ഗാസ സിറ്റിയിലെ സംഘർഷത്തിനിടെ പലസ്തീനിയൻ മാധ്യമപ്രവർത്തകൻ സാലിഹ് അൽ ജഫറാവി വെടിയേറ്റ് മരിച്ചു
ഗാസ സിറ്റിയിലെ സംഘർഷത്തിനിടെ പലസ്തീനിയൻ മാധ്യമപ്രവർത്തകൻ സാലിഹ് അൽ ജഫറാവി വെടിയേറ്റ് മരിച്ചു. ഇസ്രയേലും ഹമാസും തമ്മിലുള്ള വെടിനിർത്തൽ കരാർ പ്രാബല്യത്തിൽ വന്നതിന് പിന്നാലെ ചില ദിവസങ്ങൾക്കുള്ളിലാണ് ഈ ദാരുണസംഭവം. സാബ്ര പ്രദേശത്തെ സംഘർഷം റിപ്പോർട്ട് ചെയ്യുന്നതിനിടെ ആയുധധാരികളായ ഒരുകൂട്ടം ആളുകൾ സാലിഹിനെ വെടിവെച്ചുകൊലപ്പെടുത്തിയതായാണ് പലസ്തീൻ സ്രോതസ്സുകളെ ഉദ്ധരിച്ച് അൽ ജസീറ റിപ്പോർട്ട് ചെയ്തത്.
കഴിഞ്ഞ ദിവസം രാവിലെ മുതൽ സാലിഹിനെ കാണാതായിരുന്നുവെന്നാണ് റിപ്പോർട്ടുകൾ സൂചിപ്പിക്കുന്നത്. ഹമാസ് സുരക്ഷാ സേനയും ദോഘ്മുഷ് സംഘത്തിലെ ആയുധധാരികളും തമ്മിൽ ഏറ്റുമുട്ടലുണ്ടായതായും വിവരങ്ങൾ വ്യക്തമാക്കുന്നു. ഗാസ സിറ്റിയിലെ ഈ ഏറ്റുമുട്ടലിൽ ഇസ്രയേൽ അധിനിവേശവുമായി ബന്ധമുള്ള സായുധ വിഭാഗങ്ങളും പങ്കെടുത്തിട്ടുണ്ടെന്ന് ഗാസയിലെ ആഭ്യന്തര മന്ത്രാലയത്തിലെ മുതിർന്ന ഉദ്യോഗസ്ഥൻ പറഞ്ഞു. തെക്കൻ ഗാസയിൽ നിന്ന് ഗാസ സിറ്റിയിലേക്ക് ഒഴിഞ്ഞുപോകുകയായിരുന്ന സാധാരണ പൗരന്മാരെയും ഈ സംഘങ്ങൾ ആക്രമിച്ചതായും അദ്ദേഹം ആരോപിച്ചു.
വെടിനിർത്തലിന് ശേഷവും ഗാസയിലെ സുരക്ഷാ സാഹചര്യം അതീവ ഗുരുതരമാണെന്ന് പ്രദേശവാസികൾ പറയുന്നു.
സാലിഹിന്റെ മരണത്തിനു പിന്നാലെ, അദ്ദേഹത്തിന്റെ മുൻ പ്രസ്താവനകൾ സാമൂഹ്യമാധ്യമങ്ങളിൽ വീണ്ടും പ്രചരിക്കുകയാണ്. “ഈ 467 ദിവസങ്ങളിൽ ഞാൻ അനുഭവിച്ച വേദനയും ഭയവും ഒരിക്കലും മറക്കാനാകില്ല. ഓരോ നിമിഷവും ജീവൻ നിലനിർത്താനുള്ള പേടിയോടെയാണ് ഞാൻ കഴിഞ്ഞത്,” എന്നായിരുന്നു ജനുവരിയിലെ താൽക്കാലിക വെടിനിർത്തലിന് ശേഷം സാലിഹ് അൽ ജസീറയോട് പറഞ്ഞത്.
2023 ഒക്ടോബർ മുതൽ ഗാസയിൽ 270-ലധികം മാധ്യമപ്രവർത്തകരാണ് കൊല്ലപ്പെട്ടതെന്നത് അന്താരാഷ്ട്ര സമൂഹത്തെ അതീവ ആശങ്കപ്പെടുത്തുന്ന കണക്ക് തന്നെയാണ്.
Tag: Palestinian journalist Salih al-Jafrawi shot dead during clashes in Gaza City
