കിളിമാനൂരിൽ വയോധികനെ വാഹനം ഇടിച്ച് കൊലപ്പെടുത്തിയ കേസിൽ കാർ ഓടിച്ചത് പൊലീസ് ഉദ്യോഗസ്ഥൻ തന്നെയെന്ന് റിപ്പോർട്ട്

തിരുവനന്തപുരം കിളിമാനൂരിൽ വയോധികനെ വാഹനം ഇടിച്ച് കൊലപ്പെടുത്തിയ കേസിൽ കാർ ഓടിച്ചത് പൊലീസ് ഉദ്യോഗസ്ഥനെന്ന് വ്യക്തമായി. പാറശാല എസ്എച്ച്ഒ പി. അനിൽകുമാറിന്റെ കാർ പൊലീസ് കസ്റ്റഡിയിലെടുത്തു. റൂറൽ എസ്പിയുടെ മുമ്പാകെ ഹാജരാകാൻ അദ്ദേഹത്തിന് നിർദ്ദേശം നൽകിയിട്ടുണ്ട്. എസ്എച്ച്ഒയ്ക്കെതിരെ ഇന്ന് തന്നെ വകുപ്പുതല നടപടി ആരംഭിക്കും.

അനിൽകുമാറിനെതിരെ ജാമ്യമില്ലാ വകുപ്പ് പ്രകാരം കേസ് എടുക്കും. സംഭവത്തിൽ നടപടി ആവശ്യപ്പെട്ട് മരിച്ച ചേണിക്കുഴി സ്വദേശി രാജന്റെ കുടുംബം മുഖ്യമന്ത്രിക്ക് പരാതി നൽകുമെന്നും അറിയിച്ചു. അന്വേഷണത്തിന്റെ ഭാഗമായി അനിൽകുമാർ ബെംഗളൂരുവിലാണുള്ളത്.

സംഭവം നടന്നത് കഴിഞ്ഞ പത്താം തീയതി പുലർച്ചെ അഞ്ചുമണിയോടെയായിരുന്നു. വയോധികനെ ഇടിച്ചിട്ടും കാർ നിർത്താതെ പോകുകയായിരുന്നു. സ്ഥലത്തുവച്ച് തന്നെ രാജൻ (59) മരണമടഞ്ഞു. തുടർന്ന് കാർ സ്വകാര്യ വർക്ക്‌ഷോപ്പിൽ കൊണ്ടുപോയി അറ്റകുറ്റപണി നടത്തി തെളിവ് നശിപ്പിച്ചുവെന്നും അന്വേഷണത്തിൽ കണ്ടെത്തി. സിസിടിവി ദൃശ്യങ്ങളിലൂടെ തന്നെ വാഹനത്തെ തിരിച്ചറിഞ്ഞിരുന്നു. അപകടത്തിന് ശേഷം രാജൻ ഏറെ നേരം റോഡിൽ ചോരവാർന്ന് കിടന്നിരുന്നുവെന്നതാണ് വിവരങ്ങൾ.

Tag: Police officer was driving the car that hit and killed an elderly man in Kilimanoor, report says