ലാൻഡ് ചെയ്യാൻ 400 അടി മാത്രം; എയർ ഇന്ത്യ ഡ്രീംലൈനർ വിമാനത്തിന്റെ റാറ്റ് പുറത്ത്
എയർ ഇന്ത്യയുടെ ഡ്രീംലൈനർ വിമാനത്തിൽ പറക്കുന്നതിനിടെ റാം എയർ ടർബൈൻ (റാറ്റ്) സ്വയം പുറത്തുവന്ന സംഭവമാണ് റിപ്പോർട്ട് ചെയ്യപ്പെട്ടത്. ഭാഗ്യവശാൽ, വിമാനം സുരക്ഷിതമായി ലാൻഡ് ചെയ്യാൻ സാധിച്ചു.
അമൃത്സറിൽ നിന്ന് ബർമിങ്ഹാമിലേക്കുള്ള എയർ ഇന്ത്യ എഐ-117 വിമാനത്തിൽ ആണ് സംഭവം നടന്നത്. ലാൻഡിംഗിന് മുൻപ്, ഏകദേശം 400 അടി ഉയരത്തിൽ റാറ്റ് പുറത്തുവന്നതായി അധികൃതർ അറിയിച്ചു. തുടർന്ന് വിമാനത്തിൽ സമഗ്രമായ സുരക്ഷാ പരിശോധന നടന്നു.
റാറ്റ് എന്നത് വിമാനത്തിലെ എല്ലാ വൈദ്യുതി സ്രോതസുകളും പ്രവർത്തനരഹിതമായാൽ സ്വയം പ്രവർത്തനക്ഷമമാകുന്ന സംവിധാനമാണ്. ജനറേറ്ററും എപിയുവും (Auxiliary Power Unit) ബാറ്ററികളും തകരാറിലായാൽ മാത്രമേ റാറ്റ് സ്വയം പുറത്തുവന്ന് പ്രവർത്തനം ആരംഭിക്കൂ. കാറ്റിന്റെ ചലനശക്തിയിലൂടെയാണ് ഇത് പ്രവർത്തിക്കുന്നത്, അത്യാവശ്യ സംവിധാനങ്ങൾക്കുള്ള വൈദ്യുതി മാത്രമേ ഇതിലൂടെ ലഭ്യമാകൂ.
മറ്റ് വിമാനങ്ങളിൽ പൈലറ്റുകൾക്ക് ആവശ്യമായാൽ റാറ്റ് മാനുവൽ ആയി ഓൺ ചെയ്യാനാകുമെങ്കിലും, ഡ്രീംലൈനർ വിമാനത്തിൽ ഇത് പൂർണമായും സ്വയം പ്രവർത്തനരീതിയിലാണ്. അപകടസാഹചര്യങ്ങളിൽ മാത്രമേ ഇത് സജീവമാകൂ. ഇതിന് മുമ്പ് അഹമ്മദാബാദ് വിമാനാപകടത്തിലും സമാന സംഭവം റിപ്പോർട്ട് ചെയ്തിരുന്നു.
എന്നാൽ ഈ സംഭവത്തിൽ വിമാനത്തിന്റെ എല്ലാ ഇലക്ട്രിക്കൽ, ഹൈഡ്രോളിക് സംവിധാനങ്ങളും സാധാരണ നിലയിലായിരുന്നുവെന്ന് എയർ ഇന്ത്യ പ്രസ്താവനയിൽ വ്യക്തമാക്കി. വിശദമായ പരിശോധന തുടരുകയാണെന്നും, സുരക്ഷ മുൻഗണനയായതിനാൽ ബർമിങ്ഹാമിൽ നിന്ന് ഡൽഹിയിലേക്കുള്ള എഐ-114 സർവീസ് റദ്ദാക്കിയതായും അറിയിച്ചു. യാത്രക്കാർക്കായി ബദൽ ക്രമീകരണങ്ങൾ ഒരുക്കിയിട്ടുണ്ടെന്നും എയർ ഇന്ത്യ അറിയിച്ചു.
Tag: Only 400 feet to land; Air India Dreamliner plane’s rat escapes
