“ഗർഭിണിയാക്കാൻ കഴിയുന്ന പുരുഷനെ ആവശ്യമുണ്ട്” ; ഓൺലൈൻ പരസ്യത്തിൽ വിശ്വസിച്ച യുവാവിന് നഷ്ടമായത് 11 ലക്ഷം രൂപ

രാജ്യത്ത് സൈബർ തട്ടിപ്പുകൾ പുതിയ രൂപങ്ങളിൽ വ്യാപകമാകുന്ന പശ്ചാത്തലത്തിൽ, മഹാരാഷ്ട്രയിൽ നടന്ന ഒരു വിചിത്രമായ വഞ്ചനയാണ് ഇപ്പോൾ വാർത്തയാകുന്നത്. “ഗർഭിണിയാക്കാൻ കഴിയുന്ന പുരുഷനെ ആവശ്യമുണ്ട്” എന്ന ഓൺലൈൻ പരസ്യത്തിൽ വിശ്വസിച്ച യുവാവിന് 11 ലക്ഷം രൂപയുടെ നഷ്ടമാണ് ഉണ്ടായത്.

പരസ്യം കണ്ട യുവാവ് അതിൽ നൽകിയ നമ്പറിൽ ബന്ധപ്പെടുകയായിരുന്നു. കുറച്ച് ദിവസങ്ങൾക്കകം സ്വയം ഗർഭിണിയാകാൻ ആഗ്രഹിക്കുന്നതായി പറഞ്ഞ സ്ത്രീയുടെ വീഡിയോ അയച്ചതോടെയാണ് വിശ്വാസം കൂടുതൽ ശക്തമായത്. പിന്നാലെ ‘രജിസ്ട്രേഷൻ ഫീസ്’, ‘അംഗത്വ ഫീസ്’, ‘പ്രോസസിങ് ചാർജ്’ തുടങ്ങിയ പേരുകളിൽ യുവാവിൽ നിന്ന് ആകെ 11 ലക്ഷം രൂപ തട്ടിയെടുത്തു. വഞ്ചിക്കപ്പെട്ടുവെന്ന് മനസിലായതോടെ ഇയാൾ പൊലീസിൽ പരാതി നൽകി.

പ്രാഥമിക അന്വേഷണത്തിൽ, സംഭവം ‘ഓൾ ഇന്ത്യ പ്രഗ്നന്റ് ജോബ് സർവീസ്’ എന്ന പേരിൽ പ്രവർത്തിക്കുന്ന ഒരു ദേശീയ തല സൈബർ റാക്കറ്റുമായി ബന്ധപ്പെട്ടതാകാമെന്ന് പൊലീസ് കണ്ടെത്തിയിട്ടുണ്ട്. ഈ സംഘം 2022-23 കാലഘട്ടത്തിൽ ബിഹാറിലെ നവാഡ ജില്ലയിലാണ് ആരംഭിച്ചതെന്ന് അന്വേഷണത്തിൽ തെളിഞ്ഞു.
റാക്കറ്റുകൾ തൊഴിലില്ലാത്ത യുവാക്കളെയാണ് പ്രധാനമായും ലക്ഷ്യം വയ്ക്കുന്നത്. “കുട്ടികളില്ലാത്ത സ്ത്രീകളെ ഗർഭിണിയാക്കിക്കൊണ്ട് 5 മുതൽ 25 ലക്ഷം രൂപ വരെ സമ്പാദിക്കാം” എന്ന വാഗ്ദാനങ്ങളാണ് ഉപയോഗിക്കുന്നത്. ഫേസ്ബുക്ക്, വാട്‌സ്ആപ്പ്, ടെലഗ്രാം പോലുള്ള സോഷ്യൽ മീഡിയ പ്ലാറ്റ്‌ഫോമുകൾ വഴിയാണ് ഇവർ ഇരകളെ വലയിലാക്കുന്നത്.

തട്ടിപ്പിനായി പാൻ, ആധാർ, സെൽഫികൾ തുടങ്ങിയ വ്യക്തിഗത വിവരങ്ങൾ ആവശ്യപ്പെടുകയും, തുടർന്ന് രജിസ്ട്രേഷൻ ഫീസ്, സുരക്ഷാ നിക്ഷേപം, നികുതി, ഹോട്ടൽ ബുക്കിങ് എന്നിവയ്ക്കായി പണം ആവശ്യപ്പെടുകയും ചെയ്യും. പിന്നീടവർ ശിശുജനനവുമായി ബന്ധപ്പെട്ട് വ്യാജ രേഖകൾ നൽകി, കൂടുതൽ പണം ആവശ്യപ്പെടാനായി പോലീസ് കേസുകളെപ്പറ്റി പറഞ്ഞ് ഭീഷണി മുഴക്കും.

രാജ്യത്തുടനീളം ഇതിനകം നൂറുകണക്കിന് ആളുകൾ ഇത്തരം തട്ടിപ്പിന് ഇരയായിട്ടുണ്ടെന്ന് പൊലീസ് പറയുന്നു. എന്നാൽ, വിഷയത്തിന്റെ സ്വഭാവം മൂലം നാണക്കേടിന്റെ ഭയത്താൽ പലരും പരാതിപ്പെടാൻ പോലും തയ്യാറാവുന്നില്ല. ഇതുവരെ കോടിക്കണക്കിന് രൂപയാണ് ഇത്തരം സൈബർ റാക്കറ്റുകൾ അനധികൃതമായി സമ്പാദിച്ചതെന്നാണ് അന്വേഷണ ഏജൻസികളുടെ വിലയിരുത്തൽ.

Tag: Need a man who can get me pregnant Young man loses Rs 11 lakh after believing online ad