പേരൂർക്കട വ്യാജ മോഷണക്കേസ്; യുവതിയെ കുടുക്കാൻ പൊലീസ് ശ്രമിച്ചെന്ന് പുനരന്വേഷണ റിപ്പോർട്ട്

പേരൂർക്കടയിലെ വ്യാജ മോഷണക്കേസിൽ ദളിത് വീട്ടുജോലിക്കാരിയായ യുവതിയെ കുടുക്കാൻ പൊലീസ് ശ്രമിച്ചെന്ന ഗുരുതര കണ്ടെത്തലുമായി പുനരന്വേഷണ റിപ്പോർട്ട്. പത്തനംതിട്ട ക്രൈംബ്രാഞ്ച് ഡിവൈഎസ്‌പി വിദ്യാധരന്റെ അന്വേഷണത്തിലാണ് സംഭവം പുറത്തുവന്നത്.

വീട്ടിൽ നിന്ന് മാല മോഷണം പോയിട്ടില്ലെന്നും, ജോലിക്കാരിയായ ബിന്ദുവിനെ പ്രതിയാക്കാൻ പൊലീസ് കഥ കെട്ടിച്ചമച്ചതാണെന്നും റിപ്പോർട്ടിൽ പറയുന്നു. മറവി പ്രശ്നമുള്ള ഓമന ഡാനിയൽ മാല സ്വന്തം വീട്ടിലെ സോഫയ്ക്ക് താഴെ വെച്ച് മറന്നതാണ് യഥാർത്ഥം. പിന്നീട് മാല അവർക്കുതന്നെ കണ്ടെത്താനായെന്നും അന്വേഷണ സംഘം വ്യക്തമാക്കി.

മാല വീടിന് പിന്നിലെ ചവറുകൂനയിൽ നിന്ന് കിട്ടിയെന്ന പേരൂർക്കട പൊലീസിന്റെ കഥ പൂർണ്ണമായും വ്യാജമാണെന്നും, ബിന്ദുവിന്റെ അന്യായ കസ്റ്റഡിക്ക് ന്യായീകരണം നൽകാനായാണ് ഇത്തരം കഥ നിർമ്മിച്ചതെന്നും റിപ്പോർട്ട് ചൂണ്ടിക്കാണിക്കുന്നു. ബിന്ദുവിനെ സ്റ്റേഷനിൽ അനധികൃതമായി തടഞ്ഞുവെച്ചത് സ്റ്റേഷൻ ഹൗസ് ഓഫീസർ ശിവകുമാറിന്റെ അറിവോടെയാണെന്നും, രാത്രിയിൽ അദ്ദേഹം തന്നെ ചോദ്യം ചെയ്തതിന്റെ ദൃശ്യങ്ങൾ സിസിടിവിയിൽ രേഖപ്പെടുത്തിയിട്ടുണ്ടെന്നും കണ്ടെത്തി.

ദളിത് യുവതിയെ കുടുക്കാൻ ശ്രമിച്ച എസ്‌എച്ച്‌ഒ ശിവകുമാറിനെയും ഓമന ഡാനിയലിനെയുംതിരെ നടപടിയെടുക്കണമെന്ന് അന്വേഷണ റിപ്പോർട്ടിൽ നിർദേശിച്ചിട്ടുണ്ട്.

ചുള്ളിമാനൂർ സ്വദേശിനിയായ ബിന്ദുവിനെതിരെ വീട്ടുടമ ഓമന ഡാനിയൽ നൽകിയ പരാതിയിലാണ് കേസ് രജിസ്റ്റർ ചെയ്തത്. പരാതി നൽകിയത്, ബിന്ദു ജോലി ആരംഭിച്ച് നാലു ദിവസം മാത്രമായിരിക്കെയാണ്. പിന്നീട് പൊലീസ് അവളെ കസ്റ്റഡിയിൽ എടുത്ത് രാത്രി മുഴുവൻ സ്റ്റേഷനിൽ ഇരുത്തി മാനസികമായി പീഡിപ്പിച്ചു. എന്നാൽ അടുത്ത ദിവസം, കാണാതായെന്ന് പറഞ്ഞ സ്വർണം വീടിന്റെ പിന്നിലെ ചവറുകൂനയിൽ നിന്ന് കിട്ടിയെന്ന വിവരം തന്നെയാണ് ഓമന പൊലീസ് അറിയിച്ചത്. തുടർന്ന് ബിന്ദുവിനെ വിട്ടയച്ചു.

സംഭവം പൊലീസ് സംവിധാനത്തിന് വലിയ നാണക്കേടായി. കേസിൽ എസ്ഐയെയും എഎസ്ഐയെയും സസ്പെൻഡ് ചെയ്തു. സ്റ്റേഷൻ ഇൻസ്പെക്ടറെ കോഴിക്കോട്ട് മാറ്റുകയും ചെയ്തു. കാണാതായ സ്വർണം ചവറുകൂനയിലെത്തിയത് എങ്ങനെയെന്ന കാര്യത്തിൽ അന്വേഷിക്കാതെ കേസ് അവസാനിപ്പിക്കുകയുമായിരുന്നു.

ബിന്ദു നൽകിയ പരാതിയുടെ അടിസ്ഥാനത്തിൽ, പൊലീസ് പീഡനം ഉൾപ്പെടെ സമഗ്രമായ അന്വേഷണം വേണമെന്ന മനുഷ്യാവകാശ കമ്മീഷന്റെ ഉത്തരവുപ്രകാരം ഡിവൈഎസ്‌പി വിദ്യാധരൻ നടത്തിയ അന്വേഷണത്തിലാണ് പൊലീസിനെതിരെ ഗുരുതരമായ വീഴ്ചകൾ കണ്ടെത്തിയത്.

Tag: Peroorkada fake theft case; Reinvestigation report says police tried to trap woman