”കേരളത്തിൽ മദ്യനിർമ്മാണം വർദ്ധിപ്പിച്ച് വിദേശത്തേക്ക് കയറ്റുമതി ചെയ്യാനുള്ള സാധ്യതയുണ്ടാകണം” മന്ത്രി എം ബി രാജേഷ്

കേരളത്തിൽ മദ്യനിർമ്മാണം വർദ്ധിപ്പിക്കണമെന്ന് തദ്ദേശ സ്വയംഭരണ, എക്സൈസ് വകുപ്പ് മന്ത്രി എം ബി രാജേഷ് ആവശ്യപ്പെട്ടു. തദ്ദേശീയമായി മദ്യ ഉൽപ്പാദനം വർദ്ധിപ്പിച്ച് വിദേശത്തേക്ക് കയറ്റുമതി ചെയ്യാനുള്ള സാധ്യതയുണ്ടാകണം. പ്രാദേശിക എതിർപ്പുകൾ ഉണ്ടായേക്കാം, എന്നാൽ അത് പരിഗണിച്ച് മുന്നോട്ട് പോകാതിരിക്കാൻ കഴിയില്ല.

കേരളത്തിൽ 9 ഡിസ്‌ലറികൾ ഉണ്ടായിട്ടും ഒരു തുള്ളി മദ്യം പോലും ഉൽപാദിപ്പിക്കുന്നില്ലെന്നും കേരളത്തിന് സ്വന്തമായി മദ്യം ഉൽപാദിപ്പിക്കാൻ കഴിയുമെന്നും മന്ത്രി ചൂണ്ടിക്കാട്ടി. തദ്ദേശീയമായ മദ്യ ഉൽപാദനത്തെ ചില സ്ഥാപിത താൽപ്പര്യക്കാരാണ് എതിർക്കുന്നത്. വെള്ളത്തിൻ്റെ പ്രശ്നം പറയുന്നവരുണ്ട്, എന്നാൽ കർണാടകയിൽ ഇല്ലാത്ത എന്ത് പ്രശ്നമാണ് കേരളത്തിൽ ഉള്ളതെന്ന് അദ്ദേഹം ചോദിച്ചു. സ്ഥാപിത താൽപര്യങ്ങൾക്ക് മുന്നിൽ വഴങ്ങില്ലെന്നും, വിവാദങ്ങൾ ഉണ്ടാകുമെന്ന് കരുതി ചില കാൽവെപ്പുകൾ എടുക്കാതിരിക്കാൻ കഴിയില്ലെന്നും മന്ത്രി വ്യക്തമാക്കി.

കൂടാതെ, സംസ്ഥാനത്തിൻ്റെ മദ്യനയം 5 വർഷത്തേക്ക് ആക്കുന്നത് സർക്കാരിൻ്റെ പരിഗണനയിലാണെന്നും മന്ത്രി എം ബി രാജേഷ് അറിയിച്ചു. നിലവിൽ ഓരോ വർഷത്തേക്കുമാണ് മദ്യനയം രൂപീകരിക്കുന്നത്. ഇത് മദ്യ നിർമ്മാണ വ്യവസായത്തെ ദോഷകരമായി ബാധിക്കുന്നുണ്ട്. ദീർഘകാല മദ്യനയം ഇല്ലാത്തതിനാൽ വ്യവസായികൾ കേരളത്തിൽ നിക്ഷേപം നടത്താൻ മടിക്കുന്നു. മദ്യനയം അടുത്ത വർഷം മാറുമോ എന്ന വ്യവസായികളുടെ ആശങ്ക പരിഹരിക്കുന്നതിനായി ദീർഘകാല മദ്യനയം വേണമെന്നും ഇതു സംബന്ധിച്ച ചർച്ചകൾ നടക്കണമെന്നും അദ്ദേഹം കൂട്ടിച്ചേർത്തു.

Tag: There should be a possibility of increasing liquor production in Kerala and exporting it abroad,” says Minister MB Rajesh