ഓണാഘോഷം നിയന്ത്രണം വിട്ടു; അധ്യാപകന്‍ ശകാരിച്ചതിൽ നിരാശനായ വിദ്യാര്‍ത്ഥി ജീവനൊടുക്കാന്‍ ശ്രമിച്ചു, പൊലീസ് ഇടപെട്ട് രക്ഷപ്പെടുത്തി

ഓണാഘോഷം നിയന്ത്രണം വിട്ടതിനെ തുടര്‍ന്ന് അധ്യാപകന്‍ ശകാരിച്ചതിൽ നിരാശനായ പ്ലസ് ടു വിദ്യാര്‍ത്ഥി ജീവനൊടുക്കാന്‍ ശ്രമിച്ച സംഭവത്തില്‍ വടകര പൊലീസ് ഇടപെട്ട് രക്ഷപ്പെടുത്തി. വെള്ളിയാഴ്ച ഉച്ചയ്ക്ക് 12.30ഓടെയായിരുന്നു സംഭവം. സ്കൂളിലെ ഓണാഘോഷം അതിരുവിട്ടപ്പോള്‍ അധ്യാപകന്‍ ഇടപെട്ടതോടെയാണ് വിദ്യാര്‍ത്ഥി പ്രകോപിതനായി പുറത്തേക്ക് പോയത്. ജീവനൊടുക്കാന്‍ പോകുന്നുവെന്ന് അദ്ദേഹം കൂട്ടുകാരോട് പറഞ്ഞിരുന്നു. വിവരം അറിഞ്ഞ അധ്യാപകര്‍ ഉടന്‍ പൊലീസിനെ വിവരം അറിയിച്ചു.

മൊബൈല്‍ ടവര്‍ ലൊക്കേഷന്‍ പരിശോധിച്ച പൊലീസ്, വിദ്യാര്‍ത്ഥി ഇരിങ്ങല്‍ ഭാഗത്താണെന്ന് കണ്ടെത്തി. പൊലീസ് എത്തുമ്പോള്‍ കുട്ടി റെയില്‍വേ പാളത്തിന് സമീപം നിൽക്കുകയായിരുന്നു. മനസ്സിലാക്കാന്‍ ശ്രമിച്ചിട്ടും വഴങ്ങാതെ, കുട്ടി കോഴിക്കോട് ഭാഗത്തേക്ക് പാളത്തിലൂടെ ഓടുകയായിരുന്നു. തുടര്‍ന്ന് കളരിപ്പാടത്തിന് സമീപം ട്രെയിന്‍ എത്തുന്നതിനിടെയാണ് പൊലീസ് വിദ്യാര്‍ത്ഥിയെ സുരക്ഷിതമായി പിടിച്ചു മാറ്റിയത്.
പിന്നീട് പൊലീസ് സ്റ്റേഷനിൽ എത്തിച്ച വിദ്യാര്‍ത്ഥിയുമായി രക്ഷിതാക്കളുടെ സാന്നിധ്യത്തില്‍ വിശദമായി സംസാരിച്ചു, കാര്യങ്ങൾ പറഞ്ഞു മനസ്സിലാക്കി.

Tag: Onam celebrations get out of control; Frustrated by teacher’s scolding, student tries to commit suicide, police intervene and rescue him