മൂന്ന് പൊലീസുകാരെ കൊലപ്പെടുത്തിയ പ്രതി, തോട്ടം തൊഴിലാളിയായി മൂന്നാറിൽ, ഒടുവിൽ പിടിയിൽ

മൂന്ന് പൊലീസുകാരെ ബോംബ് സ്ഫോടനത്തിൽ കൊലപ്പെടുത്തിയ കേസിൽ മാവോയിസ്റ്റ് സഹൻ ടുടി ഇടുക്കിയിൽ പിടിയിലായി. ഝാർഖണ്ഡ് സ്വദേശിയായ ഇയാളെ എൻഐഎ സംഘം മൂന്നാറിൽ നിന്നാണ് അറസ്റ്റ് ചെയ്തത്. ഝാർഖണ്ഡിൽ നിന്ന് രക്ഷപ്പെട്ട ശേഷം സഹൻ മൂന്നാറിലെ ഗൂഡാർവിള എസ്റ്റേറ്റിൽ ഭാര്യയോടൊപ്പം അതിഥി തൊഴിലാളിയായി ജോലി ചെയ്യുകയായിരുന്നു. എൻഐഎയുടെ നിരീക്ഷണത്തിലായിരുന്ന ഇയാളെ രഹസ്യവിവരത്തെ അടിസ്ഥാനമാക്കി കഴിഞ്ഞ രാത്രി മൂന്നാർ പൊലീസിന്റെ സഹായത്തോടെ പിടികൂടുകയായിരുന്നു.

2021-ലാണ് ഝാർഖണ്ഡിൽ നടന്ന ബോംബ് സ്ഫോടനത്തിൽ മൂന്ന് പൊലീസുകാരെ കൊലപ്പെടുത്തിയതെന്ന് അന്വേഷണത്തിൽ വ്യക്തമായത്. ഏകദേശം ഒന്നര വർഷം മുൻപാണ് സഹൻ കേരളത്തിലെത്തിയത്. സഹനൊപ്പം കൂടുതൽ മാവോയിസ്റ്റുകൾ കേരളത്തിലേക്ക് എത്തിയിട്ടുണ്ടാകാമെന്നാണു അന്വേഷണ സംഘത്തിന്റെ സംശയം. ഇവരുടെ സ്ഥാനം കണ്ടെത്തിയതിന് ശേഷമായിരിക്കും തുടർനടപടികൾ ആരംഭിക്കുക. പ്രതിയെ ഇന്ന് എൻഐഎ സംഘം കൊച്ചിയിലേക്ക് കൊണ്ടുപോകും.

Tag; accused who killed three policemen, worked as a plantation worker in Munnar, finally arrested