സംവിധായകൻ അടൂർ ഗോപാലകൃഷ്ണനെതിരെ പരാതി നൽകി പുലയ മഹാസഭ

ഫിലിം കോൺക്ലേവിൽ നടത്തിയ വിവാദ പരാമർശവുമായി ബന്ധപ്പെട്ട് സംവിധായകൻ അടൂർ ഗോപാലകൃഷ്ണനെതിരെ വീണ്ടും പരാതി. കേരള പുലയ മഹാസഭയാണ് പുതിയ പരാതി നൽകിയത്. കെപിഎംഎസ് ജനറൽ സെക്രട്ടറി ആലംകോട് സുരേന്ദ്രൻ ഡി.ജി.പി.ക്ക് നൽകിയ പരാതിയിൽ അടൂരിന്റെ പ്രസ്താവന പട്ടികജാതി വിഭാഗത്തെ അപമാനിക്കുന്നതാണെന്ന് ആരോപിക്കുന്നു.

അതേസമയം, ഈ പരാമർശവുമായി ബന്ധപ്പെട്ട് അടൂരിനെതിരെ കേസെടുക്കേണ്ട സാഹചര്യമില്ലെന്ന് പൊലീസിന് ലഭിച്ച നിയമോപദേശം വ്യക്തമാക്കുന്നു. അടൂർ ഗോപാലകൃഷ്ണൻ ജാതി അധിക്ഷേപമോ വ്യക്തി അധിക്ഷേപമോ നടത്തിയിട്ടില്ലെന്നും, കോൺക്ലേവിൽ അദ്ദേഹം മുന്നോട്ടുവച്ചത് ഒരു നിർദ്ദേശം മാത്രമാണെന്നും നിയമോപദേശം പറയുന്നു. ദളിത് വിഭാഗങ്ങൾക്ക് നൽകിയ ആനുകൂല്യങ്ങൾ നിർത്തലാക്കണമെന്ന് അടൂർ പറഞ്ഞിട്ടില്ലെന്നും, അവരുടെ നിലപാട് അവഗണിക്കണമെന്നോ സൂചന നൽകിയിട്ടില്ലെന്നും പൊലീസിന്റെ നിലപാടാണ്.

സാമൂഹിക പ്രവർത്തകനായ ദിനു വെയിൽ അടൂരിനെതിരെ മുൻപ് നൽകിയ പരാതിയിൽ, അദ്ദേഹത്തിന്റെ പ്രസ്താവന എസ്‌സി/എസ്ടി വിഭാഗത്തെ പൊതുവായി കുറ്റവാളികളായോ അഴിമതിക്കാരായോ ചിത്രീകരിക്കുന്നുവെന്നും, ഇത് എസ്‌സി/എസ്ടി ആക്ടിന്റെ സെക്ഷൻ 3(1)-ന്റെ പരിധിയിൽപ്പെടുന്നുവെന്നും ആരോപിച്ചിരുന്നു.

സിനിമാ നയരൂപീകരണത്തിന്റെ ഭാഗമായി സർക്കാർ സംഘടിപ്പിച്ച ഫിലിം കോൺക്ലേവിലാണ് അടൂർ ഗോപാലകൃഷ്ണന്റെ വിവാദ പ്രസ്താവന ഉയർന്നത്.

Tag: Pulaya Mahasabha files complaint against director Adoor Gopalakrishnan