൻഡിൽ 1063 ഘനയടി വെള്ളം പെരിയാറിലേക്ക് ഒഴുക്കുകയാണ്. നിലവിൽ ഡാമിലെ ജലനിരപ്പ് 138.25 അടിയായി നിലകൊള്ളുന്നു.

മുല്ലപ്പെരിയാറിലെ മൂന്നു സ്പിൽവേ ഷട്ടറുകൾ കൂടി അടുത്ത ഘട്ടത്തിൽ 75 സെന്റിമീറ്റർ വീതം ഉയർത്തുമെന്ന് തമിഴ്നാട് അധികൃതർ അറിയിച്ചു. 137.70 അടിയാണ് റൂൾ കർവ് പരിധി, ഇത് മറികടന്നതിനെ തുടർന്നാണ് ജലനിരപ്പ് നിയന്ത്രിക്കാനായി ഷട്ടറുകൾ തുറന്നത്. ശനിയാഴ്ച പുലർച്ചെ 3.00 മണിക്ക് ഡാമിലെ ജലനിരപ്പ് 136.00 അടിയിലായിരുന്നു, എന്നാൽ മലയോര പ്രദേശങ്ങളിൽ ലഭിച്ച ശക്തമായ മഴ മൂലം ജലപ്രവാഹം ഗണ്യമായി വർധിച്ചിട്ടുണ്ട്.

പെരിയാർ നദിയുടെ ഇരുകരകളിലുമുള്ള ജനങ്ങൾ അതീവ ജാഗ്രത പാലിക്കണമെന്ന് ഇടുക്കി ജില്ലാ ഭരണകൂടം മുന്നറിയിപ്പ് നൽകി.

അതേസമയം, ഇടുക്കി ജില്ലയിൽ കഴിഞ്ഞ രാത്രിയിൽ പെയ്തത് തീവ്രമായ മഴയാണെന്ന് വിലയിരുത്തൽ. കൂട്ടാറിൽ 100 മില്ലിമീറ്ററും വെള്ളയാംകുടിയിൽ 188 മില്ലിമീറ്റർ മഴയും രേഖപ്പെടുത്തി. സംസ്ഥാനത്ത് ഇന്ന് കൂടി ശക്തമായ മഴ തുടരാനിടയുണ്ടെന്ന് കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി. പത്തനംതിട്ട, കോട്ടയം, എറണാകുളം, ഇടുക്കി, തൃശൂർ, പാലക്കാട്, മലപ്പുറം, കോഴിക്കോട്, വയനാട് ജില്ലകളിൽ യെല്ലോ അലർട്ട് പ്രഖ്യാപിച്ചിട്ടുണ്ട്. മലയോര മേഖലകളിൽ മഴ കനത്തേക്കാനാണ് സാധ്യത. ഉച്ചയ്ക്കുശേഷം ഇടിമിന്നലും കാറ്റോടുകൂടിയ മഴയും പ്രതീക്ഷിക്കപ്പെടുന്നു.

ശക്തമായ കാറ്റിനും കടൽ പ്രക്ഷുബ്ധതയ്ക്കും സാധ്യതയുള്ളതിനാൽ കേരള, കര്‍ണാടക, ലക്ഷദ്വീപ് തീരപ്രദേശങ്ങളിൽ മീൻപിടുത്തത്തിന് വിലക്കേർപ്പെടുത്തിയിട്ടുണ്ട്. തെക്കുകിഴക്കൻ അറബിക്കടലിനും സമീപമുള്ള ലക്ഷദ്വീപ് മേഖലയ്ക്കും മുകളിൽ നിലനിൽക്കുന്ന ചക്രവാത ചുഴി ന്യൂനമർദ്ദമായി ശക്തിപ്രാപിക്കുമെന്ന് കാലാവസ്ഥാ വകുപ്പ് അറിയിച്ചു.

Tag: Mullaperiyar Dam’s spillway shutters opened; 1063 cubic feet of water per second flows into Periyar